WARSA ; NETRA CANDRA SUNYA KARWA
KANJEK ngalembar utawi ngawacen Babad Prasati sane kasungsung ring Mrajan Agung Dewa Kabetan ring Tarukan ,nemonin rahina Wrespati Umanis wuku Pahang tgl. 4 Oktober 2012 olih pangwcen Ki Guru Gede Pasek Budha Gautama sareng Toklok Jata Sawitur [ Tut Ubud ].
Babad Prasasti I Dewa Kabetan
Om Saraswati namosidhyem,warade kama rupini,sidhirambam karisyoni,sidhi bhawantu nama sidhiyem. Om Saraswati myaham.
Om Ksamaswamam, maha dewa yanamah swaha. Om Pangaksamaninghulun ri jeng paduka Bhatara Hyang mami Sang ginelar sarining ongkara atmana mantram , ring hrdaya sunyalaya,sidhi yogeswara,sira ta anugraha, hana maka purwaning Sang wus lepas.
Sembahninghulun ring buk pada Bhatara,luputa mami ring tulah pamidi, makadi sawigrahaning mala papa pataka kemenaning hulun mojarakenang kata usana tantra purana , sida tan kataman upadrawa de Bhatara Hyang mami , amrtyaaksyaken punang atita, nagata,muang suksma hati suksma.Sarwadi aweha nugraha ya wastu paripurna anemuaken hayu dirgayusa katekeng kula gotra sentana pertisentana, namostu jagadhitaya.
Pamungkahing tatwa carita ngawit sadereng warsa masehi ring gunung Mahameru ( Himalaya) wawidangan jagat India ( Brata warsa / Jambuwarsedi) kabaos wenten pasraman luwih utama mawasta pasraman Age-Asti sane ngiyetang kaweruhan kadyatmikan ( kaparamartan) tatwa Agama Hindu sesananing Siwagama minakadi weda tatwa,upanisada muah sane lian-lianan.
Ripungkur wekas kadi Ida Dang Rsi Maha Guru ring pasraman Age-Asti punika,tedun rawuh ring jagat Jawidwipa saha anangun pasraman ripucaking gunung aneng Jawa pulina. Riantuk Dang Rsi Maha Guru kesahe sakeng gunung Mahameru awanan pasramane kojaran Pasraman Semeru cihnaning wit tunggil lepihan Pasraman Age-Asti Jambuwarsedi.
Munggwing kadi Ida Dang Rsi Maha Guru utawi Dang Rsi Agung kopasadnya Dang Maha Rsi Agastya. Malawas dalu rawuhing gunung genah pasramane punika kawastanin Gunung Semaru.
Salanturnyane wekasing wekas wus nincap warsa masehi,nuli raris Ida Dang Rsi Agung angutus para sisyan Idane ring Gunung Semeru Jawi kangin praya tedun maraning jagat Bali pulina,buat ngalimbakang kaweruhan pagugon tatwa Agama Hindu sesananing Siwagama.
HENENGAKENA PUNANG KATHA.
Titanan purwakaning tatwa kalanguni wus nincap warsa masehi,koripan jadmane ring Balidwipa,kantun ngugonin patitis sembah subakti ring batu, taru mageng,paras muah sane tiyosan kang sinengguh luwihing wisesa tur suci,saha kapinangken prasida ngawinang jagate degdeg landuh setata kerta trepti. Ping kalihne ngugonin tatuwek idep munggwing para Laluhurnyane sane wus amoringacintya kasinanggeh malinggih ring pucaking gunung. Indike punika ngawinang Sang rumaga Maha Guru ring Pasraman Age Asti wentene ring Gunung Mahameru wawidangan jagat India ngalimba kang kaweruhan pagugon kadyatmikan astia langgeng, sane kabaos Agama Hindu sasananing Siwa.Tiling pagugone sane pinih langgeng wantah Agama mawiwit bun Gunung Mahameru.
Kadi Ida Sang rumaga Maha Guru ring Pasraman Age Asti India ring sajeroning tatwa carita upasadnya Maha Rsi Agastya.Maring tatwaning babad upasadnya Bhatara Hyang Pasupati. Pungkur wekas jeroning Parhyangan palemahan upasadnya Bhatara Hyang Siwa Guru,malinggih ring kamimitan roong tiga.Sira Hyang Pasupati anuli ngutus para putra sisya sareng tiga tedun ring jagat Balidwipa praya ngalimbakang pagugon sembah subakti manggeh tiling ring Ida Sang Hyang Widhiwase,malarapan dresta Agama Hidu Siwa. Manut kecaping sastra aji ” Ekam Eva Adwityam Brahman”, muang ” Tan hana dharma mangrwa”
Munggwing putra sisya tiga kanginutus kadi Ida Sang luwihing kaparamartan minakadi; Bhatara Hyang Genijaya Sakti malingga ring Parhyangan Gunung Lempuyang luhur, Bhatara Hyang Putranjaya malingga ring Parhyangan Gunung Tohlangkir muang Bhatari Hyang Dewi Danuh malingga ring Parhyangan Ulun Danu Batur.
Risampune Bhatara sareng tiga jenek malinggih ring Bali,raris Bhatara Hyang Pasupati malih ngutus putra sisya sareng papat tedun ka jagat Bali kang apasih; Bhatara Hyang Tumuwuh malingga ring Parhyangan Gunung Batukaru , Bhatara Hyang Tugu malingga ring Parhyangan Gunung Andakasa, Bhatari Hyang Manik Galang utawi Hyang Manik Corong malingga ring Parhyangan jagat Pejeng, muang Bhatari Hyang Manik Gumawang malingga ring Parhyangan Danu Beratan.
Kinucap Bhatara Hyang Genijaya Sakti jeroning payogan mijil putra sanunggal apuspata Bhatara Hyang Mahadewa. Raris Bhatara Hyang Mahadewa mayoga mijil putra kakung kalih diri mapuspata Hyang Bajrasatwa lawan Hyang Dwijendra. Wekas Hyang Bajrasatwa ngawijilang putra tunggil kapungkus Empu Lempita. Salanture Empu Lempita maduwe putra lalima maka luwir ; Empu Genijaya malinggih ring Gunung Lempuyang madya, Empu Semeru malinggih ring Besakih , Empu Kuturan malinggih ring Silayukti aneng Padangbai , Empu Gana brahmacari malinggih ring Pura Dasar aneng Gelgel miwah pinih untat E mpu Bradah malinggih ring Lemahtulis aneng jagat Jawi kangin.
Kocapan mangkin Sira Empu Bradah ngedahang putra tatiga maparab ; Empu Bahula , Dyah Wedawati lan Empu Siwagandu. Wekasan Sira Empu Bahula angalap rabi Dyah Ratna Mangali putran Sira Empu Kuturan lawan pramiswari Dyah Banowati aneng jagat Dirah Jawi kangin. Maring carita Calon Arang kadi Ida Dyah Banowati kasumbung Rangdeng Dirah.
Parabian Empu Bahula lawan Dyah Ratna Mangali ngawijilang putra limang diri mapesengan ; Empu Wiranata utawi Empu Tantular pungkusan Ida tiyos, Dyah Dwararika , Dyah Adnyani , Dyah Amertajiwa , pinih untat Dyah Amerta Mangali.
Lantur kocapan Sira Empu Tantular maduwe putra lanang papat angaran ; Empu Panawasikan, Empu Semaranata , Empu Sidhimantra pinih untat Empu Kepakisan.
Baosang munggwing Sira Empu Kepakisan maduwe putra ngaran Wang Bang Kepakisan saha kaprayascita patiwangi abiseka Sang Satrya wenang angawa rat kang apasih Sri Soma Kepakisan. Indike punika raris maka papat putran Ida ka adegang Nateng jagat minakadi ; Sri Dalem Bima Sakti abiseka nata ring jagat Pasuruan Jawi kangin , kaping kalih Sri Dalem Juru abiseka nata ring jagat Blambangan Jawi kangin , kaping tiga istri apasih Ni Dewi Mas Malela Kepakisan abiseka nata ratu ring jagat Sumbawadwipa . Pinih untat Sira Sri Dalem Ketut Kresna Kepakisan abiseka nata nyakrawerti ring jagat Bali dwipa saha puri kraton aneng Samprangan
Kawuwus Sri Dalem Ketut Kresna Kepakisan nyakrawerti ring Samprangan angawa pusaka pajenengan mawasta Ki Tanda Langlang , Ki Bangawan Canggu lan Ki Lobar pica sakeng Majapahit. Munggwing rabi prami maparab Winih Ayu Raras tosning Arya Gajah Para ngendahang putra papat mapungkusan Sira Agra Samprangan , ping kalih Dalem Made Tarukan . ping tiga Dewa Ayu Swabawa Kanya muang Sira Dalem Ketut Ngulesir pinih untat. Wenten putra tiyos wit ibu pawawing Winih Ayu Kuta Waringin tosning Arya Kuta Waringin ma aran Dewa Tegal Besung.
Risampune Sri Dalem Ketut Kresna Kepakisan lebar , raris Sri Agra Samprangan umadeg nata ngontosin linggih Aij Idane ,saha kabaos Dalem Ile wastan Ida tiyos.Sajeroning Sira Dalem ngodag jagat, kengin arang pisan para manca , tanda mantri prasida masadu ajeng ring paseban , antuk Sira Dalem geleng lulut asih lawan para rabi awanan kapungkusang Dalem Ile. Duwaning kadi punika nuli Kryana Klapodyana maridabdab tangkil ring Dalem Made Tarukan aneng jagat Tarukan, buat nunasica mangdene Dalem Made arsa ngentosin linggih rakan Ida ring Samprangan. Riantuk tan kaswecanin pinunas Dane Klapodyana, nuli raris Dane Patih ngaruruh Sira Dalem Ketut ring pajudian aneng Desa Pandak , saha atur nunasica mangde Dalem Cili arsa madeg nata. Ngarenga atur Dane Patih Klapodyana, mangen – angen ta Sira Dalem Cili , raris runtuh wecana
agia nagingin kadi pakarsan Dane Klapodyana , kemawon Sira Dalem Cili tan arsa mawali ka Samprangan . Antuk pikobet punika , kadi Dane Kryana Patih, ngaturang puri Kapatihan Danene aneng jagat Gelgel gumanti anggen Puri Karaton linggih Sira Dalem anyakrawerti. Munggwing Dane Patih magingsir nangun Puri aneng abian tubuh.Ngawit duk punika dane kasengguh Arya Kebon Tubuh.Inggihan Puri Kraton Dalem mawasta Lingga Arsa Pura.Wus abiseka nata Dalem Ketut Ngulesir mapungkusan Sri Dalem Ketut Semara Kepakisan.
Rikanjek madegira Sri Dalem Ketut Semara Kepakisan aneng Gelgel,wenten uleman sakeng Murdaning Ulu Prabu pinaka Nateng Majapahit ,mangdene murdeng jagat Bali tinut ngamiletin mahasaba nirang Kraton Wilwatikta Jawi kangin. Antuk punika raris Sira Dalem Gelgel ngalunganin sareng mahasaba , sairing para tanda mantri minakadi ; Kryana Kebon Tubuh , Kryana Bang Pinatih muwah Kryana Patandakan. Punika awinan Sira Dalem ngsengin ari kwalon I Dewa Tegal Besung mangda ngebag ngamong Puri Gelgele salamin Sira Dalem kantun aneng Jawa,gumanti pinaka nyade linggih Dalem gumentos mawantun ka Bali. Antuk punika Dewa Tegal Besung kapungkusang Sri Dalem Tegal Besung nyade linggih ring Gelgel.
Kawuwus Dalem Ketut Ngulesir matraning jagat Bali wus akrab – kambe lawan putran Dane Klapodyana, ngawijilang putra sanunggal upasadnya Sri Dalem Watur Enggong. Risampune lebar Sira Dalem Semara Kepakisan,,raris Dalem Watur Enggong umadeg nata ngentosin linggih Dalem Ketut , saha tanda mantri pangabih minakadi ; Gusti Jelantik Tohjiwa ,Gusti Panatih muang Gusti Kebon Tubuh.
Baosang sapamadeg Sri Dalem Watur Eanggong aneng Gelgel, mijil putra tiga wit rabi prami apasih ; Dalem Pamayun Bekung ,ping kalih Dalem Made Sigening ,ping tiga istri Dewa Ayu Sukanya. Taler putra tiyos wit ibu panawing Ni Luh Ularan utawi Luh Tenganan,wantah putran Dane Patih Ularan,ngendahang putra maparab I Dewa Pamayun ,Dewa Ayu Laksmi , I Dewa Ularan. Sane umanggeh Bagawanta , kadi Ida Rsi Bujanga Mustika Wisnawa jenek ring Takmung. Kancit kalaning Dang Rsi Bujangga angrabining Dewa Ayu Laksmi , wastu menggah duhkita yun Dalem Watur Enggong.Indike punika awinan ajerih malayu kesah Sira Bagawanta lawan rabi Dewa Ayu Laksmi rawuh jenek ring Tabanan.
Kanjek duk punika rawuh Brahmana Siwa inggihan Ida Padanda Wawu Rawuh jumujug nirang Gelgel, nuli kamanggehang Bagawanta mapungkusan Dang Hyang Dwijendra.
Kocapan Ki Patih Ularan lawan putran Dane ya ta Ni Luh Ularan pinaka ibu I Dewa Pamayun ,ka ampeh matilar sakeng Gelgel ,raris jumenek ring Kalianget Den Bukit sairing Dewa Pamayun, sangkaning Ki Patih Ularan prasangga munggal prabun Dalem Juru nateng Blambangan ,duke Ki Patih inutus anglurug jagat Blambangan.
Sajeroning wiwekan Dalem nyakrawerti ring Gelgel,wawidangan pakodag Nateng Bali sayan – sayan nglimbak rawuh ka dura Bali minakadi kadaton Goa jagat Sulawesi muah kadaton Selaparang jagat Lombok rawuhing Pasuruan lan Blambangan Jawi kangin.
Wus panamayaning masa ,lebar sira Dalem Watur Enggong, rikanjek para putran Ida kantun Cili wimuda. Antuk punika raris maka lima putran I Dewa Tegal Besung minakadi Dewa Gedong Artha , Dewa Pagedangan , Dewa Bangli , Dewa Nusa lan Dewa Anggungan ka adegang kapiandei buat ngamiandelin sapamadegira Dalem Pamayun Bekung.
Ngawit pakodag Dalem Bekung,kawentenan kodag jagat pajarahan ring dura Bali nyangsan purun prasangga nulak nungkul majeng Nateng Ulu Prabu aneng Gelgel. Indike punika sangkaning ring jeroan kadaton Gelgel metu rudah biyuta mawiwit sakeng idep duratmaka I Dewa Anggungan katampih olih Gusti Batan Jeruk maka matwan Dewa Anggungan tan sah sabahunnyane Gusti Jelantik Tohjiwa lan Ki Gusti Pande Base muang wadwa sabahun nyane. Biyutane ring jeroan puri Lingga Arsa Pura katangehang olih para tanda mantri pangabih puri minakadi Ki Gusti Kebon Tubuh, Ki Gusti Panatih muang Ki Gusti Manginte. Raris matandang wirang sutindih ring Dalem Cili kalih.Kalaning matandang jurit , nuli kasatan sarowang I Dewa Anggungan pamekas I Gusti Batan Jeruk angruwek ngamuk kadi singa kirang tatedan. Tandumade Ni Dewa Ayu Mas Sukaniya ari pinih alit kang Dalem Cili kalihan,ngemasin seda katebas bahun nyane ulih I Gusti Batan Jeruk. Dwaning rumasa kasatan digelis I Gusti Batan Jeruk malayu nyujur jagat Karangasem,nuli kabuntit wuri ulih I Gusti Manginte, Raris kapanggih ring jagat Bongaya nuli maruket matandang jurit saha I G usti Batan Jeruk ngemasin seda. Punika taler I Gusti Jelantik Tohjiwa kasor kaprajaya ulih I Gusti Panatih. Munggwing I Dewa Anggungan lan I Gusti Pande Base,digelis raris ngandap kasor nunas urip. Punika awinan I Dewa Anggungan ka ampeh wit tunggil Aji ulih catur sametone,kandugi matilar sakeng Takmung jumenek ring jagat Jungut Batu Nusa Panida.Tiyos punika malih metu biyuta rugada Kryana Pande Base saha sakulagotrannyane puputan tindih bela pati magutin kula wadwa Dalem Bekung.Jalaran yudane mawiwit sakeng Ni Ayu Samantiga rabi panawing Sira Dalem Bekung,anyolong semara lawan I Gusti Ngurah Tlabah. Indike punika raris Dalem Bekung ngesengin Gusti Pande Base mangda mademang Gusti Tlabah.Raris Gusti Pande Base ngutus Gusti Capung mangda ngepet patin Gusti Tlabah.Jeroning marikosa Gusti Capung katampih ulih Ki Bendega. Jeroning matandang yuda Ki Bendega lawan Ngurah Tlabah pada ngemasin lampus.Duwaning wus prasida nglakonin titah,raris Gusti Capung gagesonan ayat nyadokang kamolihan ring payudan majeng Gusti Pande Base. Rawuh ring pamedal puri Gusti Pande Base tan pajamuga Dane Capung karebut kasedayang ulih para pagebag purin Gusti Pande Base.Wicarane punika kapiragi ulih Gusti Kanca sameton Dane Tlabah.Nuli digelis Dane Kanca matur uning majeng Dalem Bekung.,saha mapinunas mangde Gusti Pande Base kapidanda mati.Munggwing gatra pasadok Dane Kanca rawuh ring Dane Pande Base.Punika awanan sakula gotran Dane Pande Base sutindih belapati agia puput ring payudan.
Duwaning kadi punika pakibeh jagate ,nuli Dalem Bekung kesah matilar sakeng Gelgel nyujur Desa Prasi lantur Tulamben saha pinih untat jumenek ring Sidemen Karangasem.
Sapatilar Dalem Bekung,umadeg Sira Sri Dalem Sigening nyakrawerti ring Gelgel. Jeroning mikukuhang ajeg kodag kuasa sajebag Bali, Sira Dalem ngalimbakang wiwekanaya wiwaha,majalaran antuk ngalap kwehing rabi mawiwit sakeng makudang – kudang pradesa. Munggwing para putra sane embas ring jeroan puri kadaton minakadi; Dewa Anom Pamayun, Dalem Di Made ,Dewa Ayu Rani Guang , nika putra mijil sakeng rabi prami. Putra mijil sakeng rabi panawing maparab ; Dewa Karangasem, Dewa Cawu , Dewa Blayu . Dewa Kabetan , Dewa Sumerta , Dewa Pameregan , Dewa Lebah ,Dewa Sidan , Dewa Pasawatan, Dewa Kulit , Dewa Bedulu lan Dewa Kerambitan. Putra embas ring jaba puri kadaton Dewa Anom Kuning utawi I Dewa Manggis ,Gusti Panji Sakti , Gusti Mambal Sakti.
Kawuwus I Dewa Kabetan wit ibu panawing sakeng jagat Kabetan, kantun Rare Cili sampun umadeg pacek Dalem aneng Kabetan jagat pamijilan Sang ibu, saha kapariwara olih Sang ibu lawan Kakyang Ida sakeng wadu. Risampune duwur punang Rare Cili nuli awidhiwidana kerab kambe tur maduwe putra tigang diri mapesengan ; I Dewa Gede Sekar , I Dewa Gede Oka muwah I Dewa Gede Sana. Raris kanjek warsa Isaka 1557 ,I Dewa Kabetan abiseka madeg Anglurah ngawa wenang jagat Kabetan.
Duwaning yusan I Dewa Kabetan nyangsan werdatama ,raris ajeg Anglurah Kabetan kasukserah ring putra kadarma putra kadi Ida I Dewa Gede Oka, ngentosin linggih Dane Aji.
Kabaos mangkin I Dewa Gede Oka wus alaki – rabi , mijil putra tigang diri maparab ; I Dewa Gede Lakes , I Dewa Gede Tukrukan , pinih untat Ni Dewa Ayu Munang. Duk sapamadeg I Dewa Gede Oka manggeh Anglurah Kabetan ,rawuh pangendaning kali yoga , rikalaning para putran Ida I Dewa Gede Oka kantun alit – alit , wiyakti wetu rundah sangkaning durat maka sakeng panegara Den Bukit utawi Buleleng , tang pangulu I Gusti Panji Sakti , tan sah bala sikep nyane sergep sarwa senjata masandekan ring tepining Alas Bengkel , baleran Panegara Kabetan. Kanjekan tengah latri Dane I Gusti Panji Sakti ngregep nunggalang bayu , sabda , idep, ma serana antuk toya a cangkir ngincepang japa mantra . Wus punika nuli saksana ngablesang toyan cangkire marep menek ka langit . Duk punika ,baber ! tanpajamuga metu gulem peteng dedet , ngemu sabeh ageng , tumuli nadak sara tedun sabeh bales tan kadi – kadi ,maduluran tatit kelep kerug mawastu metu blabar agung , tan bina sakadi ombak segara magulung – gulungan ngalancah batu kaang tepi sisi segara , mawinan prasida nganyudang sahananing taru utawi batu sane mageng – mageng . Asing ka tempuh ambah toyan blabar , makada sami buwut lepug kandugi sa lantang embahan belabare manados embahan tukad . Belabare ma embah ngatebenan nyujur panegara Desa Beng ( Bengkel ) , agia nuwek marbar purin I Dewa Manggis Kuning praya ngalebok nganyudang puri Beng . Munggwing tuwas kayun Dane I Gusti Panji Sakti ngagen pacang mintonin kawisesan keris pajenengan I Dewa Manggis Kuning sane ka sumbung sidi mahen, siket mawisesa .
Menggah ri kawentenan Puri Beng kalaning galah tengah latri duk punika , wenten cihna maka sinah ipun , minakadi keris pajenengan padruweyan I Dewa Manggis Kuning , barber ngredek osah ring genah nyane , jantos I Dewa Manggis kagiyat matangi seraya ma cecingak ka tengah gedong panyimpenan pajenengan . Kagawok I Dewa Manggis ngaksi kawentenan kerise , tumuli sahasa ka ambil pusaka punika sakeng genah nyane maduluran kayune sadah runtag saha was – was pisan Ida ngambil . Risampune ka gambel pusaka duwene punika , jeg ! pramangkin I Dewa Manggis Kuning sakadi wong katapak utawi wong kalinggihan , gagesonan medal rawuh ring natar puri . Sarawuhe ring natar puri , I Dewa Manggis Kuning ngadeg majeng kaler sinambi ngagemang muncuk kerise , nujuh sakeng kiwa ka tengen . Maka suksmannyane belabare prasida ma impas embahannyane ngalintang sa dangin Puri Beng . Punika awinannyane rawuh mangkin embahan toyane punika manados tukad sane kawastanin TUKAD CANGKIR .
Antuk erang kayune I Dewa Manggis Kuning raris benjang semengane palimunan pisan Ida I Dewa Manggis nyilib mamargi praragayan a ngrangsuk busana wong tani pacul ,nyaru – nyaru sakadi juru boros ngungsi Alas Bengkel , agia pacang neliktanemin buat maritatas kasujatian ipun I Duratmaka .Sarawuhe ring telenging alas Bengkel , nuli I Dewa Manggis Juru Boros mapi – mapi munduhang carang – carang kayu tuh , solahe sakadi wong risedek nuduk sa ang . Rikala punika sida tatas sinah antuk I Dewa Manggis munggwing kawentenan I Duratmaka nyadia ma idep satru , wiyakti noro lian wantah I Gusti Panji Sakti saha bala juritnyane sahasa nunjelin pondok – pondok reranggon pasayuban I Wong tani abian . Punika taler gajah palinggihan I Gusti Panji Sakti ngusak – asik ngrugada , neda sahananing pa abianan sane wenten ring tepining Alas Bengkel , kantos pa abianane sami buwut lidek duwaning ingsak gajah ageng .
Sampun tatas pedas ring kasujatian mesehe , nuli raris I Dewa Manggis mawali budal . Ri sajeroning mamargi budal , sarawuhe ring panegara Desa Kabetan , pragata nadak sara kayun I Dewa Manggis Kuning simpang ka Puri Kabetan ,yun masadu ajeng lawan sameton kwalon Ida , sane ngawawa jagat Kabetan , kang upasadnya I Dewa Kabetan saha para putra .
Biana matetengeran , barber ngeranjing I Dewa Manggis Kuning ka Puri Kraton Kabetan . Wus rawuh ring natar Puri , Ida I Dewa Manggis ka sambra dening asu ka kalih , saha nujah – nujah ngongkong ngeres – eresin . Rikanjekan punika I Dewa Kabetan sedek masirep – sirepan ring Bale Semanggen , gumanti ngempahang lesu kayune . Sa antukan asu duwene ngongkong nujah – nujah ,raris mapajar I Dewa Kabetan sakeng pasirepan sadah banban lesu ;” Ceek…..! ceek………!! Nyen to ? mai negak malu menekan !” Sapunika panikan I Dewa Kabetan , nanging kantun uwad – uwad ring Pasirepan. Sangkaning kadi punika kawentenane , raris I Dewa Manggis masawur nimbal ;” Behh… uli di pasarean I Dewa Kabetan matur,” sinambi Ida mawali ngajabayang sada gageson gagancangan munggwing pamargine sawireh ngarepang mangdene digelis rawuh ring Puri Beng . Inggihan I Dewa Kabetan kagyat kayune miragi baos Sang a prapta ,sakadi jabag antuka ma baos , mawinan I Dewa Kabetan ngadebras ngarenjit matangi , gagesonan nyagjagin Sang a prata , acepe jaga mapag nyanggra . Wireh Sang a simpang tan wenten kari ring natare , nuli digelis murdeng jagat Kabetan ngetut wuri pamargin Sang a simpang rawuh ring pamedal Puri . Sakeng pamedal Puri katon antuk Ida munggwing anggan Sang a simpang sampun doh sakeng jaba Puri Kabetan , nanging makanten pamargin ipun gagancangan pisan sareng a diri. Duwaning sampun kasep panyanggrane , dados makayun – kayun I Dewa Kabetan ri angen , buat narka kasinahan Sang a prapta . Kadi rasa ring kayun , munggwing wong a simpang boya sinalih tunggil panjak Kabetan utawi boya pangabih Puri . Manawita Sang a rawuh punika Sang a ngawa rat , duwaning kadi purun cebur baose sada jabag mamunyi ;” Beeh…..uli di pasarean “ . Samaliha cebur baose kadi sugal nyambat ;” I Dewa Kabetan matur” . Indike punika ngawinang kayun pangwawa jagat Kabetan renyuh osek , kadi rasa telas pawilangan tuwas angen Ida .
Sampun sanja surup surya rawuh para putran Ida murdeng jagat Kabetan , saha matur uning munggwing gatra sane kapiragi sakeng para a nuwenang tegal pa abian ring tepining alas Bengkel anane ri pasisi kaler Jagat Kabetan . Kenginan gatra punika , nganining duk rahina tengah latri sane di ibi sande , nadak sara tedun sabeh ageng kantos wetu belabar mageng , gumanti kasinahan punika wantah pakardin ka wiyadnyanan I Gusti Panji Sakti murdaning jagat Buleleng , saha bala juritnyane pada sahasa saksana nunjelin pondok – pondok re ranggon pa abianan sane wenten ring tepi kaler jagat Kabetan utawi tepining alas Bengkel . Miragi gatra ka pidarta punika ,manggeh kayun Ida I Dewa Kabetan marepe ring Sang arsa simpang punika , nora liyan , sinah I Dewa Manggis Kuning . Uleng kayun jeroning panarka , manawita I Dewa Manggis rawuh sakeng neliktanemin matitis ngintip kasinahan kawentenan wong a ngusak –asik alas Bengkel . Risampune tatas sinah ,sajeroning margi pawalinnyane , raris I Dewa Manggis ledang arsa simpang ka Puri Kraton Kabetan . Kalaning ngarungu gatra babaosan para putra Kabetan punika , raris I Dewa Kabetan nyadokang majeng para putran Idane indik Sang a prapta ring puri Kabetan . Durung polih kasanggra ,riyinan Sang a prapta wus mawali ngajabayang , kemawon sampun ka sapa sakeng pakoleman . Wenten pajar Sang a simpang kadi sambat ;” Beeh…..! uli di pasarean I Dewa Kabetan matur “ , seraya Sang a simpang digelis mawantun . Nah …. Pamekasne jani ….sapari indikan ento patut pineh – pinehin ….. apa mirib buat tatuwek kayun I Dewa Manggis Kuning barber tanpajamuga arsa simpang ka Puri Kabetan ?” Kadi punika pi orah I Dewa Kabetan ring para putra . Maka sami putran Idane meneng tan pa ucap ,dening nenten ka kayun antuka narka sasuduk wicarane . Punika awanan wengine kala punika I Dewa Kabetan ngawetenang peparuman pragata pisan nadak sara ring Puri Kabetan . Sane sareng parum wengine punika , para putra sami kalawan para pangabih Puri , wit Arya Pameregan . Maka unteng peparumane wantah a siki , inggihan sapari indikan rawuh simpang I Dewa Manggis Kuning .
Jeroning ma gendu wirasa ring paparuman duk punika , maka pucuk daging babaos sane kasungkemin pamekas ipun :
1 . Narka nganinin pa buat ri tuwas kayun I Dewa Manggis Kuning , janten Ida rumasa bendu duhkita turmaning nuwekang pangwawa jagat Kabeten ,arsa mamurug magutin kawisesan murdaning jagat Beng , malarapan antuk ngarereh sawitra kanti panampih ring I Gusti Panji Sakti murdeng jagat Den Bukit . Kasinahannyane niscaya murdeng jagat Beng pacang madaduwun jaga ngarejek panegara Desa Kabetan .
2. Ri uleng idep pangwawa jagat Kabetan ,nora wenten arsan Ida pacang ngalimbakang kodag wawidangan malarapan antuk matandang yuda marebutin kodag kuasa pangwawa jagat tityosan .
3. Tahen Ida pangwawa jagat Kabetan duwaning Sang kalihan punika , inggihan I Dewa Manggis miwah I Gusti Panji Sakti , marepe lawan anggan Ida I Dewa Kabetan , gumanti kantun ma wiwit rah a bungbung .
4. Maka unteng pamekas bebaosan gendu wirasa sane kasungkemin duk punika , nora lian wantah “ ngedoh “ sakeng rundah wicara Sang kalih murdeng jagat punika , wiyakti Beng kalawan Buleleng.
5. Samaliha bala jurit Beng utawi Buleleng , banget pisan akwehan yan saihang ring bala jurit Kabetan .
6. Munggwing cutet pamuput baose sane kasungkemin , mabuat praya sigra matilar sakeng jagat Kabetan , sawireh kawentenan jagate sampun nenten degdeg , utawi wus kinamengin baya rundah .
7. Munggwing galah matilare , nenten malih ngulati da dawuhan padewasan . Pastikan nyane rahina benjang palimunan pisan mangdene sampun pada sergep agia ma margi matilar .
8. Nganinin pamargi matilare , ka epah dados kalih roob paguyub , saha sowang – sowang roob paguyub patilar , pada tiyos ambah pamargi . Tatuwek nyane , pradene wadwa Beng pacang ngetut nguber palayu patilar warga Puri Kabetan , sinah prasida ngawetuang marma pinarka ring wiwekan ipu I Satru .
Riantukan sampun tiling bantang bebaose , raris benjang semengane nemonin rahina Buda – Wage – Merakih sasih ka lima warsa 1652 Isaka , palimunan pisan roob paguyub patilar Puri Kabetan sampun pada sergep agia matilar kesah sakeng panegara Desa Kabetan , jangkep ba bekelan brana daging lebeng – matah miwah pusaka pajenengan padruwean nyane .
Napak rahina bejange punika Buda Wage Merakih , manawita dereng doh pamargin matilar ka kalih roob paguyub Kabetan punika , wiyakti rawuh bala yuda Beng e , sane mawasta “ Dulang Mangap Penamun “ sergep sarwa senjata mawisesa , maka senopati I Gede Mranggidana , saha kang pangulu yuda kadi Ida I Dewa Manggis Kuning ngawawa pusaka pajenengan angaran “ Tumbak Ki Baru Alis “ pica sakeng Pura Gunung Jimbar . Turmaning rahina semeng duk punika sampun nincap wates tepisiring kelod wawidangan jagat Kabetan , praya magutin ka wisesan I Gusti Panji Sakti . Sapangrawuh bala yuda Beng riwates wawidangan jagat Kabetan , tan ka rengwang olih roob paguyub Kabetan ,nuli pararude nyangsan gagancangan pamargine matilar .
Mungwing ambah pamargi matilare sampun pada nyungkem semaya minakadi ; roob paguyub kaping siki inggihan Ida I Dewa Kabetan panglingsir ka abih olih putran Ida , kang sinami I Dewa Gede Sekar saha putra – putrane sami , lan ka iring para panyeroan miwah parekan , lawan para pengabih puri sane kantun sutindih bakti majeng kula warga sameton puri Kabetan . Indik lampah ambah pamargi kesahe , nyoloh beneng kangin nedunin tukad Cangkir nuli ngamunggahang kapanggih Desa Ngenjung pamargine ngalerang ring jagat Seloli lantur rawuh ring Desa Bangunlemah raris nyujur Desa Srokadan agia ngungsi wawidangan panegara Den Bukit.
Nanging roob paguyub ka ping kalih , sayuwakti I Dewa Gede Oka muwang putra – putran Ida sane kantun alit – alit wimuda , saha kasarengin taler olih arin Ida sane kantun anom jejaka utawi taruna bunga , mapesengan I Dewa Gede Sana , lan ka iring olih limang kuren pangabih tosning Arya Pameregan, rawuhing kula gotran nyane sowang – sowang .
Pamargi roob paguyub ka ping kalih puniki , nyunut beneng kawuh , nyemah nedunin Tukad Pakerisan , raris ngamunggahang rawuh ring wawidangan bangket utawi tanah tegalan sane kawentenan nyane marupa beet , kwehing punyan langsat . Riantukan akweh mentik punyan langsat , tan bina kadi alas langsat , awanan genahe punika kabaosang Tegal punyan Langsat . Dados ka suwen – suwen loktah kojaran Tegal Langsat , raris rawuh mangkin mawasta Tegalsaat . Sakeng Tegalsaat lampahe nyujur beneng kelod ngalintangin Desa Pasalakan prapta ring Desa Sawa Gunung , raris ngalantur pamargine ngawanang ngalintangin Desa Pagepokan saha ngambahin margi a nylongnyongan beneng kaler nyisir sisin Tukad Tabu , nuli nyemah tukad raris ngamunggahan rawuh ring Desa Cagaan nyoloh beneng kawuh tedun ring Tukad Singa . Irika ring tukad Singa warga roob paguyube masandekan sinambi pada masiram ring toyan pancoran sane dahat ening toyannyane . Wusan masiram sami pada ngagah takilan lawut magibungan sinarengan lawan kula gotran nyane sowang – sowang . Sampun pada waneh , raris malinggih – linggihan duwur batu parangane sane wenten di sisin Tukade . Kanjekan punika molih galah ma babawosan marerembugan , buat uleng kayune , munggwing pamargi sa lantur nyane , maka pamekas panegara Desa sane jaga ka ungsi . Sajeroning bebaosan madarma tula rarembugan duk punika I Dewa Gede Oka sareng para pangiring pangabih Ida maka limang kuren . Wus puput nemu gelang munggwing pamekas unteng panyungkem baos minakadi ;
1. Riantuk okan Ida I Dewa Gede Oka maka tatiga kantun alit – alit cili wimuda , janten nenten pacang prasida antuka ngalanturang pamargi .
2. Manut gatra kapiarsa , inggihan Kraton Puri Soma Negara ring jagat Pejeng , kajantenan nyane kasinengguh anyar . Tuwasing pinarka ,manawita Palungguh Dalem murdeng jagat Pejeng , welas asih ngeton roob pararudan wong Kabetan , kandugi Palungguh Dalem ledang arsa nyayubang roob pararudan sakeng Kabetan . Sor pinunase gugon tuwon nyadia parek tangkil yun nyaraka majeng pangwawa Jagat Pejeng . Napi malih risampune kapidarten sapari undukan jalaran kesah matilar sakeng jagat Kabetan , mogi – mogi Ida Dalem asung lugraha .
3. Mangen- angen Ida I Dewa Gede Oka buat wicara sane nibenin sakula warga I Dewa Kabetan turmaning pinaka jalaran matilare sakeng jagat Kabetan, gumanti mawiwit sangkaning ujar para ; “ Beeh …… uli di pasarean I Dewa Kabetan Matur “. Raris pajare punika gumentos matemahan pala wisya laraning urip.
4. Pinaka pangeling – eling kayun, kayang kawekas , raris kategesang baos “ PASAREAN “ puniki kamanggehang maka pungkusan pangweweh parab , lantur maring parab para warih I Dewa Kabetan Panglingsir , kang utamin nyane maring parab para putra sane kasinanggeh raja putra utawi putra pa nyilih di i .
Ngawit rahina punika upasadnya I Dewa Gede Oka kinuntating antuk ujar “ PASAREAN “ .Salantur nyane ucapan PASAREAN kinujaran sala kaprah manados ujar PESARE , lantur wekas ka nyiuti lingga sandi manados ucape “ BESAR” . Kasinahan nyane pesengan I Dewa Gede Oka manados I Dewa Gede Oka Besar , rawuhing putran Ida kang sinengguh panyilih di i , kawenangan nganggen pukusan BESAR . Akadi punika daging unteng bebaos parerembugan pabigbagan ring Tukad Singa .
Duwaning sampun nyubal buat bebaosane ,nuli raris makinkinan pacang ngalanturang pamargi anut ring unteng baos kasungkemin .
Kocapan pamargin roob paguyub I Dewa Gede Oka Besar tan sah putran Idane maka tatiga , nyujur beneng kelod ngalintangin Desa Padapdapan rawuh ring bencingah Puri Kraton Soma Negara Pejeng .
Sarawuhe ring bencingah Puri Soma Negara nuli raris I Dewa Gede Oka Besar nganampeking pacalang sane magebag ring Pamedal Puri saraya nuwek masadok matur uning buat sapangrawuh Ida ma iringan sarowang paguyuban sakeng panegara Kabetan , riantuk pikedeh uleng idepe praya pedek tangkil majeng palungguh Dalem pangodag a ngwawa jagat Pejeng .
Risampune sinah antuka Sang Pacalang munggwing pabuatkayun I Dewa Gede Oka Besar raris sinalih tunggil Pacalang a ngateh I Dewa Gede Oka Besar Kabetan ngaranjing ka Puri rawuh ring Bale Paseban . Sawatara a papakan base , kancit medal Palungguh Dalem kang puspata I Dewa Agung Gede Pamayun Putra ka iring putra kang araja putra ma upasadnya I Dewa Agung Putu Pamayun Bukit agia masadu ajeng lawan I Dewa Gede Oka Besar saha rowang paguyuban nyane sami . Sampun pada malinggih punang Dalem Pamayun maka kalih ring patani ka agungan ri paseban, nuli ngariyinin I Dewa Gede Oka Besar nuhun matur maduluran sembah panganjali dahat pranamia pisan. Babaose ngawit jeroning nyinahang anggan dane Paguyub sakeng Kabetan rawuhing tatuwek kayun roob Pararudan Kabetan pragata pedek tangkil ri ajeng Palungguh Dalem , gumentos awanan kesahe sakeng Puri Kabetan . Sapari indik pikobet kayun I Dewa Gede Oka Besar sane alamin Ida ring Kabetan maka sami kapidartayang jantos galang a padang, . Jeroning babaos pamungu atur, pamekas unteng babaosane sampun sinah antuka palungguh Dalem , mawastu rumasa gargita kayune miarsa munggwing sapangrawuh paguyub Kabetan tur ngandika , nganikayang dahat ledang arsa nglugraha sa rowang paguyub Kabetan jumenek ring wawengkon jagat Pejeng agia sareng – sareng nabdab panjake ri wawengkon Pejeng , gumanti buat ngabih linggih Palungguh Dalem murdaning jagat Pejeng . Saha Palungguh Dalem maosang indik kawentenan kawit para laluhur Palungguh Dalem lawan laluhur I Dewa Gede Oka Besar , sayuwakti tunggil , inggihan punika wit Betara Kawitan Sri Dalem Sigening . Kadadosane Dalem Di Made pernah Kakyang Palungguh Dalem Pejeng kantun sameton kwalon lawan I Dewa Kabetan pernah Aji Agung I Dewa Gede Oka Besar . Antuk gatra pidartan I Dewa Gede Oka Besar punika sane nyihnayang buat rahat kobet kayun warih Kabetan. Malarapan gatra kesahe sakeng jagat Kabetan punika maka awinan metu eling ri tuwas kayun Palungguh Dalem Pejeng , munggwing kesah palayun Ida Dalem Di Made sareng putran Ida kalih duke nguni , kantun alit – alit sareng matilar sakeng Puri Kraton Gelgel , nyujur genah pasinutan jantos jenek ring wawengkon jagat Guliang , riantukan purine karejek olih I Gusti Agung Maruti . Indike punika sane banget ngawetuang kayun Palungguh Dalem Pejeng rasa kangen ngeton para putran I Dewa Gede Oka Kabetan kantun alit –alit taler katiben lara sane katandang olih para lingsir nyane ring Kabetan . Punika raris Palungguh Dalem Pejeng ngandika ring warih Kabetan; “ Bapa ……. ( asapunika pajar Palungguh Dalem ngesengin I Dewa Gede Oka Besar ), suba sinah baan Gelah ngayunin atur pidartan Bapane , janten suba panglingsir iragane tunggal . Dening buka keto , mirib tuara ja pelih Gelah pacang nyayutang anake buka Bapa kayang pianak Bapane makejang . Nah ….. keto masih Bapa tuara ja pelih pradene bareng – bareng dini nabdab panjak , buat ngabih linggih ka Agungan Gelahe di Soma Negara .
Asapunika daging panikan Palungguh Dalem Pejeng , kapatutang olih putran Ida kang kadarma putra , nuli raris I Dewa Gede Oka Besar matur nimbal ;” Inggih Ratu Palungguh Dalem sasuwunan tityang , waluya kasiratin tirta amerta sanjiwani ri angga sariran tityange wus miragi tel wecanan Palungguh Dalem , mawastu dahat gargita ri tuwas manah tityang maduluran rasa angayu bagia pisan . Tityang sareng pakilit paguyube sami , wantah sida matur ….. suksma dahating suksmaning manah antuk suweca asung sih Palungguh Dalem ring sikian tityang rawuhing sa rowang tityang sami .Ngawit mangkin tityang nyadia nyiwi majeng Palungguh Dalem , ngugon tuwonin sakadi tel bisama . Sampun nuwek ri angen tityang antuk suweca asung Palungguh Dalem , pacang prasida nyambung urip kula warga sarowang paguyub pararudan sakeng Kabetan . Ainggih munggwing kadi sapari indikan punika sami …. ledangang pisan …. lugrayang tityang “ m a s o b e “ majeng palungguh Dalem ; sajeroning Palungguh Dalem ngodag ngawawa jagat Soma Negara , tityang rawuhing perti sentanan tityang matitis sutindih bakti nyungsung nyiwi sapari titah Palungguh Dalem , saha leket mabela pati … parek lana munggwing kukuh ajeg pangodag Palungguh Dalem kayang ka pungkur wekas .
Mireng atur pasobe I Dewa Gede Oka Besar punika dahat tatuwian pisan, metu arsan Dalem Pejeng nulus ngugonin atur I Dewa Gede Oka Besar sinambi ngaruntuhang wecana ; “ Uduh … Bapa ….. subayan Bapane buat pesan agia gambel Gelah satmaka paneduh kayun Gelahe . Adane anake buka Bapa , mula tuwah mawiwit getih a bungbung ajak Gelah . Nah ….. uli jani Bapa manggehang Gelah pinaka pangabih werda buat gumana nabengin linggih ka agungan Gelahe dini di Soma Negara , turmaning pinaka uluning pangabih pakandel Gelah ane suba manggeh minakadi kula warga Dewa Ngakan Kanca , Dewa Pasalakan muah Dewa Ngakan ane len – lenan , ane pada mawiwit uli di sameton Satrya Taman Bali . Lenan teken ento ada masi kula warga Dewa Ngakan Gedong Arta , Dewa Undisan lan Dewa Pekandelan ane pada mawiwit uli sameton Samprangan tosning I Dewa Tegal Besung , saha pengabih kula warga I Dewa Pamayun tosning warih Tabe Pakulun Dalem Watur Enggong lawan rabi panawing tosning Kiyai Ularan lan I Dewa Budi taler warih Dalem Watur Enggong lawan rabi penawing gumanti putran I Dewa Pering Satrya Taman Bali sane jenek ring jagat Nyalian ane patuh paturu mawiwit uli di Puri Gelgel nguni . Tuwah ento ya makejang patuh uli wit getih a bungbung . Keto nyin mangdene Bapa tatas kawiyaktiane . Nah … ne jani rawuh malih Bapa pinih untat teka mai pedek tangkil mawiwit sakeng warih I Dewa Kabetan tosning Sri Dalem Sigening , patuh Kawitan ajak Gelah . Buka jani … Bapa satmaka ngawewehin pakandel pangabih Gelahe . Ajak amonto makejang para Satryane ane mikandelin linggih Gelahe dini di Pejeng . Munggwing amongan panyiwian utawi panyungsungan …. , sajabaning para pakandel ane suba molih duman among – amongan buat ngempon sinalih tunggil tegak Pura ane ada dini di Pejeng , sakarin onto mangdene dini di puri ngawantunin Gelah , gumanti bareng – bareng ngoreg nyungsung Mrajan Agung purine . Nah …. maka pamekas among – amongan Bapane maweweh buin a matra buat ngraksa nureksain wates – wates wawidangan kodag Puri Soma Negara ane ada di tepisiring Lor maka wates wawengkon Pejeng lawan wawengkon Tampaksiring ,saha wates tepisiring Wayabiya ,maka wates wawengkon Pejeng lawan wawengkon Tegalalang muwang Ubud . Kasinahan nyane buat wawidangan amongan agem - ageman reraksaan Bapane minakadi ; Pradesa Belusung , Sembuwuk , Umahanyar ,Melayang – Bintangkuning , lan jangkep nyane pradesa Tarukan . Suksman nyane Gelah lascarya maparo pamuktian lawan Bapa. Unteng nyane Bapa nga mancanin pradesane nto makejang , gumana subakti nungkul marep Puri Soma Negara .
Munggwing pradesa Tarukan , yadiastun suba ada ane titah Gelah maka pangulu mawiwit uli tereh Sang Takmung ,ngaran Ampeh Aji ne kaloktah ujaranga Puaji ,nto ane lakar nyarengin Bapa buat ngarombo asing pidabdab Bapane . Dadine nto ane ajak Bapa ma adungan utawi magendu wirasa jeroning nabdab nureksain panjak miwah jagat . Sakadi punika runtuh pamutus bisaman Ida murdeng jagat Pejeng sah karenga olih karaja putra kadi Ida I Dewa Agung Putu Pamayun Bukit , duke miteketin I Dewa Gede Oka Besar . Riantuk daging pabigbag baose wus nyubal nemu gelang utawi sampun pada adung , tumuli raris sarowang paguyub pararudan Kabetan ngalungsur mapamit praya nyujur ngungsi genah linggih jenek sane wus manggeh kapituduh .
Pamargin I Dewa Gede Oka Besar ka iring olih sabahu paguyub Kabetan , nyoloh beneng kaler ngalintangin pradesa Pedapdapan nyujur genah sane kapituduh Dalem murdaning jagat Pejeng . Sajeroning pamargi I Dewa Gede Oka mababaosan lawan para pangabih Idane tosning Arya Pameregan , migbagang indik pradesa sane jaga kajujur ,pacang anggen genah jumenek anangun puri . Unteng pabigbage buat genah tegak linggih sane pantes pungus anggen genah linggih Sang Pinabeng Puri Soma Negara . Nganining genah sane kasungkemin ,wantah pradesa Tarukan . Pabuat sasuduke mangdene nampeking genah Puri Soma Negara, turmaning wekasan prasida digelis pedek tangkil miwah nampek sajeroning ngaturang ayah ka Puri Ulu, gumentos sida antar saluwiring urah – arih pasemayane muwang dreda baktine majeng Dalem Pamayun Pejeng. Tiyos punika taler mungpung soroh Ampeh Aji sane pacang anggen mitra kanti jeroning matimbang wirasa kalaning nabengin linggih Dalem Soma Negara , sampun lana jenek ring Tarukan pinaka pangulu Desa . Buat pangaptine mangda lulut asihe lawan ipun soroh Puaji , nyangsan leket pakilitan nyane sabahu nyaraka ka Puri Soma Negara .
Sawireh gelenge mababaosan … nenten rumasa lesune mamargi , kancit sampun nincap tepisiring pradesa Tarukan , nuli lantur masusupan ka telengin Desa Tarukan . Rawuh ring jaba Pura Puseh - Desa Bale Agung Tarukan , irika raris I Dewa Gede Oka Besar sareng para putran Idane masandekan ngicalang lusu . Munggwing maka lalima pangabih Idane wit Arya Pameregan , dane lantur sinarengan mapencar niri – niri masusupan macacingak ring sawawengkon Desa Tarukan , gumanti ngrereh lan milihin genah sane pantes pangus pacang winangun Puri Kraton Sang umanggeh tabeng wijang Puri Soma Negara .
Tan a suwe kaget sampun mawali maka limang diri pangabih punika , macunduk malih di jaba Pura Desa Bale Agung . Irika raris sabahu paguyube ma iguman , turmaning pa igume ane kasungkemin maka pamutus baos , inggihan tegak genah winangun purin I Dewa Gede Oka Besar yukti sa baler Pura Desa Bale Agung utawi ri luan Pura . Kawentenan tegak purine numbak lawang nyemah margi ageng lawan jejeran karang palemahan warga soroh Puaji ( Ampeh Aji ) .
Salanture duwaning sampun pastika munggwing genah tegak purine , taler risampune ngaturang caru pangruwak karang , digelis purine sida kapuputang jangkep tegak Saren , Rangki , Semanggen , tan sah tegak Merajan olih warga Pameregan antuk ngarojong ma gotong – royong . Wus puput raris Purine kawastanin “ PURI KRATON SATRYA KABETAN “ .
Pungkuran wenten malih rawuh sareng anangun Puri baleran Puri Kraton Kabetan selat panyengker karang sisi kaler , kengin sameton tosning I Dewa Undisan wit tosning Leluhur nyane ring Puri Kraton Samprangan . Magingsire sakeng pasah jenek lawan sameton tunggil Ida kang sinanggeh pangabih andel – andel Puri Soma Negara Pejeng , praya nyandingin pangabih anyar sakeng Kabetan , nuwonin titah sameton Idane pinaka tabeng wijang andel puri , wentene jenek malinggih ri kuloning Puri Kraton Pejeng .
Baosang risampune Puri Kraton Kabetan puput , wawu raris I Dewa Gede Oka Kabetan mikayunin buat pantes tegak karang palemahan Warga Pameregan anangun pakubon . Malarapan antuk atur pasadok Dane para pangabih Pameregan sami sane sampun molih nureksain ma cacingak kawentenan wawidangan Pradesa Tarukan , raris I Dewa Gede Oka Besar ngicenin epah – epahan karang palemahan anggen ipun tegak ngawangun pakubon nyane sowang – sowang manut kadi ring sor puniki ;
1 . A siki inggihan ipun , guru rupakan I Ketut Bintit, nangun pakubon baleran jejeran karang palemahan warga Ampeh Aji ( Puaji) ,mapisaga lawan soroh Puaji . Pungkur wekas ring tegak Sanggah nyane kawinangun Pura “ PANTI PAMEREGAN “ .
2 . Ping kalih inggihan ipun guru rupakan I Nyoman Dompolan nangun pakubon baler Pura Panti Pameregan selat tembok panyengker .
3 . Ping tiga inggihan ipun guru rupakan I Made Ringsun nangun pakubon baler lemah pakarangan I Nyoman Dompolan utawi mapisaga . Tatuwek nyane mangdene punika sami nampek turmaning prasida raket caluh ngiket sawitra kanti lawan soroh Ampeh Aji .
4. Kaping papat inggihan ipun guru rupakan I Wayan Minab nangun pakubon baler pura Griya muwang pura Panti Pasek Salahin ( pura Panti Sale ) , pengaptiane mangdene nyangsan leket caluh mitra kantine lawan soroh Pasek Salahin , awinan genahe nampeking lemah pakarangan soroh Pasek Salahin .
5. Kaping lima inggihan ipun guru rupakan I Wayan Berata nangun pakubon delod Pura Dalem Ketut utawi Pura Panataran Alit utawi Pura Nataran Ketut selat tembok panyengker, gumanti mangdene genahe nampeking genah soroh Ampeh Aji sane jenek baleran Pura Dalem Ketut selat pangkung utawi dangin Panti Ampeh Aji selat margi Agung . Tiyos ring punika sapisanan nampeking genah soroh Bali Age utawi soroh Bujangga Wisnawa utawi soroh Senggu , sane nyungsung Pura Panti Taman Sari .
Kenginan Pasek Salahin lan Pasek Bali Age gumanti panjak pangiring Dalem Tarukan duke nguni sawatara abad pat belas ( 14 ).
Peduman genah pangabih Pameregan punika pamekas unteng sasuduke ….. wekasan pradene wenten pabuat pacang ngigumang utawi magendu wirasa mangdene prasida digelis tur antar antuka nawuhin utawi ngarahin , niscaya sida antar labda karya sakancan pidabdab wiadin pakibeh pikobet sane matu wit wong durjana .
Risampune lintang makudang – kudang warsa ,… kadi ipun wargan Pan Berata rumasa dewek nyane ka – niri – ang genahe nunggil ma dohan lawan para nyaman – nyaman ipune . Punika awinan sinalih tunggil sentanan Pan Bintit inutus magingsir nganampeking nyaman ipun makadi sentanan Pan Berata , tur ngawangun pakubon delod Panti Ampeh Aji selat rurung .
Asapunika akweh nyane para soroh warga sane jumenek ring Pradesa Tarukan , duk kodag kuasa Puri Kraton Soma Negara sapamadeg I Dewa Agung Gede Pamayun Putra sareng putran Idane sane mawasta I Dewa Agung Putu Pamayun Bukit , saha pinaka tabeng wijang Puri inggihan Ida I Dewa Gede Oka Besar jumenek ring Tarukan
Baosang ring Puri Kraton Kabetan, manawita durung lintang a warsa I Dewa Gede Sana jumeneng ring Tarukan, raris Ida kesah sakeng Tarukan agia nyujur jagat Badung saha mapungu atur ring rakan Ida ,munggwing uleng kayun Ida I Dewa Gede Sana minakadi :
1. Ida I Dewa Gede Sana ngapti jagi ngaruruh kaweruhan majalaran ngumbang ngalu ,malajahang raga ngumbara Desa mungpung kantun anom jejaka utawi taruna bunga .
2 . Maduluran pasubaya ri pungkur wekas prade wenten kasadian tutug urip , pacang pisarat sida macunduk malih sareng pasametonan wentene ring jagat Tarukan. .. 3. Tiyos punika , duwaning I Dewa Gede Sana kantun meraga anom dereng ka iket olih gegamelan pasomahan a laki – rabi , janten nora wenten pa iketan dresta pakraman.
Kala punika nenten lali taler Ida I Dewa Gede Sana mahbahang tatuwek pamarginne , mangdene sameton Idane lascarya nglugraha sapamargin Idane , maduluran astawa stuti , mogi – mogi sami pada rahajeng labda karya sidaning don kayang kawekas . Margi sane pacang lakonin Ida wiyakti ; ngawanan sakeng jagat Tarukan , nyemah pamargi ring pasawahan carik subak Tubuh , nyujur jagat Banjar Sala , lantur tedun ngalitangin Tukad Petanu rawuh ring tenten pangadangan Peliatan utawi Banjar Ambengan . Pamargine nyojor beneng kawuh ngalintangin jagat Ubud manggihin Tukad Woos utawi Tukad Campuhan raris ngamunggahang rawuh ring jagat Panestianan nuli mamargi beneng kelod ngalintangin jagat Singakerta nincap jagat Tebongkang ,raris ngambah ngelodang ngalintangin Desa Kengetan nyujur Desa Singapadu , ngarepang ngulati ngungsi wawidangan panegara Badung maka untenging tatujon .
Salantur nyane kinucap risampune I Dewa Gede Oka Besar lana jenek malinggih ring Pradesa Tarukan tur kamanggehang “ MANCA “ Puri Soma Negara nuli Ida nelebang kadiyatmikan , saha Ida dahat jemet pageh ngalaksanayang rastiti bakti pamuspan maring genah Pura sane pinih kasuciang ring wawengkon jagat Tarukan , minakadi Pura Dalem Pamijilan , Ratu Balian , Dalem Setra , Dalem Ketut utawi Panataran Alit lan Pura Pucak utawi Pura Batan Ancak , utawi kaloktah kinujar Pura Kaja . Nyabran rahina rerainan suci utama makadi Purnama Tilem , Siwa Latri , Kajeng Kliwon , miwah rahina suci tiyosan , sayuwakti Ida nenten nahenin tempal buat rastiti baktine . Tiyos ring punika Ida I Dewa Gede Oka Besar taler oneng pisan miara paksi titiran , jantos akweh pisan maduwe titiran turmaning suksman ules paksine maka sami dahat utama .
Kanjekan rahina ayu , padewasan ngalunganin mapikat , kala punika Ida I Dewa Gede Oka Besar lunga mapikat paksi titiran . Palungan Idane ngaraga tan pairingan . Munggwing genahe mapikat ,irika ring telajakan Pura Kaja . Paksi titiran sane anggen Ida mapikat kategulang ring taru lempuyak soring punyan taru Ancak . Tan madoh sakeng taru genah guwungan paksi pikatan kategulang , wenten taler punyan taru Bingin mageng lan punyan taru Pole mageng tur tegeh punyan nyane ring samping taru bingine punika . Kadi Ida I Dewa Gede Oka Besar , nyantos pikatane ring margine, tan doh sakeng jaba Pura Batan Ancak . Sawatara a panginangan , kancit wenten paksi titiran brumbun matinggah ring guwungan paksi pamikate , sane sampun madaging engket antuk getah taru tehep . Sa antukan ngaksi guwungan mapikate sampun ngamolihang , tumuli gagesonan Ida I Dewa Gede Oka Besar nyagjagin nyujur genah pikatane agia ngambil paksi titiran brumbun punika . Sadurung titiran brumbun punika sida ka ambil , … barber tanpajamuga …. empak carang taru polene punika a carang mageng riantukan sampun lintang letuh tur ngetih. Kawentenan carang taru pole sane empak punika , yan saihang mageng nyane , manawi wenten saih punyan taru buah jebug . Carang taru pole letuh empak punika tambis – tambis nibenin duwur utawi prabun Ida I Dewa Gede Oka Besar . Punika awinan Ida kagyat tangkejut saha paksi titiran brumbun sane sampun kaleket antuk engket ring guwungan pikatan , prasida ipun keles sakeng engkete lantur makeber malayu antuk jerih nyane kadi kadamprat olih labuhan carang taru pole empak punika .
Munggwing I Dewa Gede Oka Besar sadah dawa angsengan angkihan Idane antuk makesyabe kaliwat . Nanging a ngayu bagia kayune ,wireh nenten katiben carang taru pole . Sada suwe I Dewa Gede Oka Besar bengong mategtegan sinambi metu kayune nyelsel riantuk paksine boya ka keniyang .
Sampun rumasa enteg kayun Idane , nuli raris guwungan titiran pikatan punika ka ambil saha taru pole letuh punika ka tikul baktana ka puri buat enggen saang . Sarawuhe ring purian , carang taru letuh punika kagenahang dangin Bale Semanggen utawi delod Mrajan . Kantos bulanan tarune punika , gumanti keser kelod – keser kaja dangin balene durung taler ka anggen saang , sakewanten carange sane malit – malit sampun ka anggen saang , duwaning dangan antuka ngelung – elung olih istri – istrine .
Nampeking rahina nemonin wali ring Mrajan , raris taru pole letuh punika ka kandik anggen saang olih pengayah warga Pameregan . Kinucap tarune sampun tambis telas ka kandik , wantah kantun a tugel bawak , yukti risedek ngandik tugelan kayu pinih untat punika, wenten cihna caciren umijil . Kala punika sedeng rain kandike ngarancap nunjeb ring sigaran taru pinih untat punika , tan pajamuga metu kagiyat mijil geni sakeng gatikan rain kandike lawan “ anu “ utawi barang sane durung janten ka uningin wenten ring tengahan taru sigar punika , kabenengan keni gatikan besin kandik , gumentos geni punika ngendih ngabar – abar prasida ngeseng telas puwun taru pinih untat punika dados awu . Tepengan punika I Kaki Pameregan sane ngandik tarune punika, sakeng makesyab nyane … barber nyerit “ ee…e…..ek ……aduhhh….!”.
Mireng jeritan I Kaki Meregan punika dahat santer keras , nuli gagesonan I Dewa Gede Oka Besar nyagjag nganampeking I Kaki ka dangin Bale Dangin , duwaning katarka batis nyane I Kaki keni kandik . Rawuh ring genah makandikan ka aksi olih Ida ,geni ngendih ngabar – abar ngeseng glontongan taru punika . Sawantara galah punika I Dewa Gede Oka Besar ngadeg bengong ngaksi genine ngeseng tarune jantos telas puwun . Ri angen Ida sakadi soleh rumasa , nembe mangkin rain kandik lawan taru pole sida ngawetuang geni jantos ngendih . Risampune geni punika udep , kadi angob Ida I Dewa Gede Oka ngantenang , dening wenten magelintik barang “ anu “ tan sida gineseng antuk geni , makanten tinglar ring tengahing awu bara . Raris gelintingan punika ka kutak – kutik antuk carang taru malit , madoh sakeng awu bara punika. Sada suwe gelintingan punika ka lingling ,raris sinah majanten gelintingan punika marupa besi berek amah barak , sawatara a lengkat dawan nyane , sakadi besi paku usuk utawi besi angker saka . Besi punika raris ka ambil tur ka apenin , minakadi berek barak nyane ka resikin jantos kedas nyalang . Risampune kedas nyalang , wawu sinah pastika makanten parupannyane besi punika , nora lian wantah marupa “ BESIN TUMBAK “ . Salantur nyane besin tumbak punika ka karyanin katik utawi dedanganan nyane antuk taru panggal buaya tur besin tumbake katekepin uantuk saung nyane, awinan makanten sakadi tungked Sang Maraga sampun ruyud. Sa antukan dawan danganan tumbake sawatara a pangadeg bahu , kapikanten tumbake sakadi tateken utawi tungked sane loktah katungkedang olih wong sampun werda bungkut grayut – grayut .
Wus punika kanjekan rahina padewasan dahat ma utama jeroning melaspas pasupati saluwiring senjata pusaka , sakancan wesi landep pinaka saselet gagemet , nemonin rahina Saniscara – Keliwon - Landep nemu Purnamaning Kapat , kala punika tumbak tateken padruwean I Dewa Gede Oka Besar sane anyar ka karyanin ka upakara yadnya saji pasupatian agung . Salantur nyane tumbak tateken punika sane anggen Ida gagemet saselet sadina – dina kalaning malelungan , tan bina kadi Dang Wiku makta tateken pananda kalaning mamargi .
Duwaning tumbak gagemet utawi tumbak pusaka punika ka keniyang sangkaning empakang taru pole sane prasida ngamedalang geni , mawinan raris tumbak tatekene punika kawastanin “ TUMBAK PUSAKA SAKTI K I P O L E G E N I “ .
Ngawit duk punika I Dewa Gede Oka Besar kalaning malelungan , Ki Pole Geni tan nahen pasah sakeng tangan Idane , gumanti anggen Ida tateken .
KACARITA mangkin kawentenan I Dewa Gede Oka Besar jumeneng ring Puri Kraton Kabetan Tarukan , sajeroning madeg “ manca “ linggihe ring jagat Tarukan manut sapituduh Dalem Pamayun Pejeng , kawuwus prasida degdeg trepti rahajeng antuk Ida nabdab panjak tan ana pakewuh muang pakrimik pajake , yadiastun ring jagat Tarukan sadina – dina nyangsan rumasa wetu caciren – caciren ulah polah sakadi rasa iri ati , kadi maboya munggwing warih I Dewa Kabetan wentene sareng jumenek ring Desa Tarukan .
Caciren ulah polah punika macihna sakeng “ pari solah sapra tingkah “ miwah “ ujar para - ujar para “ wong sane rumasa dewek nyane kasumbung pinaka pamucuk pangenter Jagat Tarukan . Anuting parisolah ujar para punika janten sinah karasa antuk warih Kabetan ,wantah wong iku mapeleh – peleh ngunggulang dewek ipun , kadi rasa ipun wong dahat pascat andel ring padewekan . Parisolah ujarparan ipune malarapan ngelarang winaya sandi , aji ugig miwah dusta raja pisuna . Yadiastun akadi punika , boya ngawinan rered kayun I Dewa Gede Oka Besar jeroning midabdabin panjak saha sutindih belapati ring swadarmaning Satrya . Indike punika boya dados kapiambeng antuk Ida Warih Satrya Kabetan .
Kanjekan duking massa – massa punika para putran Ida I Dewa Gede Oka Besar sampun pada anom prajaka , sakewanten sinalih tunggil putran Idane , kang puspata I Dewa Gede Lakes ngemasin newata kantun yusa anom jejaka utawi taruna bunga. Inggihan kadi Ni Dewa Ayu Munang dahat teleb ngelarang tuwas kayun brahmacari , utawi maraga kanya . Wantah I Dewa Gede Tukrukan Besar kemawon sane tutug ngalap rabi sakeng jagat Petak maparab Ni Desak Ketut Nyentok , turmaning sampun ngendahang putra petang diri minakadi;
1 . Kaping siki mapesengan Ni Dewa Ayu Putu Saplug Kanya , istri adegira embas sawatara warsa 1744 .
2. Kaping kalih maparab I Dewa Gede Made Sedan Besar ,lanang adegira embas sawatara warsa 1749 .
3. Kaping tiga upasadnya I Dewa Gede Nyoman Gemuh, taler lanang adegira embas sawatara warsa 1753 .
4 . Kaping empat mapungkusan I Dewa Gede Ketut Sengkor , janten lanang adegira embas sawatara warsa 1758 .
Nika sami para putra Puri Kraton Satrya Kabetan ring Tarukan . Pamekas risampune para putra inucap pada ngalap rabi turmaning sampun pada ngendahang pertisentana , kandugi duk massa punika wawidangan mandala Puri Kraton Satrya Kabetan ka epah manados tigang mandala utawi karang palemahan tegak puri , maka luwir ;
A . Palemahan karang SAREN kamanggehang tegak PURI PUSAT .
B . Palemahan karang RANGKI kamanggehang tegak PURI RANGKI .
C . Palemahan karang SEMANGGEN kamanggehang tegak PURI SEMANGGEN.
Duwaning Puri Kraton sampun ka epah dados tigang tegak pekarangan palemahan , punika awinan mangkin purine nenten kantun ka baosang Puri Kraton . Raris mangkin katiga Purine punika ka baos Puri Jajaran . Manut swadarmaning drestanikang warih Dalem kang angawa Rat minakadi , yaning para warih Dalem madeg Nata Murdaning Jagat , wenang para warih nyane kapungkusang I Dewa Agung . Bilih – bilih warih Dalem sane kamanggehang a mancaning Jagat , wenang para warih nyane kapungkusang I Dewa Gede turmaning tegak Purine wenang nganggo wawidangan mandala jangkep maka luwir ; tegak Saren , tegak Rangki , tegak Semanggen , Kuri Agung saha natar ancak saji lan wewangunan Bale Tegeh . Yaning para warih Dalem nora a ngawa Rat turmaning malinggih ring tegak Puri jajaran kapungkusang I Dewa Putu utawi boya ngangge “ Gede “ miwah “ Agung “ .
Awanan puri Kraton ka epah dados tiga , riantuk wentene putra lanang tatiga saha maka tiga tan arsa magingsir sakeng Puri Kraton . Risampune putra lanang maka tiga wus pada ngalap rabi turmaning sampun pada ngendahang kwehing sentana , raris Puri Kratone ka epah tiga sakadi sane panggih mangkin kawentenan nyane .
# Munggwing putra sane malinggih ring PURI SAREN utawi Puri Pusat , inggihan Ida I Dewa Gede Made Sedan Besar , wus alaki rabi lawan Ni Desak Putu Luhin sakeng Desa Sawa Gunung , ngendahang putra limang diri a ngaran ;
1 . Kaping siki I Dewa Gede Kompyang Besar , embas sawatara warsa 1798 .
2 . Kaping kalih I Dewa Gede Ketut Gesiuh , embas sawatara warsa 1806 .
3 . Kaping tiga I Dewa Gede Putu Raka , embas sawatara warsa 1810 .
4 . Kaping papat I Dewa Gede Made Badoh , embas sawatara warsa 1815 .
5 . Kaping lima Ni Dewa Ayu Nyoman Menuh, embas sawatara warsa 1819.
Risampune Ni Dewa Ayu Nyoman Menuh munggah anom listuayu , raris ka laki rabi lawan I Dewa Putu Jental sakeng Desa Dukuh Pejeng , saha pakerab kambene kalaksanayang ring Puri Pusat , kamanggehang “ NYENTANIN “ , yukti Sang maraga lanang kapinanggeh maraga istri , saha Sang maraga Istri kapinanggeh maraga lanang , ngodag jeroning pertisentanan nyane kayang riwekas ungkur . Salantur nyane Ni Dewa Ayu Nyoman Menuh lan rabine kapica tegak karang lan carik catu , mangdene magingsir sakeng Puri Pusat . Munggwing genah tegak puri ne kapica irika, ring bucu kaja kanginan Pura Desa Bale Agung Tarukan ,selat tembok panyengker Pura . Pungkuran purine kojaran PURI DUKUH . .
# Lantur munggwing putra sane malinggih ring Puri Rangki , inggihan Ida I Dewa Gede Nyoman Gemuh , kabaos sampun alaki rabi lawan Ni Desak Nyoman Kawi sakeng Desa Cagaan . Sada suwe parabian Sang Kalihan durung ngendahang sentana , nanging malarapan antuk ka pagehan kayun I Dewa Gede Nyoman Gemuh , nyabran latri pedek tangkil nakti rastiti ring pura Ukur – ukuran Sawa Gunung , pamuput rabine mandeg mobot tur ngendahang putra angaran ;
1 . Kaping siki I Dewa Putu Tunas Besar , mijil sawatara warsa 1840 .
2. Kaping kalih I Dewa Made Gambir , nangging Ida lebar yusa 13 tiban .
3 . Kaping tiga Ni Desak Njoman Anom , inalap rabi olih Anak Agung Gede Rai saking Br. Pande Pejeng , gumentos pungkur wekas putrane kojaran Anak Agung Gede Tarukan , tur disampune duwur okane punika,taler malih ngalap rabi ring Puri Dukuh Tarukan , raris loktah Ida kapungkusang Anak Agung Aji Guru .
4 . Kaping empat Ni Desak Ketut Geliling ka ambil rabi olih I Dewa Gede Kompyang Besar tabeng wijang Puri Soma Negara , sakeng Puri Pusat Tarukan .
5 . Kaping lima Ni Desak Nyoman Rati nanging Ida lebar wawu munggah anom
6 . Kaping nenem Ni Desak Made Rai Rakti inalap rabi olih I Dewa Agung Pamayun Guliang utawi Dalem Pamayun Putra kaping VI puri Soma Negara Pejeng, pinaka rabi panawing. Asapunika sami para warih Puri Rangki .
# Lantur malih baosang munggwing putra sane malinggih ring Puri Semanggen , inggihan kadi Ida I Dewa Gede Ketut Sengkor , sampun ngalap rabi kaping pisan sakeng jagat Melayang Pejeng Kaja mawasta Ni Desak Putu Anom . Munggwing tegak genah purine ring Melayang , delod Pura Merajan Agung rong lawang kaping kalih sakeng kaler dangin rurung .
Waluyane tegak genah Puri Semanggen punika , wit mandalaning Semanggen , wantah pinaka genah nyekeh layon . Awanan kadi punika , kalaning mabigbagan buat ngepah tegak Puri Kraton Satrya Kabetan , makadi Ida I Dewa Gede Ketut Sengkor boya kayun magenah ring Semanggen riantuk jerih kayune jenek malinggih ring genah nyekeh layon . Sangkaning pangerumrum para sametonne , turmaning tan purun tempal ring titah anake Lingsir , pamuput Ida ngiringang magenah ring Semanggen , sakewanten mangda madaging kadi pisarat kayun Idane ,sayuwakti mangda rakan Ida pinih duwur kang puspata Ni Dewa Ayu Putu Saplug Kanya ledang arsa nyarengin ngabih malinggih ring Puri Semanggen. Pakarsan I Dewa Gede Ketut Sengkor punika kadagingin olih Ajin Ida lan semitone sami , saha rakan Ida Kanya taler kenak nyarengin arine pinih alit , antuk sayange ring ari .
Wus pakerab kambe I Dewa Gede Ketut Sengkor lawan Ni Desak Putu Anom wenten embas putra petang diri ngaran ;
1 . Kaping siki I Dewa Putu Kandel embas sawatara warsa 1868 .
2 . Kaping kalih Ni Desak Made Kemul embas sawatara warsa 1872 inalap rabi olih I Dewa Made Rai sakeng Puri Batan Wani .
3 . Kaping tiga I Dewa Nyoman Suta embas sawatara warsa 1877 .
4 , Kaping papat I Dewa Ketut Cenikan embas sawatara warsa 1881
Tiyos ring rabi kaping pisan utawi rabi prami , taler I Dewa Gede Ketut Sengkor ngalap rabi kaping kalih utawi rabi penawing mawasta Ni Desak Made Rai , wantah wiyakti ari ipen Idane utawi ari tunggal guru rupaka lawan rabi prami Ni Desak Putu Anom , duwaning Ni Desak Made Rai gumana nginte utawi ngemban para putran rakan Idane ring Puri Semanggen . Kala punika Ida I Dewa Gede Ketut Sengkor lawan ipen Idane molih galah nemuang pitresnan jantos lantur akerab – kambe pinaka rabi kaping kalih utawi rabi panawing . Sakeng rabi penawing kadi Ni Desak Made Rai ngendahang putra kalih diri mapesengan ;
5 . Kaping siki I Dewa Made Kenting embas sawatara warsa 1883 .
6 . Kaping kalih Ni Desak Ketut Gendor embas sawatara warsa 1887 , inalap rabi olih I Dewa Made Badoh sakeng Puri Pusat tur wekasan maka pangawit Puri Pondok .
TATWA ANANGUN MERAJAN PASAMUAN . Kocap mangkin risampune para warih Puri Kraton Dewa Kabetan wus akweh pawilangan kula gotra pertisentanane ,riantuk sowang – sowang para putrane taler wus pada akweh ngendahang pertisentana , raris sawatara warsa 1844 Puri Kratone ka epah tigang tegak karang puri minakadi puri Pusat , Rangki lan Semanggen saha pada anangun merajan pakurenan. Samaliha para warih sowang - sowang epahan puri punika , wus pada ngalap rabi gumentos wenten sane magingsir anangun puri anyar maka luwir ; I Dewa Putu Raka puri Pusat magenah ring Puri Kajanan , I Dewa Made Badoh puri Pusat magenah ring Puri Pondok , warih I Dewa Gede Kompyang Besar puri Pusat magenah ring Puri Kawan , Ni Desak Putu Kompyang puri Rangki magenah ring Puri Sor Pura , I Dewa Nyoman Suwe puri Rangki magenah ring Puri Kanginan , I Dewa Nyoman Suta puri Semanggen magenah ring puri Parwa , I Dewa Made Kenting puri Semanggen magenah ring Puri Dauh Telabah . Asapunika kawentenan para putra tosning I Dewa Kabetan ring jagat Tarukan.
Rikanjekan duk warsa 1889 raris kawinangun Parhyangan Pasamuan Sameton Kabetan sareng – sareng lawan para warih Puri Batan Wani lan para warih Puri Dukuh . Parhyangan punika kabaos MERAJAN GEDE SAMETON KABETAN . Munggwing genah tegak mandala Marajan Gede inucap , ri selagan Puri Pusat lawan Puri Rangki . Nganining akweh panyiwi kanjek punika manawita wenten 12 ( roras ) kuren . Maka adeg ajeg pamangku kaping pisan ring Merajan Gede inggihan Ida I Dewa Gede Made Sedan Besar sakeng Puri Pusat . Salantur nyane panemon wali patirtan ring Merajan Gede nemonin rahina Buda – Keliwon – Pahang utawi Pegat Uwakan , duwaning duk rahina punika ngawit NASARIN Merajan punika. Bantang prabeya wewangunan muwang prabeya wali patirtan Merajan Gede , sami punika katangga olih maka tigang Puri maka luwir Puri Pusat , Rangki lan Semanggen . Maka pangayah utawi pangoreg karya , karojong olih para pangabih tatadan ngawit kesah sakeng Kabetan , inggihan ipun sakeng sakula gotra panyiwi Panti Pameregan , saha katampih olih para sameton Puri Batan Wani lan Puri Dukuh .
Wuwus lebar pamangku Merajan Gede kaping pisan , raris kagentosin olih I Dewa Nyoman Suwe sakeng Puri Kanginan wit bencahan Puri Rangki . Sawireh kawentenan para pertisentana Dewa Kabetan ring Tarukan sampun nyangsan akweh maweweh , tur wus pada mapakurenan utawi mapasomahan , raris wenten pasadok sakeng sinalih tunggil para warih tigang puri panangga prabeya . Sasuduk pasadoke munggwing tigang puri penangga prabeya ring Merajan Gede wus rumasa kobet utawi meweh antuka nangganing prabye inucap wantah sareng tigang puri kewanten . Napimalih kasinahan nyane sampun janten makweh endah pakurenan – pakurenan tur sampun pada maduwe karang lan telajakan genah makarya tani , saha sami punika sareng – sareng iring nyungsung ring Merajan Gede . Anuting ahab jagat kala punika kadi rasa nenten kantun pantes pangus prabeyane inucap katangga olih tigang puri kemawon . Pasadok punika manggeh kapatutang olih akwehing para sameton , raris ngawit sawatara warsa 1910 prabeya wewangunan lan prabeya wali patirtan ring Merajan Gede , katangga olih sowang – sowang kula warga sameton sane sampun alaki rabi utawi mapumahan ,rawuhing warga sameton Puri Batan Wani lan Puri Dukuh taler sumuyub lascarya nyarengin pinaka patedun ring Merajan Gede . Ngawit duk punika Merajan Gede Satrya Kabetan ka empon olih PATEDUN MAKSAN . Kweh patedun maksan duk punika wenten 12 ( roras ) kuren .
Lanturang bebaose makadi risampune Pemangku Merajan Gede sane kaping kalih lebar , raris kagentosin olih I Dewa Putu Tilem sakeng Puri Kawan wit bencahang Puri Pusat , pinaka Pamangku kaping tiga .
Maka mulaning midabdabin Merajan Gede , punang pinaka prawartaka utawi Kelihan kaping pisan , boya sangkaning kapilih utawi kajodi utawi kapaku sara , wiyakti Ida I Dewa Putu Tunas Besar sakeng Puri Rangki . Risampune Ida lebar , raris kagentosin olih putran Idane sane mawasta I Dewa Made Jaksa pinaka prawartaka kaping kalih .
Salantur nyane pinaka prawartaka kaping tiga , mawiwit sangkaning ka jodi utawi kapilih , wantah kadi Ida I Dewa Made Karya kang pangawit winangun Puri Duwur Pangkung ,saha ka abih olih I Dewa Putu Kalik pinaka patajuh ngangkep juru raksa ,sakeng Puri Semanggen . Duk punika kojaran “ prawartaka “ sampun magentos kojaran , manados kojaran “Kelihan Maksan” . Salantur nyane I Dewa Made Karya kagentosin olih I Dewa Ketut Diran sakeng Puri Kanginan , munggwing pengabih Kelihan kantun I Dewa Putu Kalik .
TIYOS KACARITA I Dewa Gede Sana warih Dewa Kabetan kengin jumenek ring Banjar Bun – Badung ,gumanti sampun ngedahang perti sentana. Duk punika jagat Bun kawawa olih I Gusti Made Bija Bun tosning Arya Wang Bang Pinatih. Kanjek kalaning jagat Bun karejek kalurug olih Nateng Mengwi kang apasih I Gusti Agung Made Alangkajeng duwaning mabuat pacang ngawalesang sedan pernah putra sane maparab I Gusti Agung Putu Mayun Munggu , samaliha layone kantun kasepel ring puri Bun. Jeroning matandang yuda wadwa Mengwi lawan wadwa Bun, tan sah para warih Dewa Gede Sana sareng bela pati matandang jurit melanin panegara Bun. Kabaos nuli kasatan wadwa Bun ne , sinamabi katunjel puun akwehing palemahan wargane ring Br. Bun. Sakewnten I Gusti Made Bija Bun saha kulawargane sami polih masinutan, tur malayu nyujur jagat Tainsiat – Badung, raris jumemek ring Tainsiat.
Munggwing para warih I Dewa Gede Sana taler pablesat malayu,jantos wenten sane nyineb wangsa, wenten sane ngejagan putra alit – barak, nuli kaduduk olih I Kaki Kepasekan sakeng jagat Batubulan , kanjekan ipun idep majejarah ring Br. Bun, wenten sane kantun manggeh Satrya malayu nyujur pradesa Munggu – Badung, sairing para panjak pangiring , raris jumenek ring Br. Pamaron - Munggu – Badung.
Kocapan anak alit rare sane kaduduk olih I Kaki Kapasekan ring Br,Bun . raris risampune I Kaki raya werda, taler anake rare wus masomahan, duwaning boya ka uningin wit bun kawitan ipun,nuli ipun Sang kaduduk sukserah nyungsung Parhyangan Pura Kapasekan aneng Batubulan .Kasuwen –suwen duk nyeneng Ida I Dewa Putu Tunas Besar ring Puri Rangki ,wenten para warih Sang kaduduk ring Br. Bun mawasta I Kaki Ke aengan sakeng Batubulan matemu sawitra kanti lawan I Dewa Putu Tunas Besar. Ngawit punika raris kayang kapungkur wekas para warih Sang kaduduk tan purun linyok pedek tangkil ring Mrajan Agung Dewa Kabetan Tarukan.Bilih – bilih duk ngawangun pamedal Mrajan Agunge warsa 1957, warih Batubulan mawasta Mangku Wasa lan Bapa Kuasa sane gumana ngayah ngaryaning muputang pamedal Kuri Agung Mrajan Dewa Kabetan Tarukan.
Kawuwus sameton warih Kabetan ring Tarukan sumuyub matunggilan nangun Parhyangan Pasamuan ring Pejeng,mawasta Mrajan Gede Satrya Kandel,risampune jagat Pejeng kasor ulij Cok. Gede Sukawati Ubud.Sawatara warsa 1926,runtuh bisama mangdene para Satrya Pangabih Puri Pejeng masikian nangun Mrajan Paibon.Raris kapica genah ring Banjar Utu,wentene ring delod margi tiga nyujur Desa Tatiapi. Wekasan kalaning anangun ngentosin gedong Piyasan,buat sameton Tarukan polih emponan urunan pamelin saka.Duk punika wenten sinalih tunggil sameton Satrya Kabetan tan kayun nawur urunan papeson , kadi Ida I Dewa Nyoman Suwe ring Puri Kanginan.Indike punika raris maka sami sameton Kabetan kasengguh tan arsa nyarengin wewangunan ring Mrajan Gede inucap, mawastu duk anggara kliwon wuku Prangbakat sasih kalima warsa 1951 nemonin puja wali rng Mrajan Gede para istri lan para anom miwah alit – alit sameton Kabetan pada maturan pedek tangkil ring Mrajan Gede. Tan pariwangde I Dewa Ketut Lempod pinih ajin I Dewa Ketut Sura kang umanggeh Pamangku Mrajan Gede tan arsa ngastawayang aturan para sameton Kabetan Tarukan,antuk taled dalih raos,tan purun mamurug pamutus panyungkem sameton Satrya Pejeng,duk pasamuan tgl. 3 Maret 1951.
Ngawit warsa punika raris sameton warih Dewa Kabetan ring Tarukan mapasah tan kantun sareng nyungsung Mrajan Gede Satrya Kandel Pejeng.
Puput kasurat; Anggara Umanis Medangkungan purnama kalima,29 – 10 -2012
Sakeng tityang
Warih Dewa Kabetan Tarukan
( Toklok Jata Sawitur alias TUT UBUD ).
BABAD DEWA KABETAN TARUKAN J I L I D ;II.
LEPIHAN KETUS BUN PURI KRATON DEWA KABETAN ANENG TARUKAN
PARA WARIH PURI PUSAT.
Kinucap I Dewa Gede Made Sedan Besar jenek gumana malinggih ring Puri Pusat wus alaki rabi lawan Ni Desak Putu Luhin sakeng Sawa Gunung ngendahang putra limang diri maparab ;
1 . Kaping siki I Dewa Kompyang besar .
2 . Kaping kalih I Dewa Ketut Gesiuh .
3 . Kaping tiga I Dewa Putu Raka .
4 . Kaping papat I Dewa Made Badoh.
5 . Kaping lima Ni Dewa Ayu Nyoman Menuh alaki rabi lawan I Dewa Putu Jental sakeng jagat Dukuh Pejeng pawiwahan nyentanin saha salantur nyane pinaka pangawit Puri Dukuh magenah ring dangin alun – alun baler Pura Desa Bale Agung .
KACARITA mangkin sapanyeneng I Dewa Kompyang Besar putra pinih duwur ring Puri Pusat sampun ping tiga ngalap rabi minakadi Ni Desak Putu Soka sakeng Belusung , Ni Luh Wayan Antab soroh Puaji . Maka kalih rabi punika boya ngawentenang putra . Munggwing rabi kaping tiga mapesengan Ni Desak Ketut Geliling sakeng Puri Rangki ngendahang putra lanang a diri mapuspata I Dewa Putu Tilem .
Kawentenan I Dewa Kompyang Besar gumanti Ida kasinanggeh senopati “ Dulang Mangap “ Puri Soma Negara Pejeng kawuwus maha patih tabeng wijang andel – andel jagat Pejeng . Duk punika ring Puri Soma Negara Pejeng kanjekan sapamadeg I Dewa Agung Pamayun Guliang saha Ida kabiseka wenang nganggen pungkusan “ Dalem Pamayun Putra” kaping VI , ka abih olih arin Ida sane mapesengan I Dewa Agung Rai Pinatih utawi Cokorda Rai Pinatih .
Punggelang carita , kabaos ne mangkin para warih Dalem Pamayun sane jumeneng Nata ring Tampaksiring duk massa warsa punika inggihan Ida I Dewa Agung Anom Senetan utawi Cokorda Anom Senetan nenten ngendahang senatana utawi bekung . Duwaning kadi punika sinah kawentenan nyane , raris digelis I Dewa Agung Rai Malinggih Pamayun utawi Cokorda Rai Malinggih murdaning jagat Payangan , pragata gagesonan ngabiseka I Gusti Kebon tosning Arya Kebon Tubuh , madeg Nata murdaning jagat Tampaksiring , praya nungkul majeng murdeng jagat Payangan . Maka tatuwek sasuduk wiweka winaya Dalem Pamayun Payangan , gumanti …. mangdene Tampaksiring sida kawawa olih Dalem Pamayun Payangan , majalaran ngabiseka tabeng wijang pengabih Puri Tampakasiring sane dahat endel satya sutindih majeng para warih Dalem Pamayun Tampaksiring muang Payangan.
Indik abiseka I Gusti Kebon punika sane ngawinang kalintang bendu duhkita kayun Ida I Dewa Agung Pamayun Guliang ( Dalem Pamayun Putra kaping VI ) , kadi rasa Dalem Pamayun Pejeng boya pantes utawi tan wenang buat ngentosin ka prabon Puri Tampakasiring . Tiyos ring punika , sampun janten sinah kapikayun munggwing linggih Dalem Pamayun Pejeng kasemsemin dahat kanistayang utawi kacampahin olih sametone sane ngodag ring jagat Payangan .
Antuk erang kayune Dalem Pamayun Pejeng , raris Ida pragata pisan ngesengin I Dewa Kompyang Besar senopati Dulang Mangap jagat Pejeng , mangda magegebug ngarejek Puri Tampaksiring , buat pacang mucehang kodag kuasa I Gusti Kebon , maka cihnaning Dalem Pamayun Pejeng bendu , prasangga arepe ring wiweka winaya Nateng Payangan .
Kanjek warsa Isaka 1758 jagat Tampaksiring kalurug olih bala wadwa jagat Pejeng. Makuwug yudane ring wawidangan jagat Bukit nampeking jagat Kulub , saling sempal , saling tumbak , saling angget , saling singse. Maruket ngamuk bala jurit Tampaksiring mapagut lawan bala wadwa Pejeng kang senopati I Dewa Kompyang Besar a ngawa pusaka saselet Ki Pole Geni . Munggwing senopati bala jurit Tampaksiring maparab I Gede Dangin tosning Dalem Tarukan kula warga Pulasari . Sajeroning yudane maruket sengit wadwa Tampaksiring marasa kasatan nuli malayu nyinutang dewek , tur ka uber karuwek olih bala yuda Pejeng . Kala punika I Gede Dangin sida katuwek antuk Ki Pole Geni jantos ngemasin lampus . Sakewala ana bala jurit Pejeng , mawiwit sakeng Tarukan ngemasin padem ring tengahing rames yudane di Bukit , ma aran Nang Gangsar lan Nang Limbak soroh Pasek Salahin delodan . Munggwing tegak karang kubon nyane , dauh Pura Panti Salahin delodan selat telabah selat rurung , lawangan kaping lima sakeng kaler.
Salantur nyane bala jurit Pejenge nyujur ngungsi Puri Kraton Tampaksiring , nanging sadurunge nincap ka Puri Kraton Tampaksiring, kadi Dane I Gusti Kebon sampun ngariyinin masinutan nyingidang raga sareng sakula gotran nyane , ngelarang winaya nyineb wangsa , manados wong tani sudra wangsa . Munggwing rundah rebat payudan Dalem Tampaksiring mapagut lawan Dalem Pejeng , karenga dening murdaning jagat Gianyar inggihan Ida I Dewa Manggis Jorog pinaka Nateng Gianyar kaping kalih uatawi Dewa Manggis kaping V, gumanti ngentosin Nateng Gianyar kaping pisan inggihan Ida I Dewa Manggis Geredeg utawi I Dewa Manggis Api utawi I Dewa Manggis Sakti . Risampune I Dewa Manggis Jorog weruha munggwing kawentenan pasemetonan Dalem Pamayun boya ja adung utawi matungkas , indike punika nuli ka anggen bantang purune madaduwun agia nunggilang kuwub jagat Pejeng manjing ka kuwub kodag kuasa Nateng Gianyar . Raris I Dewa Manggis Jorog mapikarsa ngiket pasawitra kanti lawan Nateng Pejeng Puri Soma Negara malarapan antuk wiweka “ pawiwahan “ praya alaki rabi lawan raja pura Gianyar sane maparab I Dewa Manggis Rangki. Tumuli ngesengin utusan pamadikan praya pedek tangkil majeng Dalem murdaning jagat Pejeng, gumanti buat makruna ngalamar Dewa Agung Istri listuayu Puri Soma Negara wiyakti putrin Ida Cokorda Rai Pinatih . Kala punika ring sajeroning pakrunan ngeluku , bebaose madarma tula sakadi banggras ujar Ida Dalem Pamayun Pejeng arepe ring utusan pangeluku Puri Gianyar ,buat pamadikan punika rahat ka norayang utawi ka boyain pisan olih Cokorda Rai Pinatih Pamayun Pejeng .
Riantuk pamadikan tan mapikolih raris utusan Gianyar mawali ka Puri Gianyar nguningayang sakadi kapiarsa ring Puri Pejeng pinaka unteng pamutus baos cutet palukuane dahating ka norayang pisan . Indik wicarane ripalukuan punika , mawastu metu kayun raja putra Nateng Gianyar , jaga nungkulang jagat Pejeng , malarapan antuk magutin matandang tanding jurit nyentokang kawisesan marep murdeng jagat Pejeng . Kemawon wenten a matra kantun sumelang rituwas kayun I Dewa Manggis Jorog, nganining kamolihan I Dewa Kompyang Besar ring payudan sida ngasorang bala wadwa Tampaksiring ring wawidangan jagat Bukit . Duwaning gatra yudane ring Bukit sampun limbak sumbung , kadi Ida I Dewa Kompyang Besar maduwe saselet pusaka dahat luwih sakti mawisesa .
Salantur nyane yan asapunapi pakibehe , sawatara makudang – kudang sasih , wenten lalimbakan gatra singid kepir – kepir gatra dusta raja pisuna . Buat daging gatrane , kengin I Dewa Kompyang Besar ngangkas – ngangkas jaga ngadakang rundah biyuta , agia ngarejek Puri Soma Negara marebutin kodag kuasa Nateng jagat Pejeng , turmaning gatrane punika nyangsan limbak , samaliha maosang munggwing I Dewa Kompyang Besar nedeng puguh mapa urukan buat nincapang kawagedan bala jurit Idane ring Tarukan , ngulati bala yuda dulang mangap tan pilih tanding .
Gatra dusta singid punika rawuh kapiarsa majeng Nateng jagat Pejeng , duwaning gumanti sangkaning kasadokang olih wong Tarukan , sane mapi – mapi ipun ngamargiang “ telik tanem “ . Punika awinan raris I Dewa Kompyang Besar ka sengin mangdene sigra gati rawuh pedek tangkil ka Puri Soma Negara . Ring kayun I Dewa Kompyang Besar nenten marawat matra wentene limbak gatra singid kadi punika , nuli raris Ida mamargi pedek tangkil ka Puri Pejeng , kadi rahayu pa angenira , saha Ki Pole Geni nenten pasah sakeng tangan Idane.
Sarawuhe ring Bale Paseban Puri Soma Negara , sadurunge Ida Senopati Tarukan ngambil genah malinggih , Ki Pole Geni kagenahang nyeleleg ring tembok Bale Paseban raris Ida makinkinan pacang malinggih . Durung manawi becik linggih Ida I Dewa Kompyang Besar , kancit wenten asu makerah saling uber turmaning sinalih tunggil asu punika nomplok tateken Ki Pole Geni sane kaselelegang ring temboke . Kagyat tan pajamuga asu punika padem jalan mula ri sor Ki Pole Geni . Kanjek punika Nateng Pejeng saha iring kang ari sane mawasta I Dewa Agung Rai Pinatih . Sang kalihan nedeng wawu prapta ring paseban agia ngungsi genah malinggih . Tan kapisangkan kacingak olih Sang kalih pangwawa jagat Pejeng , polahing padem nyane asu punika . Heneng bengong a bosbos Dalem Nateng Pejeng inggihan Ida I Dewa Agung Pamayun Guliang utawi Dalem Pamayun Putra kaping VI , sinambi malinggih ring patani agung yukti palinggihan Sang Nata Ratu . Ri tuwas kayun Dalem Sang kalihan sampun sinah jenar ka aksi buat kawisesan tateken Ki Pole Geni , mawastu manggeh kayun Dalem Pejeng sangkaning Ki Pole Geni bala wadwa Tampaksiring sida ka kasorang . Punika awinan Dalem Pejeng mapituwek kayune nyujatiang buat gatra sane katur uningin ring Ida Dalem , sayuwakti jakti kawentenan nyane , boya ja dusta . Antuk punika maweweh sumanang saya sumelang kayun Dalem Pejeng arepe ring I Dewa Kompyang Besar .
Duwaning Nateng Pejeng Sang kalihan sampun agia malungguh , nuli dahat pranamya pisan Tabeng Wijang sakeng Tarukan punika matatanganan matur pawungu panganjali majeng palungguh Dalem Pamayun Pejeng . Asapunika taler Nateng Pejeng maka kalih sada kenying nyambrama ngawaliang antuk panganjali . Sampun pada malinggih ring paseban , Dalem Nateng Pejeng ngariyinin mabawos buat nakenin sapari indikan pakibeh , pakrimik panjak ,tata krama tatatitinin dresta saha labda karya lan kerahajengan jagat, rawuhing kerta treptining pa wongan miwah kasukertan pidabdab pakraman . Pamuput untating bebaosan utawi ikuhing baose nincap ring nganining tateken Ki Pole Geni . Unteng daging baose gumanti Dalem Nateng Pejeng pikedeh buat ngarsayang Ki Pole Geni mangda ka genahang ring Puri Pejeng gumana wantah genahang sikiang lawan saselet pusaka duwe Puri Soma Negara , inggihan ipun sahananing pusaka utama wenang sinungsung sikiang ring Merajan Agung Puri Sang maweng rat . Kalaning wenten rundah biyuta wenang maka sami tedunang sakeng genah pasimpenan , pamekas pusaka luwihing utama wenang sikiang sungsung . Nirdon pradene anggen saselet tateken sa dina – dina . Asapunika pamekas unteng panganikan Dalem Nateng Pejeng .
Miragi pangarsan Dalem Pamayun Nateng Pejeng punika kagyat kamegmegan kayun Ida I Dewa Kompyang Besar sinambi nguntul kaselek bengong , makayun – kayun . Tan asuwe raris I Dewa Kompyang Besar banban alus dahat pranamya pisan matur; “ Inggih Ratu …. Palungguh Dalem sasuwunan tityang … tepengan kadi mangkin mapidaweg pisan kadi sikian tityang …. nunas geng rena pangampura dahating ampura , sa antukan tityang tan prasida nagingin kadi pangarsan palungguh Dalem . Boya sangkaning tityang purun prasangga langgah ring linggih palungguh Dalem . Kawiyaktiane pusaka tateken tityang puniki satmaka jiwa pramanan tityang …. duh kapan tityang pacang prasida sukserahang ring anak tiyos . Punika awinan tityang banget nglungsur ledang arsa paswecan kayun palungguh Dalem mangdene ngawikanin kawentenan tityange anggen palungguh Dalem pangayah pangabih iriki ring Puri Soma Negara . Wanti – wanti tityang matur …. nunas geng rena pangampura …. nunas paswecan palungguh I Ratu sasuwunan tityang . Sajaba pusaka tateken tityange puniki …. sapituduh muwang saparititah palungguh Dalem … tityang misadia siaga sigra satyeng wecana muputang kadi tel wecana . Asapunika atur I Dewa Kompyang Besar ngandap kasor pisan.
Ngarenga atur I Dewa Kompyang Besar kadi punika , nora wenten cihna obah bendu tata wedanan Dalem Nateng Pejeng , sakadi tan wenten wicara punapa – panapi ri uleng kayun Idane . Kapikanten tata wedanan Ida Dalem sakadi matutang atur I Dewa Kompang Besar , tumuli raris nyawis nganika sada enyor nyunyur manis ,nyihnayang sih ring kayun ; “ Beneh saja kadi atur Bapane ….! Nah …. buat ento …. sara elah Bapane ngabetang ento …. dening ento …. nak gelah Bapane . Di ati …. yen dadi idih gelah papineh Bapane ….. ndepang dini …. linggihang pusakan Bapane dadi a besik ajak pusaka padruwean Purine dini . Duwaning pusakan Bapane ento dahating luwih mautama , melahang dini di Puri sungsung bareng besikang ajak pusaka duwe purine , apang tusing kadi campah tember asananga pusaka luwih mautama sadina – dina prabotang anggon tateken “. Asapunika panikan Dalem Nateng Pejeng , nanging Tabeng Wijang sakeng Tarukan manggeh ring kayun , nora ka aturang . Riantukan bebaosane sampun nyubal , noro wenten sane pacang baosang malih, raris I Dewa Kompyang Besar ngalungsur mapamit budal .
Salantur nyane durung lintang kalih sasih , wenten utusan Puri Soma Negara buat nga sengin I Dewa Kompyang Besar mangda sigra pedek tangkil ka Puri Pejeng . Wus ngarangsuk busana , raris Tabeng Wijang Tarukan mamargi ka iring olih Sang utusan pedek tangkil ka Puri Soma Negara .
Sarawuhe mareng Puri , Nateng Jagat Pejeng sampun nyantos sapangrawuh I Dewa Kompyang Besar ring Bale Paseban Puri . Sampun nampek ring linggih Dalem Pamayun , raris kapicayang rarepi utawi sewala patra sane sampun sepil magenah ring tengahing bungbung matekep singid pisan sinambi palungguh Dalem nganika ;” Neh …. ! ene ada sewala patra dahat mabuat pisan daging nyane , mangdene sida gelis rawuh ring murdaning Jagat Klungkung . Ri tuwas kayun Gelah wantah Bapa ane andel nyingidang rarepine ene tur prasida digelis ngaturang ka Puri Smara jaya Klungkung majeng palungguh Dewa Agung Nateng Klungkung. Nah …. ! ada mabuat piteket Gelahe marep teken Bapa ; “ oja wera ….. !” utsahayang pesan gumanti tangan Bapane ane prasida ngaturang rarepine ene majeng Sang madeg Nateng jagat Klungkung . Asapunika piteket Dalem Nateng Pejeng mapiseken dahat teges pisan . Nuli katunas rarepine punika olih I Dewa Kompyang Besar antuk pikayunan dahat gargita , boya ana sumanangsaya , samaliha ledang kayune molih ngaturang ayah mautama satyeng swadarmaning satrya .
Rahina benjangne palimunan pisan Ida I Dewa Kompyang Besar sampun mamargi ka iring olih pangabih tatadan wit warga Pameregan mawasta I Made Putih sane taler mapadewekan waged sakti mawisesa , saha angawa babekelan pangan maka luwir ; anaman , mosa , kacang saur , sager gerang , peesan marus lan panginangan tan sah tateken Ki Pole Geni ri tangan Idane . Pamargine madarat menek jurang tuwun pangkung ngalintangin jagat Sawa Gunung , Siangan rawuh ring Nyalian Banjarangkan nyujur Takmung lantur ngungsi Puri Smara Jaya Klungkung .
BAOSANG MANGKIN kawentenane ring Puri Smara Pura Klungkung . Duk punika sawatara warsa 1838 masehi , kanjek sapamadeg I Dewa Agung Putra kaping siki utawi nateng Klungkung kaping VI , gumanti okan Ida I Dewa Agung Sakti Nateng Klungkung kaping V , utawi Dalem Di Made kaping IV , utawi I Dewa Agung Semarabawa pesengan Ida sadurung madeg Nata . I Dewa Agung Putra kabiseka Nateng Klungkung , wantah pinaka pangrajeg utawi simbul kaprabon Nateng jagat Klungkung . Munggwing polahing wiweka kodag kuasa , kaparilaksana panyade kapiandel olih I Dewa Agung Istri Bale Mas Kanya , wit kamanggehang antuk tel bisaman Rakan Idane kang upasadnya I Dewa Agung Sakti sadurunge Ida lebar . Pamekas unteng bisama wiyakti I Dewa Agung Istri Bale Mas Kanya umadeg ngangganing utawi nyade linggih sapanyeneng I Dewa Agung Putra kaping siki sajeroning ngamargiang pamutus wiweka pakodag kuasa maridabdab jagat .
Sarawuhe I Dewa Kompyang Besar tan sah pangiring I Made Putih ring bencingah Puri Smara Pura , ngalantur nyujur linggih I Dewa Agung Istri Bale Mas Kanya ka papah olih sinalih tunggil bala jurit pagebag kori agung puri . Wus masadu ajeng lawan I Dewa Agung Istri Bale Mas Kanya, dahat pranamya ngandap kasor pisan I Dewa Kompyang Besar praya sigra ngaturaken rarepi punika majeng I Dewa Agung Istri Bale Mas Kanya . Rarepi punika raris katampenin olih I Dewa Agung Istri nuli kawacen jeroning idep . Puput ngawacen rarepi , nadak sara I Dewa Agung Istri ngasengin bala jurit pagebag Puri utawi Pacalang sane sedek magebag ring pamedal Puri . Tan wenten a papakan base , kancit rawuh petang diri bala jurit pagebag inutus , sahasa ngarampas saluwiring babaktan I Dewa Kompyang Besar ri ajeng I Dewa Agung Istri Bale Mas Kanya . Biana wenten samadana punapa – panapi , nulia sigra I Dewa Kompyang Besar inatag ka papah ngajabayang olih petang diri bala jurit pagebag , lantur munggah dokar mamargi nyoloh beneng kangin nyujur pasisi segara pradesa Kusamba . Sapunika taler I Made Putih sareng ngiring pamargin Tabeng Wijang Tarukan buat idep nyane nyadia sutindih subakti ngiring Warih Kabetan , yadiastun ring endi ja Ida pacang kapidanda .
Pamargine ngalintangin tukad Unda rawuh ring Desa Sampalan lantur nyujur Pradesa Kusamba . Sarawuhe ring pasisi Kusamba , kancit sampun agia jukung nyantos sapangrawuh Tabeng Wijang tosning Dewa Kabetan parawarih Dalem Sigening ,praya buat nyandang palungane a narung segara nyujur jagat Nusa Panida genah Idane kaselong
Kancit rawuh ring pasisi wawu I Dewa Kompyang Besar rumasa ri angen kapidanda kaselong .Indik punika kinatos rituwas kayun Ida manawita iwang sangkaning purun prasangga ri ajeng Sang Nateng Ratu , boya iwang sangkaning a nyolong , a murug utawi iwang sane lianan . A mulat sarira Ida Warih Dewa Kabetan jeroning angen kadi rasa boya nahen maparilampah dosa iwang napi malih maulah presangga majeng linggih Dalem Pejeng ,nenten pisan marawat matra ri kayun Ida Warih Kabetan . Antuk kasudiran kayune prawira satyeng wecana , boya wenten a tepung miber rituwas kayune a jerih ,napi malih pacang malayu utawi matandang wirang bela pati nindihin patut . Malarapan kayun wicaksana Ida ngayunin karahayuan para warih Kabetan sane kantun akweh pisan buat nunas pasayuban ring Nateng Pejeng , bilih – bilih kayang ka wekas . Punika awinan dahat lascarya gargita kayune agia nandaang pamidanda sane nora malarapan saksi lan bukti malaku dosa . Wahya diyatmika uleng idepe rastiti ngapti kerta asung sih Sang Hyang Widhi Wasa mangdene ngiwang patutang paripolahing lampah manusa padane.
Sadurunge I Dewa Kompyang Besar munggah jukung tan lali Ida ngasengin I Made Putih mangda mawali matulak ka Tarukan sinambi mabaos ; “ Nah ….!! Deweke kema suba mulih malipetan , endepang Icang padidi kema ka Nusa,… awak ngelah pianak liyu pianake melahang runguang jumah !” . I Made Putih tan pasaur , nanging lampahe ingkig – ingkig alon , ngetut wuri ngiring ungkuring I Dewa Kompyang Besar jantos nampeking Jukung agia munggah . Tabeng Wijang Warih Kabetan lumaris munggah jukung ka abih olih maka papat bala jurit pagebage . Kala punika I Made Putih taler nyujur jukung agia ngiring munggah jukung . Duk kadi punika I Dewa Kompyang Besar malih mapajar sada banggras keras ; “ Mulih cai …!! Eda milu bareng ka Nusa …. atur uningin sameton Icange buat Icang kaselong ka Nusa Panida , apang tusing Icang ati – atina teken sametone jumah !”
Punika wawanan I Made Putih tan purun tulak kadi panikan Warih Dewa Kabetan , tumuli nganjem majujuk bengong ngatonang jukunge malayar narung segara jantos ilid sadohing paneleng . Riantuk jukunge sampun layep , raris I Made Putih malipetan niri saha sebenge masemu layu dudus antuk manahe sedih aworan angen rituwas idepe ngeton I Dewa Kompyang Besar katiben pidanda kaselong biana dosanira .
Sarawuhe ring Tarukan , I Made Putih lantur nyrogjog ngaranjing ka Puri Pusat saha nguningayang sapari indikan pamargin I Dewa Kompyang Besar ngawit tangkile ring Puri Soma Negara rawuh ngaturang sewala putra ka Puri Smara Pura Klungkung , jantos pamuntat malayar nyujur jagat Nusa Panida
Miragi pidartan I Made Putih dahating data jangkep tur jenar pisan , ngawinang Ni Desak Ketut Geliling sungsut sungkawa kabiyah paran antuk angene ring Rabi katiben danda kaselong ka selat segara tanpa dosa . Kadi rasa nirdon satya baktin Rabine sakeng lawas majeng pangwawa jagat Pejeng jantos nyadia toh pati bela pati ring tengahing payudan magutin bala wadwa Tampaksiring . Raris kadi mangkin yukti nungkalik pala karmane pikolihang . Ngawit punika Ni Desak Ketut Geliling sadina – dina budal ka Puri Rangki ngemban putra sinunggal sane maparab I Dewa Putu Tilem kantun meraga rare barak .
KABAOS PUNGKURAN risampun pernah putra kaponakan Idane ring Puri Rangki kang puspata I Dewa Made Jaksa Besar abiseka anglurah Puri Ubud kawenang maridabdab pradesa Tarukan , Belusung , Umahanyar , Sembuwuk lan Melayang . Duk punika Ni Desak Ketut Geliling ngedil lunga ngaturang ayah ka Puri Ubud naap kala wenten swayadnya ring Puri Ubud . Endikapane Ni Desak Ketut Geliling sering jantos marerepan makemit ring Ubud gumentos swayadnyane kabaos puput gantas . Sangkaning Ni Desak Ketut Geliling ngedil – ngedil marerepan ring Puri Ubud , kala punika Ida Ni Desak Ketut Geliling molih matemu wirasa lawan I Dewa Putu Kantun pinaka tukang bade kapiandel – andel Puri Ubud . Sakeng lulut asihe Sang Kalihan , raris Sang Kalihan ngalanturang kapitresnan alaki rabi. Pakerab kambe Ni Desak Ketut Geliling lawan I Dewa Putu Kantun ngendahang putra adiri mawasta Ni Desak Putu Limbur . Salantur nyane risampun Ni Desak Putu Limbur anom listuayu , inalap rabi olih I Dewa Putu Godeg sakeng Pradesa Melayang Pejeng . Munggwing tegak pakarangan I Dewa Putu Kantun ring Melayang , wantah sisi paling kelod dangin pengkolan , margi nyujur ka setra Melayang .
Kabaos munggwing parabian Ni Desak Ketut Geliling lawan I Dewa Putu Kantun kasinahan nyane gumanti maka rabi kaping kalih utawi panawing , duwaning rabi prami mawiwit sakeng Sawa Gunung Pejeng Kangin sampun ngendahang putra lanang inggihan pinaka ajin I Dewa Putu Purna . Yadiastun sakadi punika kawentenane , mantuke ring I Dewa Putu Kantun dahat ledang arsa nekeng tuwas kayun rahayu nulus nganining kawentenan Ni Desak Ketut Geliling kasarengin putra tunggal Idane sane kantun cili alit sareng taler ka upapira ring Purin I Dewa Putu Kantun irika maring Br. Ubud Kelod tempekan Muwa . Kawentenan I Dewa Putu Tilem ring jero Puri Muwa Ubud wiyakti ka alem ka welas asih pisan olih Aji Kwalon I Dewa Putu Kantun sakadi mariwara putra rupaka . Punika awinan I Dewa Putu Tilem nahu pisan magenah sareng biyange ring Muwa Ubud , tambis – tambis Ida tan kayun mawali budal ka Tarukan , dening rumasa I Dewa Putu Kantun sampun sakadi Aji sane ngrupaka anggan Idane .
Lawas dalu risampune I Dewa Putu Tilem munggah anom jejaka ring Ubud , raris wanti – wanti pernah Ajin Idane sakeng Tarukan lunga mendakin ka Ubud mangdene Ida I Dewa Putu Tilem mawantun budal ka Tarukan . Sangkaning pangus parumrum Ajine sakeng Tarukan pamuput Ida kayun mawali budal ka Tarukan . Sasampune jenek ring Puri Pusat Tarukan turmaning manut panamayaning masa , nuli I Dewa Putu Tilem kawidhi widana pakerab kambe lawan Ni Desak Putu Keweh sakeng Desa Cagaan Pejeng Kangin . Wus pakerab kambe raris I Dewa Putu Tilem ka alem – alem asihin mangdene arsa magingsir sakeng Puri Pusat , maduluran ka wehin milihin tigang genah tegak karang puri buat anangun jero puri . Salantura sinalih tunggil tegak puri punika sane arsaang Ida I Dewa Putu Tilem , wantah tegak puri sane nampeking Puri Semanggen . Sampun pada sinah galang a padang nuli I Dewa Putu Tilem lawan Ni Desak Putu Keweh winangun puri dauh telabah , numbak lawang lawan Puri Semanggen , saha Purine kinujaran PURI KAWAN, turmaning sampun ngendahang putra 7 diri mawasta;
Ni Desak Made Rosi.
Ni Desak Nyoman Teblun, inalap rabi ulih I Dewa Nyoman Reken sakeng Puri Pondok.
Ni Desak Ketut Ngook Kanya, saha ile ragan Ida.
I Dewa Putu Togog.
I Dewa Made Besar.
I Dewa Nyoman Suta ( De Man Nik ).
I Dewa Ketut Asta ( De Tut Ceng).
BAOSANG MALIH lanturang pamargin I Dewa Kompyang Besar lungane ka jagat Nusa Panida . Lampahe munggah jukung sakeng pasisi Kusamba nyujur jagat Nusa Panida tedun ring pasisi Mentigi , taler kapapah olih petang diri bala jurit pagebag Puri Klungkung . Lumaris madarat mamargi nyujur beneng kelod sakeng Mentigi rawuh ring wawidangan pradesa WARU lantur pamargine nujah ngamunggahang nyoloh margi batu – batu parangan a nyelongnyongan batis , ngalintangin pradesa BAYUH ,nuli ngalantur pamargine kapangguh pradesa TULAD , raris pamargine nyujur pradesa BINGIN . Sakeng Bingin ngalanturang pamargi nyujur pradesa D U N G K A P , gumanti genah Wang kaselong .
Ngawit rahina punika I Dewa Kompyang Besar makrama desa ring jagat Dungkap , wawengkon prabekelan BATU KANDIK . Kauripan maring Dungkap sayuwakti dahat sukil riantuk kawentenan tanah tetandurane rahat letuh tur mabatu – batu parangan, samaliha kawentenan toyane rahat keleng pisan , wantah ngadelang toyan sabeh sane kabulakang mawasta “ CUBANGAN “ gumanti pinaka toya sane anggen sadina – dina , kawigunayang saluwiring karya sane bobot ring toya . Sapanyeneng Warih Dewa Kabetan makrama desa adat ring Dungkap , wenten pariwaran Ida a diri sakeng jagat Bingin , wong pawestri mayusa sawatara siya warsa ( 9 tiban ) . Ipun dahat jemet tur seleg , geleng nyaraka ngayahin Tabeng Wijang Pejeng . Wentene Ida I Dewa Kompyang Besar jumenek ring Dungkap , panjak Dungkape rumasa kadi kapajengin antuk Ida , awinan Warih Kabetan dahat ka wiryayang pisan , kasiwi olih krama panjak Dungkape ,gumanti kasinggihang pinaka Pacek Dalem ring pradesa Dungkap . Irika Ida loktah ka sengin I Dewa Kompyang Tarukan , kamanggehang panutan pinaka pangulu sah panglingsir sajeroning midabdabin tatacaraning matatanduran , anuting padewasan sasih , miwah wawintangan , dedawuhan dina lawan tika wariga . Punika awinan jagat Dungkape nyangsan landuh riantuk sarwa tatadurane sarwa nadi , saha ubuh – ubuhan wewalungan minakadi ; banteng , bawi , ayam , itik muwah sane lian – lianan sami , pada muponin , jantos nenten nahenin panjake kasatan antuk sangu pangupa jiwa . Maka suksmannyane panjak Dungkape nyangsan maweweh – weweh dreda baktin ipune majeng I Dewa Kompyang Tarukan .
Manawita lawas dalu telulas warsa ( 13 tiban ) , sawatara warsa 1851 masehi , kawentenan maring Puri Klungkung , sampun magentos makudang – kudang pangwawa murdaning jagat minakadi ; I Dewa Agung Istri Bale Mas Kannya sane nibakang danda kaselong majeng I Dewa Kompyang Besar, sampun kagentosin olih I Dewa Agung Ketut Agung manggeh abiseka Nata warsa 1840 jantos warsa 1850 . Salantur nyane I Dewa Agung Ketut Agung kagentosin olih I Dewa Agung Gede abiseka Nata mapungkusan I Dewa Agung Putra kaping III .
Daweg sapamadeg I Dewa Agung Putra III Nateng jagat Klungkung , kanjek punika I Dewa Kompyang Besar rumasa prangkeng bui pidandan Ida sampun panamayaning untating galah pidanda kaselong .
Tiyos punika maring Puri Kraton Gianyar taler sampun magentos makudang - kudang abiseka Nata Murdaning jagat Gianyar . Duke I Dewa Kopyang Besar kapidanda kaselong ka Nusa Panida , rikala pinika Nateng pangwawa jagat Gianyar mapuspata I Dewa Manggis Jorog utawi Dewa Manggis Kuning kaping V, pinaka Nata Prabu jagat Gianyar kaping II warsa 1814 jantos warsa 1839. Kengin Nateng Gianyar kaping kalih taler sampun kagentosin olih putran Ida sane mawasta I Dewa Manggis Rangki abiseka Nateng Gianyar kaping tiga utawi Dewa Manggis Kuning kaping V I, angawa jagat Gianyar ngawit warsa 1839 jantos warsa 1848 . Salantur nyane I Dewa Manggis Rangki Nateng Gianyar kaping III , kagentosin olih putran Ida kang upasadnya I Dewa Gede Putra abiseka Nateng Gianyar kaping IV , ngodag jagat Gianyar ngawit warsa 1848 jantos warsa 1882 . Pungkur wekas risampune I Dewa Gede Putra lebar , Ida kapungkusan Dewa Agung Mantuk di Satrya . Pamekas kasinahan nyane jagat Klungkung , yadiapi jagat Gianyar sampun magentos makudang – kudang Nateng Murdaning jagat . Munggwing pangodag pangwawa jagat Pejeng kawenten nyane sampun nungkul kasor ring Nateng jagat Gianyar,saha I Dewa Agung Pamayun Guliang nateng Soma Negara kaping VI sampun kabanda sinepel nireng Gianyar.Raris pakodag jagat Pejeng kapraksayang ring I Dewa Agung Pamayun Sudha.
Gatra munggwing magentos – gentos Nateng jagat ring wawengkon panegara Bali , molihang Ida I Dewa Kompyang Besar sakeng orti pakrimik baos rarembugan paraning dagang tengkulak sakeng jagat Bali minakadi para dagang sakeng pradesa Lebih , Kusamba , Jempai miwah sane tiyos – tiyosan , rikalaning ipun ngulak – ulak isin peken panegara Bali ring jagat Nusa Panida turmaning mawali ipun ka Bali ngulak - ulak upon – upon jagat Nusa Panida maring pasar – pasar ring wawengkon jagat Bali . Indike punika maka awanan Tabeng Wijang Pejeng rumasa manggeh ring kayun antuk pidanda sane nibenin anggan Ida sampun panamayaning untating galah pidanda utawi sampun puput ngamargiang danda . Duwaning asapunika , metu arsan Ida I Dewa Kompyang Tarukan kadi purun pacang mawali mantuk budal ka Puri Tarukan Pejeng .
Raris warih Dewa Kabetan nyobyahang pabuat kayun Idane maring peparuman panjak Dungkap . Kanjek peparuman punika , panjak Dungkape mabriyuk nunas ica mangdene I Dewa Kompyang Besar ngawangdeyang arsan Idane buat kedeh mawali ka jagat Bali . Wusan paparuman salah genti panjak Dungkape cerik kelih bajang tua parek tangkil mapungu atur ri ajeng warih Dewa Kabetan gumanti meled nunas ica kerta asih , saha nyinahang suluk idep ipune buat nyaraka nyiwi Warih Kabetan dening rituwas idep nyane majeng I Dewa Tarukan sampun kasinanggeh pacek Dalem tur prasida maridabdab ngetisin panjak Dungkap . Atur ipun para panjake sane parek tangkil maduluran tangis nyihnayang kalintang byahpara naraka manah ipun . Munggwing kadi Ida I Dewa Kompyang Besar manggeh kukuh kayune jaga mawali ka Bali , saha subaya pungkur wekas pradene wenten kasadian tutug urip niscaya Ida pacang mawantun ka Dungkap praya ngalanturang nyambung sawitra asih lawan panjak Dungkap . Antuk kedeh kukuh kayun Warih Kabetan buat mawali ka Bali , raris para panjak Dungkape sakadi mamaksayang idep ipune lascarya mapasah lawan gusti pangulu jagat Dungkap inggihan Ida I Dewa Kompyang Besar .
Risampune panamayaning galah padewasan sane becik buat lungane mawali ka Bali , raris wengine kawentenang upacara pasah bakti saha sangu upaboga pagibungan mawibuh – wibuhan , sinambi maledang – ledang manglilacita ngawentenang ilen – ilen . Untating wengine punika dahating mabiyuh – biyuhan pangan lan inum – inuman , matuwakan mapunyah – punyahan jantos lintang tengah latri , maka cihna subaktin ipun panjak Dungkap maka sami majeng warih Dewa Kabetan.
Kabaos rahina benjang semengane panamayaning dedauhan galah Warih Dewa Kabetan jagi lunga mawantun budal , turmaning sahananing bebaktan babekelan agia budal sampun tegep tragia sepil jangkep sami . Sakewanten jantos Sang Hyang Surya wus munggah dauh telu tambis – tambis tajeg tengai tepet , Ida I Dewa Kompyang Besar durung matangi sakeng pakoleman . Antukan sampun telat munggwing galahe , nuli Ni Luh Bingin pariwara sakeng Desa Bingin , kadi purun ipun ngaranjing ka pakoleman Gustin ipun , meled idep nyane ayat nanginin Ida I Dewa Kompyang Tarukan . Sampun ring jeroan gedong pakoleman , barber tan pajamuga nadaksara ipun Ni Luh Bingin kagiyat nyerit katulung - tulung gagesonan medal sakeng gedong pakoleman , saha nangis manulambe sedih kingking ; “ Tulung ….! Tulung …..! Anake Agung ngemasin ….! Anak Agung Aji ngemasin ….! Punika pajar ipune wanti – wanti maduluran tangis asih – asih biyahpara .
Duwaning jerit – jeritan tangise kalintang sarat pisan awinan sagrehan panjak pisagane pada rawuh pragata gagesonan maritatas kasujatian panulamben ipun Ni Luh Bingin . Sampun sami pada tatas pedas, gumanti sampun sinah jenar kadi Ida I Dewa Kompyang Besar wus ngemasin seda . Nuli digelis raris layon Idane ka prateka pabersihan pangerekan lantur tinatab darpana jangkep catur limas , nasi takilan , pangadang – adang lan ajuman putih kuning tegep eteh – eteh sajangkep nyane . Wus acaraning prateka pangeringkesan raris layone kasandang nyujur genah setra pamendeman . Sajeroning mamargi ka setra , sagreh sumuyub panjak Dungkape ngiring pamargin layon Warih Dewa Kabetan nujur setra ring pasisi wawidangan jagat Sental Nusa Panida genah layon Idane kapendem . Ngawit punika ring para sameton Tarukan Bali , Ida kapungkusang PEKAK KOMPYANG MANTUK DI NUSA .
Salantur nyane gumentos satus warsa lintang Pekak Kompyang Mantuk Di Nusa mapendem ring setra Sental Nusa Panida , taler durung ka upakara palebon olih para sametone ana ring Tarukan Pejeng . Antuk suwene tan ka askara palebon , napi malih kapendak iring mawali budal ka Tarukan sinah pisan durung . Manut kawentenan gering lan biyutane tan pegatan ring para sametone di jagat Tarukan , nuli wanti – wanti sameton Tarukan nunas baos beras jinah , kabaos kenginan Pekak Kompyang Mantuk Di Nusa sane ngrebeda , dening Ida arsa mangda kapendak katunas ka Nusa Panida , gumanti pamitang sakeng Pura Dalem Peed . Indik daging baos beras jinah punika , raris duk warsa 1956 sedenging sasih a tiwa –tiwa ring jagat Tarukan , rikanjek galah punika Dewa Hyang Pekak Kompyamg Mantuk Di Nusa katangiang upakara askara palebon ngalanus rawuh ka upakara yadnya ngasti ,saha ma ajar – ajar turmaning ngaturang pamendak pamamitan ring Pura Dalem Peed antuk nyawang sakeng pasisi Gua Lawah , lantur mamendak ka Pura Dalem Puri Besakih , gumentos katuran enteg linggih nyihnayang wentene jenek malinggih maring Marajan Puri Pusat . Munggwing pangaskara palebone malarapan antuk palebon SAWA PRANAWA , utawi SAWA RSI utawi palebon ngalanglang . Sawa pranawa atos nyane ; “ Eedan ngagah layon , nenten lunga ngagah ka Nusa Panida , kangkat wantah antuk ngendagin ngulapin sakeng Salwa Agung utawi Pempatan Agung ring jagat Tarukan .
Wekas kasuwen – suwen lawas pungkuran baya gering lan biyutane taler boya reredan nibenin sakuwub sametone di Tarukan ,raris kanjek warsa 1989 masehi malih ngawawanin mamendak Dewa Hyang Pekak Kompyang Mantuk Di Nusa , riantukan manut baos beras jinah Pekak Kompyang Mantuk Di Nusa kantun ngarebeda budal ka Tarukan , sangkaning boya kangkat munggwing mamendake antuk nyawang sakeng selat sagara . Punika awanan Ida kantun ngayah ring Pura Dalem Peed riantukan durung kapica mapamit . Pungkuran raris ngawawanin malih mamendake pinih untat punika , sameton Tarukan rawuh pedek tangkil nodya ka Pura Dalem Peed . Pamargine narung sagara ngawit munggah Skoci utawi But sakeng pelabuhan Padangbai lantur tedun ring pasisi Buyuk Nusa Panida . Raris sakeng Buyuk nyarter motor ( mobil ) nyujur Pura Dalem Peed . Rawuh maring Dalem Peed , kula gotra sameton warih Dewa Kabetan pedek nangkil makemit a wengi ring Pura Dalem Peed . Benjang semengane Dewa Hyang Pekak Kompyang Mantuk Di Nusa pamita majeng Batara Dalem Peed , nuli nyujur pasisi Buyuk saha munggah Skoci rawuh nireng pelabuhan Padangbai , lantur munggah motor mawali ka Puri Pusat Tarukan . Sarawuhe ring Puri Tarukan , Dewa Hyang Pekek Kompyang Mantuk Di Nusa jenek malinggih ring Marajan Puri Pusat , katuran upasaji pamendak ngenteg linggih saha puja wali patirtan . Duk punika rikala puja astawa enteg linggih ana cihna makanten kupu – kupu akweh pisan ngebekin wawidangan mandala Marajan Puri Pusat . Maka sami palinggih lan piyasan wenten pagulanting kupu – kupu . Maring ider – ider , langse , pedapa , lawang palinggih jantos maring tatab – tatab palinggih , turmaning parupan nyane ma endahan kabinawa pisan . Wenten kupu – kupu cerik saih nyawane , saih tabuane , saih bungan kacang , saih bungan waru tur warna - warni , wenten mawarna putih , barak , kuning , selem, rakrik . poleng saha rupan nyane taler ma endahan . Wenten sakadi punggal gajah , sakadi sudang utawi mina , sakadi punggal lelawah , sakadi pawakan jukung muwah akeh nyane marupa kupu – kupu biasa sane sering panggih ring tetamanan sekar nedeng kembang .
LANTURANG MALIH pepaosane munggwing I Dewa Ketut Gesiuh putra Puri Pusat kaping kalih sane gumana jenek malinggih ring Puri Pusat pinaka pawaris panyilih dii , sampun alaki rabi lawan Ni Desak Putu Dawan sakeng Puri Batan Wani turmaning sampun ngendahang putra nenem diri mawasta ;
1 . Kaping siki I Dewa Made Tokolan .
2 . Kaping kalih I Dewa Nyoman Kipit .
3. Kaping tiga Ni Desak Ketut Gedor .
4 . Kaping papat Ni Desak Putu Tamas .
5 . Kaping lima I Dewa Made Pokel .
6 . Kaping nenem Ni Desak Nyoman Ceper .
#. Munggwing putra kaping siki inggihan Ida I Dewa Made Tokolan alaki rabi lawan Ni Desak Nyoman Basug sakeng Br . Puseh Pejeng , ngedahang putra kalih diri maparab ;
1 . Kaping siki I Dewa Putu Rukin sakewanten Ida lebar wawu munggah anom jejaka . 2 . Kaping kalih Ni Desak Made Cuklek inalap rabi olih I Dewa Kompyang Gading saking Puri Bucu ring tempek tengah Br . Tarukan .
#. Nganining putra kaping kalih sane mawasta I Dewa Nyoman Kipit alaki rabi lawan Ni Desak Putu Cuklek sakeng Br . Bendul Klungkung , kamanggehang nyentana saha wenten endah putra a diri maparab Ni Desak Putu Oka Jantuk inalap rabi olih Anak Agung sakeng Akah sakewanten parabiane nenten ngendahang putra utawi bekung .
#.Kadi Ida putra kaping tiga sane maparab Ni Desak Ketut Gedor inalap rabi olih I Dewa Putu Binder sakeng Puri Semanggen .
Kinucap putra kaping papat sane mapesengan Ni Desak Putu Tamas inalap rabi olih I Dewa Putu Balik sakeng puri Tanggu tempekan kelod Br . Tarukan , wit bencahan sakeng sameton jagat Cagaan .
#. Kojaran putra kaping lima yukti Ida I Dewa Made Pokel alaki rabi kaping pisan lawan Ni Desak Putu Cuklik sakeng puri Kanginan tempek tengah Br . Tarukan , ngendahang putra lanang kalih diri ,mawasta :
I Dewa Putu Raka ( De Tu Pugeg).
I Dewa Made Asta ( De De Pugig ).
Munggwing rabi kaping kalih ma adan Ni Made Rida sakeng jagat Serongga Gianyar , ngendahang putra istri a diri,mawasta:
Ni Desak Putu Swati ( Sak Tu Kapri)
Samaliha rabi kaping tiga ngaran Ni Made Narwi sakeng Dusun Dungkap Nusa Panida , ngendahang putra istri a diri mawasta :
4 .Ni Desak Made Kerti ( Sak De Nusa ) . Punika taler rabi kaping papat mawasta Ni Desak Putu Seleh sakeng Puri Rangki ngendahang putra istri a diri,mawasta :
Ni Desak Made Murni ( wekas kaloktah Niyang Anom).
KAWUWUS putra Puri Pusat sane mawasta I Dewa Putu Raka alaki rabi lawan Ni Desak Putu Celeng sakeng Puri Tanggu tempek kelod Br . Tarukan, turmaning salantur nyane Sang Kalihan magingsir sakeng Puri Pusat , anangun Puri Kajanan magenah baleran Puri Pusat selat tembok panyengker sampun ngendahang putra limang diri maparab ;
1 . Kaping siki Ni Desak Putu Munik inalap rabi olih I Dewa Putu Baruk pangalu sakeng jagat Dukuh Pejeng Kawan saha wekasan pertsentanan nyane anangun Puri Abing ring telanjakan tebe Puri Bucu .
2 . Kaping kalih Ni Desa Made Munek inalap rabi olih I Dewa Putu Binder sakeng Puri Semanggen , sakewanten durung ngendahang sentana parabiane mabelasan riantuk Ni Desak Made Munek mamenter mawali budal ka Puri Kajanan utawi mulih daha . Sajeroning Ni Desak Made Munek mulih daha ring Puri Kajanan , kacarita ring Puri Kajanan wenten ingon – ingon puri upapiraning Ni Desak Putu Munik marupa Geeng Senget Mageng . Kancit yan sapunapi indike , barber tan pajamuga Senget Mageng punika polih nangsekin Ni Desak Made Munek sinamabi ngencer tungtungin silit Idane gumentos wetenge beseh . Antuk sakite rahat pisan , raris kakaryanin tamba loloh kuwud madaging manas lan cuka pakardin zat kimia,kamolihang antuk nyolong padruwen I Dewa Oka Tokolan ring Puri Pusat , ulih Ni Desak Putu Rai Belad. Raris kadi Ida Ni Desak Putu Munik nuli lolohe punika ka aturin arine mangda ka inum jantos telas . Dereng telas lolohe gelisan arine mamulisah nyungkanang waduk , mawastu arine ngemasin seda .
3 .Kaping tiga I Dewa Ketut De alaki rabi kaping pisan lawan Ni Nyoman Sukani ,warga pasek Salahin ring tempek tengah Br . Tarukan , ngendahang putra nenem diri maparab:
Desak Putu Kerti ( sak Tu Liong)
Dewa Made Kirta Kabetan.
Dewa Ketut Lara.
Dewa Nyoman Anom.
Desak Ketut Dari.
Dewa Putu Widnyana ( De Tu Nik Penyu)
. Munggwing rabi kaping kalih mawasta Ni Desak Made Leset , sapihan sakeng Sawa Gunung Pejeng Kangin ngendahang putra istri a diri,maparab:
g.Desak Putu Muter ( Sak tu Galuh )
4 . Kaping papat Ni Desak Putu Rai Belad inalap rabi I Dewa Putu Goyor sakeng Puri Semanggen .
5 . Kaping lima I Dewa Made Kantor alaki rabi kaping pisan lawan Ni Made Rati sakeng pradesa Nyalian Banjar angkan Klungkung , nanging tan ngendahang putra . Nganining rabi kaping kalih sakeng Taman Bali Bangli mawasta Desak Nyoman Taman Bali taler bekung.Punika awanan malih ngalap rabi kaping tiga maparab Ni Desak Made Sayang sakeng pradesa Kembang Merta Buleleng , saha salantur nyane Sang Kalihan jenek jumeneng ring Kembang Merta jantos ngendahang putra limang diri , maraga istri maka sami,mawasta:
a.Desak Putu Merti.
b.Desak Made Sri Widari.
c.Desak Nyoman Siti.
d. Desak Ketut Swarsiki.
e. Desak Putu Sucita.
MUNGGUH putra Puri Pusat sane mawasta I Dewa Made Badoh alaki rabi lawan Ni Desak Ketut Gendor sakeng Puri Semanggen ,ngedahang putra kutus diri . Salantur nyane Sang Kalihan magingsir sakeng Puri Pusat anangun Puri Pondak . Para putra Puri Pondok mawasta;
1. Kaping siki Ni Desak Putu Renteb Kanya .
2 . Kaping kalih Ni Desak Made Kelepon inalap rabi olih I Dewa Putu Degeng sakeng jagat Dukuh Pejeng Kawan saha salantur nyane kapica tegak karang puri olih panglingsir Puri Pondok antuk sayange ring putra istri. Punika indike sangkaning magenah ring dangin telabah sakeng Puri Pondak , saha Purine kabaos PURI DANGIN TELABAH .
3 . Kaping tiga I Dewa Nyoman Goyoh alaki rabi lawan Ni Desak Nyoman Dapet sakeng Jagat Melayang Pejeng Kaja ngendahang putra nenem diri,madan :
Dewa Putu Mustika { De Tu Lanus }
Dewa Made Oka Kabetan.
Dewa Nyoman Subadi ( De Man Sero ).
Dewa Ketut Subroto ( De Tut Sere).
Desak Putu Tirta ( Sak tu Mlayang).
Dewa Made Kader.
4 . Kaping papat Ni Desak Ketut Longker inalap rabi olih I Dewa Putu Gudug sakeng Puri Batan Wani .
5 . Kaping lima Ni Desak Putu Ipin inalap rabi olih I Dewa Nyoman Gejer sakeng Br . Inataran Pejeng . Munggwing tegak Purine delod Pura Panataran Sasih .
6 . Kaping nenem I Dewa Made Karya alaki rabi lawan Ni Desak Ketut Raka sakeng Puri Rangki saha salantur nyane magingsir sakeng Puri Pondok anangun Puri delodan Puri Telabah kabaos PURI DUWUR PANGKUNG ,ngendahang putra nenem diri ,madan:
Desak Putu Rusni ( Sak Tu Nori).
Desak Nyoman Yapen.
Dewa Ketut Oka Merta ( De Tut Ding ).
Desak Putu Kasih.
Dewa Nyoman Ngurah Swastika ( De Man Cegur ).
Desak Ketut Suprapti ( Sak Tut Yeyut ).
7 . Kaping pitu I Dewa Nyoman Ruken alaki rabi lawan Ni Desak Nyoman Teblun sakeng puri Kawan ngendahang putra limang diri madan:
a.Desak Putu Suri.
b. Dewa Made Oka Sura.
c.Desak Ketut Alit.
e. Dewa Putu Dana Murja.
f. Desak Made Rati. Salanture wus lawas dalu pertisentanan Sang Kalihan anangun Puri baleran Puri Madya kabaos PURI LOR .
8 . Putra kaping kutus maparab I Dewa Ketut Pater alaki rabi lawan Ni Desak Made Gembrong sakeng Puri Semanggen ngendahang putra nenem diri madan :
Desak Putu Murni ( Sak Tu Cenik).
Dewa Nyoman Putra ( De Man Bendi ).
Desak Ketut Alit ( Sak Tut Saplug).
Dewa Putu Arsawan (De Tu Lemes ).
Dewa Made Putra ( De De LUK).
Dewa Nyoman Ukir. Salantur nyane Sang Kalihan saha para putra sami magingsir sakeng Puri Pondok anangun puri baleran Puri Pondok selat tembok panyengker kabaos PURI MADYA , ring selagan Puri Pondok lawan Puri Lor .
Puput rawuh amuniki dumun anggen wimba tinut daging cakepan BABAD kaping kalih . Pungkuran tegepang malih risampune para warih ka upakara NGASTI .
KETUS BENCANGAH BUN PURI KRATON DEWA KABETAN ANENG TARUKAN . PARA WARIH PURI RANGKI.
KOCAP MANGKIN kadi Ida I Dewa Gede Nyoman Gemuh jenek gumana malinggih ring Puri Rangki kawuwus alaki rabi lawan Ni Desak Nyoman Kawi sakeng jagat Sawa Gunung Pejeng kangin . Munggwing parabian Sang Kalihan , manawita sada suwe kawentenan nyane durung ngendahang sentana . Raris antuk pageh puguh kayune I Dewa Gede Nyoman Gemuh semadi nakti ring Pura Ukur – ukuran Sawa Gunung kedeh suluk pinunase mangdene kaswecanin , angapti prasida ngendahang sentana . Puputing idep , pangaptin Idane sayuwakti kaswecanin dening pageh uleng kayune nyabran latri pedek semadi nunas ica .
Salantur nyane parabian Sang Kalihan ngendahang putra nenem diri ma aran ;
1 . Kaping siki I Dewa Putu Tunas Besar embas sawatara warsa 1840 .
2 . Kaping kalih I Dewa Made Gambir , kewanten Ida lebar wawu munggah anom .
3 . Kaping tiga Ni Desak Nyoman Anom inalap rabi olih Anak Agung Gede Rai sakeng Br , Pande Pejeng ngendahang putra maparab Anak Agung Gede Raka alaki rabi lawan Ni Desak Made Gero sakeng Puri Dukuh Tarukan .
4 . Kaping papat Ni Desa Ketut Geliling inalap rabi olih I Dewa Kompyang Besar sakeng Puri Pusat pinaka rabi kaping tiga .
5 . Kaping lima Ni Desak Putu Rati , kewanten Ida newata wawu ngangkas ngraja swala.
6 . Kaping nenem Ni Desak Made Rai Rakti inalap rabi olih I Dewa Agung Pamayun Guliang kang abiseka Dalem Pamayun Putra Nateng Soma Nagara Kaping VI, ngendahang putra a diri maparab Cokorda Sunteg , saha lanturnyane jenek malinggih ring Madangan .
HENENGAKENA PUNANG KATHA.
CINARITA PAKIBEH JERONING PURI NATENG JAGAT PEJENG . Ri huwus I Dewa Gede Kompyang Besar tabeng wijang Puri Soma Negara , kapidanda kaselong ka Nusa Panida , raris I Dewa Putu Tunas Besar kapakusara manggeh tabeng wijang pangabih murdeng jagat Pejeng duk sapamadeg I Dewa Agung Pamayun Sudha .
TATWA carita rudah haab jagate ring Bali , saha wiweka winayeng sowang - sowang Murdeng jagat , sayan – sayan nincapang ngutsahayang ngalimbakang wawidangan kodag kuasa , maka cihna caciren – ciren :
# . Sawatara warsa 1798 MASEHI, Nateng Taman Bali inggihan I Dewa Gede Raka ngalurug ngebug Nateng jagat Bangli inggihan Nata Ratu Ni Dewa Ayu Den Bancingah tinampih sareng pernah kaputra wiwit sakeng jagat Nyalian yukti putran I Dewa Gede Oka Sudira utawi I Dewa Gede Tangkeban , mawasta I Dewa Kuat raris taler kapungkus I Dewa Gede Tangkeban olih Dewa Ayu Den Bencingah. Jeroning matandang jurit gumentos Ratuning jagat Bangli punika kasatan nuli malayu masinutan ring Gunung Kehen . Yadiastun kasinahan nyane Ni Dewa Ayu Den Bancingah sayuwakti wantah ipen Ida I Dewa Gede Raka Taman Bali . Duk punika I Dewa Manggis Sakti nateng Gianyar kaping siki ngawantu nampih murdaning jagat Taman Bali . Lantur pungkuran risampune Nateng Taman Bali I Dewa Gede Raka molih gatra , dening ipene Ni Dewa Ayu Den Bancingah lawan I Dewa Gede Tangkeban masinutan ring Gunung Kehen , raris I Dewa Gede Raka Taman Bali ngawawanin malih ngarejek ipene ka Gunung Kehen . Rikanjekan kawawanin karejek, munggwing Ni Dewa Ayu Den Bancingah lawan I Dewa Gede Tangkeban makilesan nyinut beneng kelod sakeng Kehen , macunduk lawan Cokorda Agung Mas senopati bala wadwa Gianyar sakeng desa Mas Ubud . Raris mapagut yudane ring wawidangan jagat Sidan , nuli mangruwek matanding jurit . Sajeroning matanding jurit , Cokorda Agung Mas keni karancap olih wadwa Kehen niscaya ngemasin seda ring Sidan . Miragi sedan Ida Cokorda Agung Mas , mawastu jerih kayun Ida I Dewa Manggis Geredeg nateng Gianyar kaping siki , buat narka Ni Dewa Ayu Kehen pacang lantur ngalurug ngarejek Puri Gianyar . Punika awinan I Dewa Manggis Api nateng Gianyar kaping siki matulak nilar Puri Taman Bali , ka iring olih pangabih andel – andel Gianyar sane maparab I Gusti Telabah lan I Gusti Culik . Sapari indikan patilar Murdeng jagat Gianyar punika, awanan I Dewa Gede Raka Taman Bali salit arsa duhkita , nyengguhang Nateng Gianyar wus dusta linyok majeng murdeng jagat Taman Bali . Ngawit punika paiketan pasawitran Gianyar – Taman Bali pegat tur matungkas macucuh .
# . Sawatara warsa 1809 masehi I Dewa Gede Raka Taman Bali ngarejek nyandak pamargin I Dewa Agung Putra Kusamba rikanjek ayat lunga majenuk ka Puri Gianyar . Riantuk tan pajanuga nadaksara karejek turmaning I Dewa Agung Putra nenten tahen ri tuwas kayune pacang karejek olih wadwa Taman Bali , saha palungan raja putra Klungkung boya lunga buat matandang yuda awanan wadwa pangiring Klungkung rumasa kasatan magutin bala yuda Taman Bali sane tegep busana jurit saha sarwa senjata yuda , gumentos I Dewa Agung Putra Kusamba ngemasin seda ring jagat Belahpane . Dening sedan raja putra Klungkung ring Belahpane punika ,ngawetuang erang duhkita kayun Ida I Dewa Agung Sakti murdeng jagat Klungkung duwaning putran Idane karejek kasedaang nora wenten larapan matungkas mameseh . Nuli raris Nateng Klungkung magagebug ngalurug panegara Taman Bali , katampih olih murdeng jagat Gianyar lan Nateng Gunung Kehen Ni Dewa Ayu Den Bancingah sane pinih erang tur mapisarat pisan kayune ngagen ngawalesang kasat Idane duk yudane ring Bangli . Duwaning Taman Bali karebut kakembulin , tan dumade I Dewa Gede Raka kasatan tur malayu masinutan ring jagat Gaga ,masayuban ring sametone mareng Puri Murdaning jagat Gaga kang warih I Dewa Pindi . Kala punika riantuk erang kayune kalintang , tumuli Ni Dewa Ayu Den Bancingah misreng misaratang pisan nguntit nguber ngaruruh palayun I Dewa Gede Raka , saha sigra malebonin Puri Gaga . Raris sajeroning matandang jurit ring Puri Gaga , pamuput I Dewa Gede Raka prasida kaprajaya kabancut olih Ni Dewa Ayu Den Bancingah .
Ngalantur pungkur wekas duk I Dewa Ngurah Pahang lan I Dewa Made Raka yukti putran I Dewa Gede Putra nateng Gianyar kaping IV abiseka Dewa Manggis kaping VII utawi pungkuran Dewa Agung Mantuk di Satrya parab Ida tiyos,wus prasida nyinut malayu sakeng Satrya Klungkung genah Ida kasekeb sareng ajine kadi Ida Dewa Agung Mantuk di Satrya,malarapan antuk kasudiran Cok. Gede Sukawati punggawa Ubud lawan I Dewa Made Rai punggawa Tegalalang. Wus jenek ring Gianyar , raris I Dewa Ngurah Pahang kabiseka nateng Gianyar kaping V,ngentosin Dewa Agung Mantuk di Satrya. Munggwing pisarat pakodag Dewa Ngurah Pahang,praya buat ngutsahayang ngawaliang wawidangan jagat Gianyar sane kajarah olih nateng jagat tiyosan minakadi : nateng Bangli, Klungkung, Mengwi lan Badung. Indike punika raris I Dewa Ngurah Pahang kanjek tanggal 24 Maret 1893 ngarawuhang sewalapatra marep ring Tuan Danmenbargh pinaka Residen Idia – Belanda sane magenah ring kuta Singaraja. Daging sewalapatrane masadok buat Nateng Gianyar praya sigra agia ngawaliang wawidangan Gianyar sane wus ketes kajarah minakadi Payangan , Petak , Selat ,Apuan,Sidan , Tulikup, Semeti lan Pejeng majalaran antuk mapagut matandang yuda.
Duk punika murdeng jagat Pejeng inggihan I Dewa Agung Pamayun Sudha tan sah tabeng wijang pangabih andel – andel Puri Pejeng kang upasadnya I Dewa Putu Tunas Besar sakeng Puri Rangki Tarukan boya nahen ring panyengguh Nateng Gianyar.
Kawuwus kala nguni Nateng Gianyar kang angaran I Dewa Manggis Jorog utawi Dewa Manggis Kuning kaping V , risampune ngarejek kasor Puri Soma Nagara , saha Purine kawawa olih Nateng Gianyar .Kadi Ida Dalem Pamayun Putra kaping VI kasekeb ring Gianyar,turmaning kang ari maparab Dewa Agung Rai Pinatih ( Cok . Rai Pinatih)kaselong ka Nusa Panida sareng rabi lan sapertisentana jatos Ida lebar ring Nusa Panida saha kapendem ring jagat Maos.Mumggwing rabi lan para warih Ida raris mawali ka Pejeng ,tur kapica genah ring Saren tepi kawuh Puri Agung Pejeng. Sakewanten kasuwen – suwen munggwing kodag kuasa pangwawa jagat Pejeng tumuli raris kapraksayang ring Ida I Dewa Agung Pamayun Sudha , gumanti mangdene ngaraksa pariksa ngamurdaning jagat Pejeng . Malarapan bisama Nateng Gianyar punika , raris I Dewa Agung Pamayun Sudha ngawangun Puri anyar magenah numbak selat margi agung lawan tegak Puri Soma Nagara utawi delod Pura Manik Corong , kabaos Puri Agung Pejeng . Pinaka murdaning jagat Pejeng,kadi Ida I Dewa Agung Pamayun Sudha,nenten abiseka mapungkusan “ Dalem Pamayun Putra kaping salantura”.
Raris kadi mangkin Puri Agung Pejeng kasengguh sampun purun prasangga lawan Nateng Gianyar riantuk ngiket paswitra kanti lawan pangwawa jagat Taman Bali Bangli . Majalaran antuk wiweka kadi punika awanan Ida Corda Gede Sukawati murdeng jagat Ubud katampih olih I Gusti Ngurah Made Jelantik murdeng jagat Belahbatuh katitah olih Nateng Gianyar mangda a ngerugaken Puri Agung Pejeng . Raris kanjek tanggal 16 April warsa 1893 sampun pada sergep bala yuda dulang mangap pilih tanding Ubud lan Belahbatuh agia sigra ngarejek jagat Pejeng . Nuli jagat Pejeng karuwek sakeng tepisiring kelod olih bala wadwa Belahbatuh , saha macepuk maruket yudane ring jaba Pura Kebo Edan sisi kelod. Sakeng tepisiring kauh makuwug yudane ring wates jagat Banjar sala lawan Tatiapi . Bala wadwa Ubud kang senopati Cokorda Gede Sukawati saha senjata pusaka Ki Baru Mussen utawi Ki Baru Gunung Lebah
Tan kacarita munggwing rames yudane . Riantuk wadwa Pejeng magutin satru ring kalih kalangan yuda , mawastu wadwa Pejeng rumasa kasatan , saha sisan mati pada malayu nyingsetang dewek turmaning lantur rarud sareng kulagotran nyane , ngelong bakti matilar sakeng jagat Pejeng , minakadi kula gotra Ngakan Gedong Arta Br, Pande Pejeng , rarud masinutan ring jagat Pengosekan . Kula warga sameton Anak Agung Gede Raka Br . Pande Pejeng rarud masinutan ring jagat Tohpati – Banjarangkan – Klungkung . Kula warga sameton Bagawanta Ida Pandanda Wayahan Bun Br. Puseh Pejeng rarud masinutan ring jagat Nyemban .
Duwaning bala jurit Pejeng telas malayu antuk jerihe , raris sadurung wadwa Ubud rawuh ngalebonin Puri Agung Pejeng , munggwing I Dewa Agung Pamayun Sudha lawan kula warga sameton Puri Agung sami ka iring olih para panjak Pejeng sane kantun subakti ring Ida Dewa Agung , tegep jangkep makta isin puri lan pusaka – pusaka pajenengan sami wus kaboyong matilar rarud . Pamargine nyoloh beneng kangin sakeng Pejeng ngalintangin jagat Kelusu. Duwaning sa dangin Tukad Pakerisan delod jagat Siangan,sergep siaga suryak – suryak wadwa panjak jagat Bitra,gumanti panjak I Dewa Kamasan tosning Dewa Manggis Kuning Beng. Punika awanan palayune nyujur jagat Sawa Gunung ,tumuli raris nedunin tukad Pakerisan rawuh ring desa Suwat Siangan lantur beneng kaler ngalintangin jagat Kabetan , Madangan , Petak rawuh ring jagat Songlandak beneng kangin nedunin pakung nyujur jero kuta Bangli nunas pasayuban majeng pangwawa jagat Bangli .
Munggwing tabeng wijang andel – andel Puri Agung Pejeng inggihan Ida I Dewa Putu Tunas Besar , antuk ngeton Dewa Agung Idane sampun malayu nilar puri , nuli raris Ida kang tabeng wijang taler matilar rarud sakeng jagat Tarukan sareng rabi lawan para putra sami . Duk punika putra pinih alit ngaran Ni Desak Ketut Monteg mayusa sawatara 9 warsa , taler sareng matilar sakeng puri Rangki . Pamargine beneng kaler sakeng Tarukan ngalintangin carik – carik subak Belong rawuh ring Desa Sanding lantur nyujur jagat Tegalsaat nedunin Tukad Pakerisan rawuh ring jagat Kabetan nuli nyoloh beneng kaler ngetut wuri pamargin I Dewa Agung Pamayun Sudha rawuh mancunduk campuh lawan Dewa Agung Pejeng ring jero kuta Bangli.
Manawita sawatara tigang sasih masinutan ring jero kuta Bangli , wenten bisaman Murdeng jagat Bangli majeng I Dewa Agung Pamayun Sudha gumanti Nateng Bangli mapica genah ring nampeking Pura Dalem Belingkang , mangdene Dalem Pamayun Pejeng a nangun puri ring genahe punika . Dening sampun kapica genah , raris I Dewa Agung Pamayun Sudha makinkinan pacang nyujur genahe punika . Kala punika Ida Dalem Pamayun Pejeng nganika ring panjak pangiring Idane , munggwing para panjak sane kula wargan nyane wenten kantun kecag jenek ring Pejeng utawi tan nyarengin matilar kalugrayang mangdene mawali macampuh lawan kula wargan nyane . Punika awanan raris I Dewa Putu Tunas Besar saha para putran Idane sami mawali budal ka Tarukan .
Munggwing I Dewa Agung Pamayun Sudha risampune rawuh ring genah sane kapica , raris para panjak Pejenge ngawit nerbak alas nuli anangun puri buat I Dewa Agung Pamayun Pejeng. Duk punika kawentenan Pura Dalem Belingkang dahat kaon pisan . Duwaning Purine nampeking palinggih Pura , raris I Dewa Agung Pamayun Sudha ngawangun mawali kabecikan Pura Dalem Belingkang ngaptiang dumogi ngamolihang karajengan . Salantur nyane rikanjek I Dewa Ngurah Pahang wus lebar nuli kagentosin olih arin Ida mawasta I Dewa Made Raka.Duk sapamadeg Dewa Made Raka,Penarungan ,Pagulingan,Mambal lan Abiansemal mawali kajarah olih nateng Badung lan Mengwi saha pacang ngalantur ngalebonin ngarejek jagat Ubun.Antuk gatra punika raris warsa 1899 Nateng Bangli katampih olih Dewa Agung Pamayun Sudha puri Belingkang taler nyarengin mawali ngarejek Desa Selat ,Apuan , Petak rawuh ring Madangan.
Kadi Ida I Dewa Putu Tunas Besar sarawuhe ring Tarukan , molih gatra buat pakibeh jagate ring Pejeng sampun degdeg ,duwaning Cokorda Gede Sukawati Ubud sampun ngamanggehang abiseka Cokorda Rai Panggul wiyakti arin Ida I Dewa Agung Pamayun Sudha sane pinih alit malinggih ring Puri Kajanan Pejeng , pinaka “ manca “ ring jagat Pejeng , a nungkul majeng pangwawa jagat Ubud . Samaliha Cokorda Rai Panggul kapica anak istri sakeng Puri Ubud , wus kawiwaha kerab kambe nyihnayang raket pakilitan sawitra kanti lawan sameton Puri Ubud . Tiyos ring punika taler kapica Bagawanta soroh Brahmana Manuaba sakeng Tegalinggah Belahbatuh , wantah kantun tunggilan sameton lawan Bagawanta Puri Ubud ,.
Ngawit punika pangwawa jagat Pejeng ngamanggehang Bagawanta wit Brahmana Manuaba sakeng Tegalinggah tosning warih Griya Padanda Gede Wayahan Buruan . Salantur nyane Padanda Tegallinggah ngawinangun Griya kaja kanginan sakeng tegak wit Puri Soma Nagara nguni , kasengguh Griya Gede Pejeng .
KABAOS risampune I Dewa Putu Tunas Besar sareng para putra sami mawali jenek ring Puri Rangki Tarukan, taler Ida kapakusara abiseka “ anglurah “ nungkul majeng Puri Ubud .
Wus punika pangwawa jagat Ubud , ngenahang telik tanem praya nilikin pari polah Manca Pejeng lan Anglurah Tarukan . Telik tanem inucap mawiwit sakeng sametonan Puri Ubud sane mawasta Cokorda Bima malinggih ring Belusung saha panjak sakeng Petulu lan Ubud .
Sapunika taler kalaning Cokorda Pamayun Sudha malinggih ring Petak , taler ngenahang telik tanem sakeng jagat Petek ring jagat Belusung gumanti nyandingin telik tanem Ubud . Sasuduke wantah ngitip pakibeh panjak Pejeng majeng pangwawa jagat Ubud . Pradene panjak Pejeng prasangga nulak nungkul majeng pangwawa jagat Ubud tur macihna panjak Pejeng kantun subakti majeng Dalem Pamayun Petak , pangawawa Petak arsa mawali ngarebutin jagat Pejeng sakeng kodag kuasa puri Ubud . Dening kasinahan nyane kajantenang munggwing panjak Pejeng wus dreda bakti nyiwi manca jagat Pejeng inggihan Cokorda Rai panggul sane nungkul majeng puri Ubud , awanan Cokorda Petak wangde ngawalesang marebutin jagat Pejeng . Ngawit duk punika ring jagat Belusung wenten kojaran Banjar Belusung Ubud ,Banjar Belusung Petulu lan Banjar Belusung Petak.
KACARITA KALA MASA pakodag wong Belanda ring nusa Bali . Kawuwus jagat Bali wus kajarah kuasa olih pakodag India – Belanda , kanjek warsa 1908 raris residen India – Belanda ngaran Ch. E. Saijer manggeh kontrolir ring Gianyar anangun titi gantung ring tukad woos , magenah ri luwah Pura Gunung Lebah Ubud utawi ring tukad Campuhan . Munggwing sasuduk titi gantung punika gumanti pinaka panyambung antaring pamargi , jeroning pabuate nyujur jagat Gianyar – Ubud – Payangan - Mengwi lan Badung . Paindikan pangayah karya kasar jeroning ngawangun titi gantung lan malinggahang margi , kalakonin olih para paguyub pakarya RODI tan mapituwas upah utawi pangayah paksa . Nganining pangayah rodi punika, gumana kapucuk , asing – asing wang angamong ayahan karang catu , wenang kapakusara ngalakonin ayahan karya rodi . Pradene ana wang angamong ayahan karang catu , nanging ipun tan prasida ngalakonin ayahan rodi , pastika karang catun ipun kacabut agia katimbalang ring wang tiyosan sane sumanggup ngalakonin ayahan rodi , irika ring Tukad Campuhan Ubud .
Antuk paridabdab punika raris kadi Ida I Dewa Putu Tunas Besar kang abiseka anglurah Ubud , katitah mangdene wang angamong ayahan karang catu ring sajebag wawidangan Idane , kajudi gumana nyarengin ngalakonin ayah rodi . Wilangan ayah rodi ring jagat Tarukan , akweh nyane 99 ayah karang catu , punika sami kapakusara ngalakonin karya rodi ring Campuhan Ubud . Sabilang pangayah rodi Tarukan lunga ngalakonin ayah rodi ka Ubud , annuli Ida I Dewa Made Jaksa wantah putran Ida I Dewa Putu Tunas Besar dahat praktiaksa sebet ngabih ngamanggalin panjak ayah rodi Tarukan rawuh ring genahe ngalakonin ayah rodi .
Pamargine sakeng Tarukan madarat ngalintangin carik subak Tubuh , ngungsi jagat Banjar Sala , raris ring jaba Pura Bukit Buwung ngalintang srejeng bet madurgama wenten pangkung jurang dalem matiti tiying duwang tugel , lantur nyoloh margi a nylonyongan ring tengahing srejeng bet punika kapanggih tukad Petanu nuli tedun tukad raris ngamunggahang nyunut srejeng abing rawuh ring Banjar Ambengan Peliatan . Pamargine lantur beneng kauh ngalintangin bencingah Puri Ubud , terus nyoloh beneng kauh rawuh ring Tukad Campuhan genahe ngayah rodi .
Awanan I Dewa Made Jaksa gumana ngateh ngabih pangayah rodi Tarukan lunga ka Campuhan , duwaning margi sane kalintangin dahat madurgama ngeres – ngeresin , mina kadi mareng titi tiying ring pangkung dalem ri tebenan Pura Bukit Buwung wus loktah sumbung maka genah Wong dusta duratmaka mamegal , saha amunggal mancut urip . Wiyakti genahe punika dahat serbi tur singid antuk maparisolah corah ngepet pati wang kapatitis , dening bangkene dangan antuka nyingsetang , wantah pulang entungang ring pangkung dalem punika.
Riantuk kadi punika kawentenan margine sane kalintangin , sayuwakti jantos puput galahe ngamargiang rodi , maka sami pangayah rodi Tarukan lasya rahayu tan wenten mangguhang baya .
Sajeroning I Dewa Made Jaksa sebet midabdabin pangayah rodi Tarukan , ka aksi olih pangwawa jagat Ubud , turmaning pangayah rodi Tarukan katon dreda bakti pisan majeng I Dewa Made Jaksa . Indike punika maka awanan , risampune I Dewa Putu Tunas Besar nyangsan werda yusa , raris Murdeng jagat Ubud ngamanggehang I Dewa Made Jaksa pinaka anglurah ngentosin linggih ajin Idane wus werda yusa . Ngawit abiseka anglurah Ubud punika , munggwing pungkusan puspatan Ida I Dewa Made Jaksa , kategepin antuk ngawewehin pungkusan BESAR ri ungkur pesengan Ida manados I Dewa Made Jaksa Besar.
Kinucap duk sawatara warsa 1910 Nateng Gianyar I Dewa Made Raka utawi Dewa Manggis Kuning kaping VIII gumanti ngentosin linggih rakan Idane kang upasadnya I Dewa Ngurah Pahang , ngawentenang paparuman ring Puri Gianyar , saha ngulem para manca lan para anglurah sajebag wawengkon kodag kuasa Puri Gianyar, buat marumang indik ngarereh “ wong dira prakosa “ agia katitah ngamargiang dandapati mantuke ring I Gusti Putu Bona sareng arine I Gusti Made Malong sane sampun maiket tegul kletek ring jaba Puri Gianyar,duwaning kasengguh lenggana dusta corah majeng Nateng Gianyar . Munggwing anglurah Tarukan kasade kalunganin olih I Dewa Made Jaksa Besar . Sarawuhe I Dewa Made Jaksa Besar ring bencingah Puri Gianyar kapanggih Dane I Gusti Putu Bona sareng arine I Gusti Made Malong mategul makletek ring bencingah Puri . Dahat kagiyat Ida anglurah Tarukan ngaksi Dane Sang kalih , katibenin dandapati , sa antukan anglurah Tarukan weruh pisan munggwing kawentenan parisolah Dane kakalih , wiyakti tan nahen maparilaksana corah.
Guna kriya I Gusti Putu Bona lan I Gusti Made Malong ngarahinane , wantah Dane pinaka Sedan abian Puri Belahbatuh, gumanti nyedanin padruwen Puri Belahbatuh sane wenten ring Tarukan . Ri naapkala Dane Sang Kalih lunga nureksain padruwen Belahbatuh ka Tarukan , pangojog Dane Kalih , pinih riyin rawuh pedek tangkil ka Puri Rangki buat masayuban ma sasanjan. Antuk sering – seringe pamargine kadi punika, jantos Dane Sang Kalih wawuh caluh maguyuban ring Puri Rangki , tan bina sakadi rooban Puri. Nyangsan suwe nyangsan caluh wawuh pagubugan Dane Sang Kalih ring jagat Tarukan, gumentos maka sami warga sameton satrya ring Tarukan wawuh lulut paswitrane, napi malih Sang Kalih dahat oneng majudi matatajen.
Kawentenan kadi punika ngawinan Ida I Dewa Made Jalsa Besar kadi purun langgah nunas jiwa pramanan Sang Kalih pacang anggen Ida juru kurung ring Puri Rangki Tarukan, saha pasubaya, nyadia purun nanggap nandaang pamidanda Dane Sedan Sang Kalih,pradene pungkur wekas Sang Kalih mawanti malih maparisolah dusta corah. Indike punika Ida I Dewa Made Jaksa Besar lascarya sumanggup dados pangentos wala buat nanggap nandaang pamidanda pati Sang Kalih.
Risampune Sang Kalih kapicayang ring I Dewa Made Jaksa Besar,raris Ida mawali budal ka Tarukan ka iring Dane Sang Kalih. Wus jenek Dane Sang Kalih ring Tarukan,kapica tegak karang puri magenah delod Puri Semanggen utawi baleran Puri Batan Bingin.Kengin genahe punika pecak tegak karang ancak saji Puri Kraton Satrya Kabetan duke nguni.
MALIH WALININ LANTURANG baosang kadi Ida I Dewa Putu Tunas Besar ring Puri Rangki ,kawuwus alaki rabi kaping pisan lawan Sang Ayu Darma sakeng Br. Intaran Pejeng ,nanging tan ngendahang sentana . Duwaning asapunika raris I Dewa Putu Tunas Besar ngalap rabi kaping kalih mapesengan Sang Ayu Alus gumanti pernah ari sodet Ida rabi kaping pisan wit guru rupaka tunggil utawi mamadu Raka Rai ,saha ngedahang putra petang diri ngaran;
1. Ni Desak Putu Kompyang, inalap rabi olih I Dewa Putu Tarukan sakeng jagat Cagaan Pejeng Kangin kasinanggeh kerab kambe nyentana turmaning kapica tegak karang puri lan catu. Salantur nyane nangun puri ring teben Pura Puseh Desa Tarukan kawastanin Puri Sor Pura , saha sampun ngendahang putra istri kalih diri mapesengan ;
a. Ni Desak Putu Besog inalap rabi olih I Dewa Made Kali sakeng jagat Cagaan Pejeng Kangin kasinanggeh nyentana ngendahang putra nenem,maparab; Ni Desak Putu Rawit, Ni Desak Made Rawet, Ni Desak Nyoman Rai, I Dewa Ketut Lanus , Ni Desak Putu Tagel ( tu Kecek),lan Ni Desak Made Tanjung.
b. Ni Desak Made Cuklek inalap rabi olih I Made Pugeg warga Pulasari sakeng jagat Sembuwuk Pejeng Kaja nanging tan ngendahang sentana utawi bekung.
2. Putra kaping kalih I Dewa Made Jaksa embas sawatara warsa 1873 .
3. Putra kaping tiga I Dewa Nyoman Suwe embas sawatara warsa 1878.
4. Putra kaping papat Ni Desak Ketut Monteg inalap rabi olih I Dewa Nyoman Suta sakeng puri Semanggen.
Baosang munggwing kawiadnyanan I Dewa Putu Tunas Besar, wiyakti Ida dahating waged sidi mahen sajeroning matatamban tur sakti mawisesa, sa antukan lintang teleb ngulik daging lontar pusaka “ Usada Sakti “ padruwen laluhure. Punika awanan Ida I Dewa Putu Tunas Besar dahat kawiryayang kasiwi olih para panjak , para pangoreg rooban muah para sametone sami. Napi malih Ida kamanggehang abiseka pangabih tabeng wijang andel – andel Puri Agung Pejeng.
Lantur baosang malih kawentenan I Dewa Made Jaksa ring Puri Rangki wus alaki rabi lawan Ni Desak Putu Tombong sakeng Puri Dukuh Tarukan ngendahang putra istri limang diri mawasta ;
1.Kaping siki Ni Desak Putu Seleh embas sawatara warsa 1913 ,inalap rabi olih I Dewa Made Pokel sakeng puri Pusat.
2. Kaping kalih Ni Desak Made Oka embas sawatara warsa 1916 , alaki rabi lawan I Dewa Nyoman Togog sakeng puri Kanginan kasinanggeh nyentana ,ngendahang putra kalih lanang istri ngaran; I Dewa Putu Gede Muscita lan Ni Desak Made Puri( Sak De Cenong ).
3. Kaping tiga Ni Desak Nyoman Bentek , kemawon Ida lebar wawu munggah anom duke nyaraka ring puri Ubud.
4. Kaping papat Ni Desak Ketut Raka embas sawatara warsa 1922, inalap rabi olih I Dewa Made Karya sakeng puri Pondok .Salantur nyane anangun puri Duwur Pangkung.
5 . Kaping lima Ni Desak Putu Bunter inalap rabi olih I Dewa Nyoman Gereh sakeng puri Dukuh Tarukan.
Kabaos munggwing I Dewa Nyoman Suwe wus magingsir sakeng Puri Rangki, jenek ring Puri Kanginan alaki rabi kaping pisan lawan Ni Wayan Rukti sakeng Tempek Kaja Tarukan soroh Pasek Salahin dajanan ngendahang putra petang diri mapesengan ;
1. Kaping siki Ni Desak Putu Cuklik inalap rabi oleh I Dewa Made Pokel sakeng puri Pusat pinaka rabi kaping pisan utawi prami.
2. Kaping kalih Ni Desak Made Dugler inalap rabi olih I Dewa Nyoman Mendir sakeng puri Semanggen pinaka rabi kaping pisan utawi prami.
3. Kaping tiga I Dewa Nyoman Togog alaki rabi nyentanin ka Puri Rangki, angrabinin Ni Desak Made Oka.
4. Kaping papat I Dewa Ketut Diran alaki rabi kaping pisan lawan Ni Made Kondri warga Pameregan, ngendahang putra kalih ngaran Dewa Putu Oka Suwardi ( De Tu Lindung) lan Desak Made Puspa ( Sak Geso ).
Munggwing rabi kaping kalih maparab Desak Putu Oka Taman ( Sak. Tu Jantuk) sakeng puri Semanggen,ngendahang putra istri lalima .
Kawuwus pungkuran I Dewa Nyoman Suwe angalap rabi kaping kalih sakeng jagat Sawa Gunung Pejeng Kangin , mawasta Ni Desak Ketut Alit kaprah kojaran Niang Gunung , kengin nenten ngendahang sentana . Wus punika I Dewa Nyoman Suwe malih ngalap rabi kaping tiga, sapihan sakeng Pasek Salahin dajanan Tempek Tengah Tarukan mawasta Ni Wayan Tuki ngendahang putra a diri maparab;
5. Kaping lima I Dewa Made Sumplit alaki rabi lawan Ni Made Gati soroh warga Ampeh Aji sakeng Tempekan Tengah Tarukan,madwe putra papat,mawasta; Ni Desak Putu Siti ( tu Agem), I Dewa Made Suwarta ( Dodet),Ni Desak Nyoman Tirta ( man Unyil),lan Ni Desak Ketut Jasa alaki-rabi ke Cagaan.
IKI amatra tatwa carita Ni Wayan Tuki inalap rabi olih I Dewa Nyoman Suwe . Kinucap Ni Wayan Tuki riyinan alaki rabi lawan I Wayan Dana , gumanti kula gotran nyane pateh soroh Pasek Salahin dajanan, ngendahang pianak daduwa luh muani maparab ;
1. Kaping siki Ni Wayan Singid .
2. Kaping ruwa I Made Pangid . Wekasan amanggeh Pamangku ring Pura Puseh Desa Tarukan . Rikanjek wus aputra kalih diri punika , Ni Wayan Tuki molih matemu samara lawan I Dewa Nyoman Suwe . Malarapan samara dudu punika mawastu mobot Ni Wayan Tuki gumentos embas Kang Rare , kasinanggeh putran I Wayan Dana kaping tiga mawasta Ni Nyoman Sukani. Adeg rupan nyane Ni Nyoman Sukani tan madoh sakeng adeg – adeg Ida I Dewa Nyoman Suwe. Rihuwus Ni Nyoman Sukani mayusa lintang tigang sasih ,munggwing I Wayan Dana lascarya ledang arsa ngaturang Ni Wayan Tuki manjing ka Puri Kanginan maka pangayah alaki rabi lawan I Dewa Nyoman Suwe , saha rare barak Ni Nyoman Sukani taler ka upapira ring Puri Kanginan jantos munggah bajang,nuli inalap rabi olih I Dewa Ketut De sakeng Puri Kajanan.
Kawentenan I Dewa Nyoman Suwe ,gumanti Ida dahat teleb ngamargiang daging pusaka lontar “ Usada Sakti “,mawastu Ida lintang sakti mawisesa tur waged sidi mahen jeroning ma tataban .Kocapan saderenge Ida I Dewa Nyoman Suwe jumenek winangun puri Kanginan ,kengin wenten wang Tarukan sane nyandingin kawisesan Ida ,sakeng kula warga soroh Ampeh Aji, ma adan I Gede Bara . Paindikan pada ngagem kawisesan , kengin I Gede Bara lawan I Dewa Nyoman Suwe sakadi matungkas jeroning ngelarang kawisesan, minakadi I Dewa Nyoman Suwe ngelarang aji pangiwan “ balian sakti mausada”. Munggwing I Gede Bara ngelarang kawisesan berawa aji ugig ngawe weci. Duwaning I Gede Bara rumasa kasatan jeroning kawisesan mawastu jerih manah ipun jenek gumana ring Tarukan, tumuli matilar kesah sakeng jagat Tarukan lawan sakula gotra pertisentanan nyane,nuli jumenek ring jagat Benawah.
Sapatilar I Gede Bara,nenten wenten sakeng kula warga soroh Ampeh Aji sane purun jenek ring tegak pakarangan I Gede Bara punika riantuk karange kalintang angker kabinawa madurgama ngares – eresin pisan. Sangkaning asapunika kawentenan nyane, raris wantah Ida I Dewa Nyoman Suwe kemawon sane purun jumenek magenah ring tegak karang I Gede Bara punika.
Risampune tegak palemahan nyane kagubar ka upakarain pacaruan balik sumpah,raris I Dewa Nyoman Suwe anangun puri anyar sane kabaos PURI KANGINAN.
KETUS BENCANGAH WIT BUN PURI KRATON DEWA KABETAN RING TARUK
PARA WARIH PURI SEMANGGEN
Kocapan I Dewa Gede Ketut Sengkor sareng rakan Ida pinih duwur sane mapesengan Ni Dewa Ayu Putu Saplug Kanya , gumanti praya gumana ngabih arin Ida pinih alit jenek malinggih ring Puri Semanggen.
Kawuwus I Dewa Ketut Sengkor alaki rabi kaping pisan lawan Ni Desak Putu Anom sakeng jagat Melayang Pejeng Kaja sane tegak purine delod Pura Marajan Agung Melayang lawangan pamedal kaping kalih sakeng kaler dangin rurung . Parabian Sang Kalih ngendahang putra petang diri mapuspata ;
1. Kaping siki I Dewa Putu Kandel, embas sawatara warsa 1868.
2. Kaping kalih Ni Desak Made Kemul inalap rabi olih I Dewa Made Rai sakeng Puri Batan Wani.
3. Kaping tiga I Dewa Nyoman Suta embas sawatara warsa 1877.
4. Kaping papat I Dewa Ketut Cenikan embas sawatara warsa 1881.
Wus punika I Dewa Ketut Sengkor angalap rabi kaping kalih,wantah arin Ida rabi kaping siki wit guru rupaka tunggil, mapesengan Ni Desak Made Rai ngendahang putra kalih lanang istri maparab ;
5. Kaping siki I Dewa Made Kenting embas sawatara warsa 1874.
6. Kaping kalih Ni Desak Ketut Gendor embas sawatara warsa 1878, inalap rabi olih I Dewa Made Badoh sakeng puri Pusat ,saha salantur nyane anangun Puri Pondok .
#.LANTUR baosang munggwing I Dewa Putu Kandel alaki rabi kaping pisan lawan Ni Desak Nyoman Kelemis sakeng Puri pamijilan Sang Ibu ring Melayang Pejeng Kaja ngendahang putra limang diri mawasta ;
1.I Dewa Putu Binder.
2. I Dewa Nyoman Mendir.
3. I Dewa Ketut Wari.
4. I Dewa Putu Kalik.
5. Ni Desak Made Gembrong.
Baosang mangkin sowang-sowang putran I Dewa Putu Kandel wijiling rabi kaping pisan,minakadi;
1. Kaping siki I Dewa Putu Binder embas sawatara warsa 1902 alaki rabi lawan Ni Desak Ketut Gedor sakeng puri Pusat ngendahang putra istri – istri tigang diri maparab:a .Desak Putu Oka Taman ( Sak Tu Jantuk),inalap rabi olih Dewa Ketut Diran sakeng Puri Kanginan. b. Desak Made Rai Jantak inalap rabi olih Dewa Made Asta Pak sakeng puri Dauh Tlabah. c. Desak Nyoman Suci ( Man Jantik) alaki rabi lawan I Made Jati sakeng Br. Guliang Pejeng..
2. Kaping kalih I Dewa Nyoman Mendir embas sawatara warsa 1908 alaki rabi kaping pisan lawan Ni Desak Made Dugler sakeng puri Kanginan ngendahang putra lanang kalih diri maparab: a .Dewa Putu Togog Mudra alaki rabi lawan Desak Nyoman Natar sakeng puri Batan Bingin ngendahang putra lanang tiga ngaran Dewa Putu Muscita , Dewa Made Tisna , Dewa Nyoman Artawa. b . I Dewa Nyoman Lasta ( Man Jadag ) alaki rabi lawan Ni Nengah Nadri sakeng Br. Bendul Klungkung madwe putra nenem maparab; Ni Desak Putu Tirta ( Penyot), I Dewa Made Jableg, Ni Desak Nyoman Sucita ( Kecet), I Dewa Ketut Genggong, I Dewa Putu Berit, I Dewa Made Botak,saha salanturnyane maka sami punika jumenek ring Kali Baru Singaraja. Wus punika Ida malih ngabil rabi kaping kalih maparab Ni Desak Nyoman Ceper sakeng Puri Pusat , ngendahang putra istri a diri madan Desak Nyoman Oka Kenyet inalap rabi olih Dewa Putu Gede Muscita sakeng puri Rangki ngendahang putra istri sanunggal madan Dewa Ayu Putu Juli Musciti. Kenginan Ni Desak Nyoman Ceper wit sapihan parabian lawan Cokorda Buta sakeng Puri Tanggu Ubud . Parabiane ring Puri Ubud nenten ngendahang sentana .
3. Kaping tiga I Dewa Ketut Wari embas sawatara warsa 1912,alaki rabi lawan Ni Gusti Agung Ayu Rai Caklek tosning I Gusti Agung Maruti sakeng Br. Ubud Kelod,mungwing tegak purine, delod Pasar Ubud selat tembok panyengker Pasar, ngendahang putra limang diri maparab :
a.Dewa Putu Arsa alaki rabi lawan Ni Wayan Gasir ( Jro Menuh) sakeng Br. Delod Peken Ubud Kelod ngendahang putra tiga ngaran ; #. Dewa Putu Sonta ( Dewa Potok) . #. Desak Made Juli Artini ( Sak De Jengki ) , # .Dewa Nyoman Astawa ( De Man Nggung).
b. Desak Made Arsi ( Sak Klempung ) alaki rabi lawan I Made Darmana ( Nugri ) sakeng Tohpati Badung.
c. Desak Nyoman Lungid sungkan ile ngawit munggah anom ( TH.1961).
d. Dewa Ketut Putrawan ( Toklok Jata Sawitur / Tut Ubud ) alaki rabi lawan Desak Putu Nasih ( Sak Tu Bunter) sakeng puri Batan Wani yukti putran Dewa Made Kari lawan Desak Made Dugler, saha ngendahang putra tiga maparab ; # .Dewa Gede Putu Widhi Astu ( Sempol) alaki rabi lawan Ni Wayan Rini ( Jro Padma) mijil putra lanang kalih lwiripun ; ## Dewa Gede Wari Jiwa Arsa (Dogi), ## . Dewa Gede Wari Praneka ( Dego).
# .Kaping kalih Dewa Ayu Widya Asti ( Jengki) alaiki rabi lawan Dewa Gede Parwata ( Sempol) sakeng jagat Pangembungan warga Dewa Kaleran mijil putra istri kalih ngaran ; ## Dewa Ayu Mas Adnyani , ## Dewa Ayu Nila Prani Swari.
# Kaping tiga Dewa Gede Dharma Suasta ( Mang Bak ) alaki rabi lawan Desak Gede Ariningsih warga Dewa Kaleran sakeng Br, Sampalan Nusa Panida mijil putra akalih ngaran; ## Dewa Gede Wari Sujata lan Dewa Ayu Wari Utami.
e . Desak Putu Raka ( Sak Gobleh) alaki rabi lawan I Gusti Agung Ngurah KK sakeng Campuhan Br. Ubud Kelod.
4. Kaping papat I Dewa Putu Kalik alaki rabi lawan Ni Gusti Nyoman Keres soroh warga Arya Wang Bang Pinatih sakeng jagat Tebesaya - Peliatan - Ubud,ngendahang putra nenem diri maparab; I Dewa Putu Tantra, I Dewa Nyoman Mudra ( Man Bona), I Dewa Made Surya Darma( De Merdah), I Dewa Nyoman Putrawan ( Man Gareng),lan Ni Desak Ketut Geeg .
5. Kaping lima Ni Desak Made Gembrong inalap rabi olih I Dewa Ketut Pater sakeng Puri Pondok, saha lantur wekasan anangun Puri Madya .
A KLAMAD MATRA TATWA CARITA PURI CAMPUHAN UBUD.
Kawarnanan I Dewa Ketut Wari duk mayusa 14 warsa utawi warsa 1928, Ida nyaraka ring Cokorda Oka Kinceng Puri Kantor Ubud sane lumrah kabaos Cokorda Aji Badung . Irika I Dewa Ketut Wari pinaka panginte putran Ida Cokorda Aji Badung sane mawasta Anak Agung Istri Putra sane loktah kojaran Gung Ti Gede.Kala punika I Dewa Ketut Wari taler ka sakolahang ring SR no; I Ubud jantos tamat ngamolihang Ijazah 1935. Risampune I Dewa Ketut Wari akerab kambe warsa 1938 turmaning raris risampune endah putra petang diri ,nuli raris Ida makarya dados “ kooky “ utawi tukang masak wong Welanda mawasta Rudolf Bonnet ngawit warsa 1947 .Munggwing kawentenan Ni Gusti Agung Ayu Rai Caklek duke kantun anom pinaka panyeroan ring Puri Kantor , gumana nginte putran Ida Cokorda Raka Sukawati presiden NIT sane mawasta Cokorda Raka Parsa . Kasinahan nyane Ni Gusti Agung Ayu Rai Caklek wantah sameton ari misan mingsikian lawan Ni Gusti Agung Ayu Putu Gunik rabi pramin Ida Cokorda Raka Sukawati pinaka Ibu Cokorda Parsa. Indike punika awanan raris I Dewa Ketut Wari lan Ni Gusti Agung Ayu Rai Caklek kapica nyakap tanah tegalan magenah ring Babakan Campuhan Ubud . Ngawit duk punika raris Sang Kalihan anangun Puri ring Babakan Campuhan Ubud , rawuh mangkin kabaos PURI CAMPUHAN UBUD.
LANTUR BAOSANG kadi Ida I Dewa Putu Kandel ngalap rabi kaping kalih mapesengan Ni Desak Made Rai,gumanti baluan wit rabin I Dewa Made Keting ari kwalon Ida I Dewa Putu Kandel,saha ngendahang putra istri a diri maparab Ni Desak Ketut Menter inalap rabi olih I Dewa Putu Gudug sakeng Puri Batan Wani.
#.LANTUR WAWANIN kocapan malih munggwing putran Ida I Dewa Gede Ketut Sengkor sane kaping tiga mawasta I Dewa Nyoman Suta alaki rabi lawan Ni Desak Ketut Monteg sakeng puri Rangki saha salantur nyane magingsir sakeng Puri Semanggen anangun Puri Puri PARWA wit nyepih tegak karang Puri Kanginan.Kabaos parabian Sang Kalihan wus ngedahang putra petang diri, maparab:
1 . I Dewa Putu Gug Kanya.
2. I Dewa Nyoman Sonolan alaki rabi kaping pisan lawan Desak Putu Kompyang Plesir,warih Puri Abing maputra sanunggal mada I Dewa Putu Tamrin.
Munggwing rabi kaping kalih mawasta Desak Made Pendet sakeng Puri Semanggen maduwe putra tatiga ngaran : a. # Desak Made Suji inalap rabi olih Dewa Putu Kanca sakeng jagat Melayang, .b # I Dewa Nyoman Samba, c, # I Dewa Ketut Rata ( De Tut Lelung) seda yusa 23 tiban yukti warsa 1999.
3 . I Dewa Ketut Kotogan lebar kantun anom.
I Dewa Made Lebeng alaki rabi lawan Ni Desak Putu Rentet sakeng Puri Dangin Tlabah warga sameton Dukuh Pejeng,ngendahang putra petang diri maparab : a. # I Dewa Putu Tama angalap rabi wong Islam mawinan Ida nganutin agam Islam. b #. I Dewa Made Sudira ( De De Pus ). c ,# Dewa Made Widiasa ( De Dek Grebes ). D # Ni Desa Nyoman Ngemping inalap rabi olih ERIK sakeng pulo Rote ( NTT) Agama Kristen.
#. Munggwing putran I Dewa Gede Ketut Sengkor sane kaping papat maparab I Dewa Ketut Cenikan jenek malinggih ring Puri Semanggen nyarengin rakan Ida pinih duwur,tur sampun alaki rabi lawan Ni Desak Kompyang Jering sakeng jagat Melayang Pejeng Kaja sane tegak purine ring Melayang , delod Pura Merajan Agung selat tembok panyengker pura,wus ngendahang putra kalih lanang istri mapesengan ;
1.Kaping siki I Dewa Putu Goyor alaki rabi lawan Ni Desak Putu Rai Belad sakeng Puri Kajanan ngendahang putra kalih lanang istri ,maparab, a. # I Dewa Nyoman Wija ( De Man Celeng ) ,riwus mayusa 55 tiban,alaki rabi lawan Ni Made .... sakeng Tempekan kelod Tarukan warga Pameregan. Risampune maduwe putra tatiga kantun alit- alit raris Dewa Nyoman Wija lebar Maret 2012.b # Desak Ketut Suci inalap rabi olih Dewa Made Kaca sakeng Puri Batan Wani.
2. Kaping kalih Ni Desak Made Pendet inalap rabi olih I Dewa Nyoman Sonolan sakeng Puri Parwa pinaka rabi kaping kalih.
KINUCAP PUTRAN I Dewa Gede Ketut Sengkor wit rabi panawing ring PURI SEMANGGEN sane maparab I Dewa Made Kenting alaki rabi lawan Ni Desak Made Rai sakeng jagat Melayang Pejeng Kaja sane tegak purine ring Melayang dauh Pura Desa selat rurung rong lawang kaping kalih sakeng kaler ,saha salantur nyane magingsir sakeng Puri Semanggen anagun PURI DAUH TELABAH mapisaga lawan Puri Kawan,wus ngendahang putra petang diri maparab;
1.Kaping siki Ni Desak Putu Tunas Gebreg inalap rabi olih I Dewa Putu Liyep sakeng jagat Cagaan Pejeng Kangin sane tegak purine dauh Merajan Agung Cagaan selat margi agung baleran pangkung.
2. Kaping kalih I Dewa Ketut Ngepeng alaki rabi lawan Ni Wayan Ruket soroh warga Pameregan sane tegak umah nyane dajan Pura Panti Meregan selat rong lawang a kuren,wus ngendahang putra limang diri, madan :
a. Dewa Made Asta Pak alaki rabi lawan Desak Made Rai Jantak sakeng puri Semanggen.
b. Ni Desak Nyoman Riyed inalap rabi olih Dewa Made Cakra sakeng puri Dukuh Tarukan.
c . I Dewa Ketut Rata ( De Tut Kolok ) alaki rabi lawan Ni Desak Made Ari ( Sak Mundeh ) sakeng puri Batan Wani.
d. Desak Putu Pasung inalap rabi kaping pisan olih I Dewa Ketut Lanus sakeng puri Sor Pura,lan parabian kaping kalih lawan I Wayan Mering warga Pameregan.
e, Dewa Made Merta ( De De Nik ) alaki rabi lawan Ni Gusti Ayu Sulastri sakeng Desa Sedang - Badung.
3. Kaping tiga I Dewa Made Sadia alaki rabi lawan Ni Desak Made Kulajen sakeng jagat Melayang Pejeng Kaja sane tegak purine delod Pura Merajan Agung Melayang selat tembok panyengker Pura Merajan Agung , wus ngendahang putra istri kalih diri maparab ; a, # Ni Desak Made Sari Kanya. B , # Ni Desak Putu Jantuk Kanya, lebar risampun mayusa 51 tiban.
Duk sawatara warsa 2007 , wenten wang Nusa Panida sakeng Desa Bingin kacamatan Batu Kandik madan I Made Sudarma ka ateh olih warga pakilitan sakeng wadu, manawita ipun I Made mayusa 22 tiban, rawuh jumujug ngaranjing ka Puri Pusat , saha wenginne duk punika ipun wang Nusa makemit masare ring Natar Mrajan Pusat riantuk nembene polih pedek tangkil, teler nembe uning ring Jagat Tarukan. Jeroning masadu ejeng mababa oasan sareng Toklok Jata Sawitur, ipun maosang sakaning ipun molihang baos baas pipis, buat naraka kageringan ipun ,ring Nusa , sangkaning nenten taen pedek tangkil ring Mrajan Pusat Tarukan , saha mangdene ngaruruh purin Dewa Pokel. Kadi suwe ipun ngintip gatra maidep uning ring sane mawasta jagat Tarukan lan puri duwen Dewa Pokel. Kadi punika unteng babaose duk punika.
Pungkuran sawatara warsa 2010 wenten rawuh tangkil ka Puri Pusat sakeng Kab. Negara Bali yukti para panyaman ipun I Made Sudarma Nusa, buat tatujon nunas Kajang Kawitan riantukan ipu sedek ngabenang reraman ipune ring Negara. Raris wus matur ring Dewa Nyoman Wija nuli kakaryaning Kajang Kawitan oli Dewa Nyoman Wija anggen ipun kajang ring sawa kapleboning . Manut pidartan ipun sane kantun jenek ring Nusa , wantah a diri wiyakti I Made Sudarma. Munggwing bapan ipun madan I Wayan Janjan lan pekak ipun I Made Tarukan sampun newata sedek yusa tengah tuwuh. Nanging belin I Made Tarukan sane madan I Wayan Jarda saperti sentanane jumenek ring Negara yukti ipun Sang Nunas Kajang Kawitan maka para sentanan I Wayan Jarda. Ngawit warsa 2007 punika raris warga Bingin Nusa Panida naap kala Buda Kliwon Pegat Uwakan, ngutsahayang mangda molih pedek tangkil ring Mrajan Agung , pamekas ring Mrajan Puri Pusat.
Puput kasurat ( dikonsep) tatwa puniki rahina Buda Kliwon – Matal tahun isaka 1931 ( 23 – 12 – 1009).
Salanturnyane puput antuk ngetik komputer olih tityang anggen malajah ngetik rahina Redite Kliwon – Watugunung , 8 – 1 – 2012.
Maka panguntat gantas puput kasurat jangkep kapurnayang lawan daging Babad Prasati sane kasungsung ring Mrajan Agung Dewa Kabetan aneng Tarukan, wus kalembar ( kawacen) tgl.4 – 10 – 2012 olih Guru Gede Pasek Budha Gautama sareng Toklok Jata Sawitur magenah ring jeroan Mrajan Agung. Rahina ,Anggara Umanis Medangkungan tgl.29 – 10 – 2012,nedenging purnam ka V.
Utawi Warsa ; NETRA CANDRA SUNYA KARWA.
Maka pamuntat atur wanti – wanti kadi Tityang pangripta matur suksma dahat suksmaning manah antuk sweca asung Batara – Batari wus kasungsung ring Mrajan Agung , noro liyan wantah sangkaning panugrahan Ida , ngawinang prasida Tityang muputang daging tatwa puniki ngawit Tityang ngaruruh Babad sane aptiang Tityang,yukti antar polihang Tityang turmaning gelis idep antuk Tityang ngresepang daging nyane.
Om Santih santih santih Om. Br. Tarukan Kaja,29 – 10 - 2012
Sakeng tityang pangripta: .
Warih Dewa Kabetan Tarukan
( Toklok Jata Sawitur alias TUT UBUD )
No comments:
Post a Comment