Gaguritan Bun Ulunati " Soroh Puaji"

 

                                                 

 “Pangaksama”

     Pupuh  : Sinom

1 .   Pucuk kalpika wong nista  Rumning sekar lah kawidhi  Sung sumirat Kura widya  Labda purna doning gerip Geng ampura antuk gulik  Langgah ngogah wus kaluhur  Mogi luput upadrawa  Inger tuwas tulus bakti  Maka pungu  Damuh sira ring kawitan  Anggen nyelimburang manah  Iseng ngulik ngawe gurit  Nyarwang tong ngelah gaginan  Nyaputin dayane lekig Mabet kadi anak ririh Suba loktah dewek jugul Dasar bantang pangkah pongah  Sing tara kedekin gumi  Tan pasemu  Jwari nyentok dewek nista

Sakeng meled ngurit gita Sakadi ring sor punika  Wantah wacen ring pesantyan  Kala nyatos ngawit wali  Boya tatas linging aji  Boya langgah mabet sadu Carita nggen gegonjakan  Gaguyonan sadah ngoding  Tatwa guyu  Srana ngiket pasawitran    Nika banget lungsur titiang Ida dane ngewikaning  Ngampurayang antuk iwang  Tan surud manahe ngesti Nunas piteket nggen titi Titi pengancan pangweruh Majeng sang sampun sujana  Sweca ledang miteketin  Kirang langkung  Kenak ngicening pawarah

                                                            BUN ULUNATI

                                                             Soroh Puaji

Pupuh:pangkur

1.        Kanjekang abad empat belas  Inger warsa syu tlung atus seket yukti  Dalem Ketut wos ring bali  Ring wengkon soma Negara ,masandekan  Tepi sisir Pejeng wuwus  Mari tatas ngwaspadayang  Tangkis pakibeh wong bali  2.        Nangun pondok pasandekan  Lan khayangan, genah  suci angrastiti Masrana kastuba ratu Taru dadap loktah aran ,pangayatan  Gumanti nunas rahayu  Guwa liang genah nika  Kangin sisir kraton bali   Pupuh durma Kacarita kraton Dalem ring samprangan  Maka puser jagat bali  “Dalem “ pungkus nata  Dalem Kresna Kepakisan  Wuwus sampun ngalap rabi  Winih Ayu Raras  Arya Gajah Para wiwit

Guwa atos nika genah  Liang atos,mari tatas, manlektekin  Genah ngintip atos ipun  Manawi makudang sasih ,ring gwa liang  Tumuli magingsir nyujur Wawengkon jagat Samprangan  Wisman Gajah Mada nguni 4.   Madeg nateng bali dwipa  Dalem Ketut ,Kresna Kepakisan nami  Ring Samprangan puser iku  Para Arya Majapahit lawan Daha  Sareng solas akweh ipun  Angabih jumeneng nata  Nabdab panjak mangda trepti 6. Kocap sampun mijil putra prami papat  Dalem Ile pinih riyin Dalem made ruwa Kaloktah Dalem Tarukan  Kaping nengah raga istri  Kanya adeg ira  Ida Ayu Swambawa nami

7.    Kaping Kitut Dalem Ketut kang puspata  Sri Dalem Ketut Ngulingsir  Embas ring samprangan  Maka  catur wus jejaka  Ingkang malih ngalap rabi  Tosning para arya  Winih Ayu Kutawaringin        8.    Sakeng selir mijil putra lanang tunggal  Dewa Tegal Besung nami  Juwa ring Samprangan  Panca sami putran ingkang  Kocap nata sampun lingsir  Puput sira lebar  Dalem Ile mangentosin      9.      Dalem Ile puspata Agra Samprangan  Ngentos linggih dalem lingsir  Ngendah putri tunggal  Dewa Ayu Muter ngaran  Mijil saking prami swari Mungguwing selir ida  Sami tan ngendah sentani

10.    Arin ida Dalem Made kaping ruwa Ring Tarukan wus melinggih  Tiling mata tamban  Sidi mahen mausada  Lana ngesti panjak trepti Anaruk lawan wariga  Wastu Dalem Tarukan sengin       11.    Dalem Ketut oneng ida majajudyan  Nenten sinah jenek linggih  Ngulesir ngrahina  Ngaruruh judi setata  Rasa tan eling ring puri  Maka awinan nya  Seng  Dalem Ketut ngulesir     12.    Kocap mangkin Dewa Tegal Besung ngaran  Wuwus jangkep ngalap rabi  Wus ngendahan putra  Panca sami putra lanang  Dewa Gedong Artha nami  Dewa  Pagedangan  Dewa Nusa ,Dewa Bangli

13.    Kaping panca Dewa Anggungan aran Wus ngendah putra adiri Sira Takmung ngaran Putra aji keni danda   Ampeh saking tossing nati Ampeh susud wangsa  Ampeh wit sameton tunggil 7 14.  Antuk kimud madulurang jengah erang  Tumuli raris mangingsir  Sareng putran ida  Ngelintang narung segara  Nusa gurun ne kaungsi  Tan kocap ring awan  Ring Panida kancit prapti Pupuh Sinom 15.      Dewa Anggungan ring Nusa  Sareng putran dane tungil Sira Takmung mungwing aran Ring Jungut Batu malinggih  Padukuhan jenek puri            Kapasadnya Jero Dukuh  Kojar dane ring sang putra  “Ampeh  Aji” nggen pakeling Jantos wawuh  Ampeh Aji aran putra

16.    Dane Dukuh taler kojar  Manut paseng putra yukti  Dukuh Ampeh Aji ngaran  Jantos sawarih sentani  Ngange pinget “Ampeh Aji “ Ampeh sakeng tosing prabu  Catur semeton ngampehang  Nika rahat nggen pakeling  Dening iku  Awinan ka jagat Nusa  17.   Jero Dukuh mangkin kocap  Jungut Batu jenek ngawit  Dane teleb mangusada Midabdab sesana kerti  Dresta agama katitis  Dane micayang pangweruh Ngapti panjak kasukertan  Wastu panjak makweh bakti  Manggeh ulu  Sire Dukuh ka wirya yang 18.    Mung gwing putran dane tunggal  Kino jarin “Ampeh Aji “ Sampun ngendahang sentana  Teges “ soroh Ampeh Aji’ Kaprah kojaran “ Puaji “ Umijilan Jungut Batu  Wawengkon Nusa Penida  Jangkep parhyanagan kasiwi Pura iku  Kawitan jenek ring Nusa

19.     Rawuh pangandaning  warsa Tumuli sami mangingsir Nyujur wawidangan anyar  Jagat” Batu Madeg “ nami Sampun pada nangun puri Kanjek nika ndah pamuwus  Wus prapta Brahmana Wangsa  Lanang istri kangken buncing  Jenek nahu  Ring “ Maos” nangun pasraman  20.    Anane Brahmana wangsa     Kangin Pejeng kawit mijil     Brahmana Kaniten pecak    Griya Sanur kojar mangkin     Ida nglimbakang prawerti    Darma upacara iku     Sesana darma agama     Dukuh Puaji sairing     Pada tuhu     Maka siwa lawan sisya  21.     Wenten reko wed bendesa  Saha putran dane tunggal   Mawasta Ki Dartu Gorda Nireng Panide ngodagin  Datu Gorda maboyain  Matungkas nora satinut Sekancan dresta bisama  Kang kaodar wiku kalih  Bendu ngebug              Dukuh Puaji lan Brahmana

22.     Wicerane sapunika  Kapireng den Dalem bali  Gelis Dalem manguduhang  Ngawirangin wiku kalih  I Dewa Kaleran Sakti  Warih Gedong Arta tuhu  Kautus maka manggala  Weha wadwa bala jurit  Ngadu wiku  Magutin Ki Datu Gorda 23.     Tan kocapan maring jalan  Ring Panida  kancit prapti Sinanggra  de Dang  Brahmana  Tan sah Ki Dukuh Puaji  Ngigumang wiweka jurit  Naya sandi mwang sabahu  Doning sampun pada tatas  Agia gagelaran jurit Sami igum              Ngadu wira ring payudan 24.   Sajroning matandang wirang Tandang katong ngadu sakti Bala wadwa akweh pejah  Wenten ngarod nandang kanin  Wadwa datu gorda jerih  Pada pablesat melayu Kantun dane Datu Gorda  Kasor nungkul nunas urip  Nyadia tinut  Sapari dabdab bisama

25.    Wuwus sampun molih jaya  Brahmana lan Dukuh Puaji  Sabahu Dewa Kaleran  Pada ngungsi jenek linggih  Batu Madeg jenek Puaji  Ring Maos Brahmana wiku  Munggwing I Dewa Kaleran  Ka Batu Nunggul negari  Jenek iku  Jantos ngendahang sentana 26.    Sira Puaji mangkin kocap          Maring Batu Madeg linggih          Sampun ngendahang sentana          Pinih alit istri tunggil          Ngaran Ni Luh Ayu Puaji          Arabi ka Batu Nunggul          I Dewa Kaleran ngalap          Endah putra lanang istri          Warih iku           Istri tunggal, Catur lanang 27.     Purin I Dewa Kaleran Mawasta Jero Puaji  Batu Nunggul aran jagat  Jagat ika genah ngawit  Dewa Kaleran Puaji  Putran ida pinih duwur  Putran ida pinih untat  Ngaran Dewa Ayu Puaji Listu ayu  Dewa Krambitan a ngalap

28.     Soroh Puaji lanturang Ring Batu Madeg gumanti Sampun pada keh sentana Tumuli kesah mangingsir Wenten ka Badung negari Sawarih sentana tumut Sang Takmung lan putra tyosan Ngamaraning Gelgel puri Nyraka tuhu  Sawarih ring Sweca Pura Pupuh Ginada 29.    Sri Dalem Di Made ingkang Putra kalih saking prami Maka kalih putra lanang Dalem Mayun pinih duwur Dalem Jambe ne alitan Katun alit Soroh Puaji mariwara 30.    Pangendan kali sengara Rajah tamahe mamurti Wetu rundah haro-hara Ekan Dane Patih Agung Ki Agung Maruti ngaran  Ngawe weci Ngalebok matandang yuda

31.    Wadwa purine kasatan Antuk wadwa kryan Maruti Dalem molih masinutan Nyujur Guliang nyilib nyunut Putra cili kalih lanang Sareng nyunut Ring Guliang masan dekan 32.    Soroh Puaji pageh nyraka Teleb ngabih Dalem Cili Bela pati tandang wirang Mwang pedanda Wayahan Bun Ida lebar ring payudan Bela pati Tindih majeng Gelgel ingkang 33.     Tat kalaning haro-hara Keh pablesat soroh Puaji Wenten ka Banjar Ambengan Wenten ke Aan negantun Sampun pada keh sentana Wus anyiwi Nyungsung kahyangan kawitan 34.     Soroh Puaji ring Guliang Ngadpada jeng Dalem cili Dalem Manyun lantur kesah  Ring Tampaksiring malungguh Sairing Dang Bagawanta Luwih sakti Pedanda Wayahan Bun pecak

35.     Soroh Puaji jwa sedaya  Sairing ka Tampaksiring Seleg,jemet,geleng nyraka Sapanyeneng Dalem Mayun Kocap Dalem wus maputra Petang diri Tur pada a ngambel jagat 36.     Cok Anom Pamayun ngaran Ngambel jagat Tampaksing Cok Gede Pamayun putra Ring jagat Pejeng malungguh Tan sah puaji iringan Kapi tuduh Uluning jagat Tarukan Pupuh Ginanti 37.    Soroh puaji kawuwus  Ring Tarukan jenek linggih Nyungsung  kahyangan kawitan Wus akweh endah sentani Nuli wenten pasah kesah Ring Benawah nangun puri 38.      Ring Benawah nyangsan dalu Wus nangun linggih kawitan Pangawitnya Gede Bara Lan sentanan nyane sami Matilar nilar Tarukan Ring Benawah genah ngawit

Pupuh : Pangkur 39.    Puaji ring Badung kocap Sami pada,akweh ngendahang sentana Kengin wenten kesah nyujur Wawidangan jagat Tunggul Keh sentana lanang wadu Lantur aris wenten kesah Ring Tulikup jenek linggih 40.     Maring Tulikup kojaran  Sampun katah,sentanane lanang istri Wuwus nyangsan lawas dalu Kocap wenten kesah pasah ngungsi jagat Wengkon desa Tusan iku Saha wus nangun parhyangan  Sungsungan kawit puaji

Pamuput Atur Pupuh  Mas Kumambang 41.     Atur untat,aksamayang purun ngurit Nora manut babad Wantah nggen panylimbur ati Geng ampura antuk iwang 42.     Mogi-mogi mapi kenoh nyuluh urip Dyastu rawat matra  Gita niki anggen titi Ngruruh wiwit galang sinah   Pangripta : Jata Sawitur ( Campuhan Ubud – Gianyar ) Kagurit Anggara Sungsang, 10 Maret 2009